ಕರ್ನಾಟಕಾಚೆ ಪ್ರತಿಷ್ಠಿತ `ಅ ಶ್ರೇಣಿಚೆ ೧೨೦ ವರಸಾಚೆ ಇತಿಹಾಸ ಆಸ್ಸುಚೆ ಸಹಕಾರಿ ಬ್ಯಾಂಕ್ ಜಾಲೀಲೆ ಶಿರಸಿ ಅರ್ಬನ್ ಸಹಕಾರಿ ಬ್ಯಾಂಕಾಚೆ ೨೦೨೪-೨೫ವೇಂ ಸಾಲಾಚೆ ಸರ್ವ ಸಾಧಾರಣಾ ಸಭಾ ಸೆಪ್ಟಂಬರ್ ೧೪ಕ ಶಿರಸಿಚೆ ರಾಯರಪೇಟೆಂತು ಆಸ್ಸುಚೆ ಶ್ರೀ ವಿದ್ಯಾಧಿರಾಜ ಕಲಾಕ್ಷೇತ್ರಾಂತು ಚಲ್ಲೆ. ಸಭಾಚೆ ಅಧ್ಯಕ್ಷಪಣ ಬ್ಯಾಂಕಾಚೆ ಅಧ್ಯಕ್ಷ ಶ್ರೀ ಜಯದೇವ ಯು. ನಿಲೇಕಣಿ ತಾನ್ನಿ ಘೆತ್ತಿಲೆ. ಹೇ ವೇಳ್ಯಾರಿ ತಾನ್ನಿ ಕೆಲೀಲೆ ಬ್ಯಾಂಕಾಚೆ ಕಾರ್ಯಕ್ಷೇತ್ರಾಚೆ ವ್ಯಾಪ್ತಿ ರಾಜ್ಯವ್ಯಾಪಿ ವಿಸ್ತರಣ ಕೊರಚೆ ಪ್ರಸ್ತಾವನೆಕ ಬ್ಯಾಂಕಾಚೆ ಸರ್ವಸಾಧಾರಣ ಸಭಾಂತು ಹಾಜರಾಶ್ಶಿಲೆ ಸರ್ವ ಸದಸ್ಯ ತಾಕೂನು ಏಕ ಮನಾಚೆ ಅನುಮೋದನ ಮೆಳ್ಳೆ. ಹಾಜ್ಜೇನ ಬ್ಯಾಂಕಾಚೆ ವ್ಯವಹಾರ ಆನಿ ಇತ್ಲೆ ಉದರ್ಗತಿ ಪಾವೋ ಮ್ಹೊಣು ಸರ್ವಸದಸ್ಯಾನ ಆಶಾ ಕೆಲ್ಲಿ. ಹೇ ಸರ್ವ ಸಾಧಾರಣ ಸಭಾಂತು ಪ್ರಾಸ್ತಾವಿಕ ಜಾವ್ನು ಉಲಯಿಲೆ ಬ್ಯಾಂಕಾಚೆ ಅಧ್ಯಕ್ಷ ಶ್ರೀ ಜಯದೇವ ಯು. ನಿಲೇಕಣಿ ತಾನ್ನಿ೨೦೨೪-೨೫ ಸಾಲಾಂತು ಬ್ಯಾಂಕ್ ರೂ. ೨೩೬೧ ಕೋಟಿ ವ್ಯವಹಾರ ಚಲಯಿಲೆ ಆಸ್ಸುನು, ಠೇವು ಸಂಗ್ರಹ ೧,೩೭೭ ಕೋಟಿ ಪಶಿ ಚ್ಹಡ ಜಾಲ್ಲ್ಯಾ. ಸದಸ್ಯಾಂಕ ದಿಲೀಲೆ ರೀಣ ಆನಿ ಮುಂಗಡ ೯೦೦ ಕೋಟಿಪಶಿ ಚ್ಹಡ, ಹಾಜೇನ ಘೆಲೀಲೆ ವರಸಾಚೆ ನಿವ್ವಳ್ಟ ಮುನಾಪೋ ೧೧.೦೭ ಕೋಟಿ ಮ್ಹೊಣು ತಾನ್ನಿ ಸಾಂಗ್ಲೆ. ಹಾಜೇನ ಇತ್ತುಲೆ ವ್ಹಡ ಸಾಧನ ಕೆಲೀಲೆ ರಾಜ್ಯಾಚೆ ಕೆಲವೇ ಕೆಲವ ನಗರ ಸಹಕಾರಿ ಬ್ಯಾಂಕಾಂತು ಶಿರಸಿ ಅರ್ಬನ್ ಬ್ಯಾಂಕ್ ಏಕ ಮ್ಹೊಣು ತಾನ್ನಿ ಸಾಂಗ್ಲೆ. ಆನಿ ತತ್ಸಂಬಂಧ ಸರ್ವ ಸದಸ್ಯಾಂಗೆಲೆ ಶ್ಲಾಘನ ಕೆಲ್ಲಿ. ಬ್ಯಾಂಕಾಚೆ ಸದಸ್ಯಾಂಗೆಲೆ ಅಂಕಡೆ ೪೯,೪೧೬ ದಾಂಟಿಲಾ, ಸಂದಾಯಿತ ಶೇರು ಭಾಂಡವಾಳ ೪೧.೩೨ ಕೋಟಿಕ ವಚ್ಚುನು ಪಾವ್ಲಾ, ಘೆಲೀಲೆ ವರಸಾಚೆ ರೂ. ೧೧೬.೮೨ ಕೋಟಿ ಆದಾಯ ರೂ. ೧೩೪.೦೧ ಕೋಟಿಕ ವಚ್ಚುನು ಪಾವಲಾ. ನಿವ್ವಳ ಮುನಾಪೋ ರೂ. ೧೧.೦೭ ಕೋಟಿ ಮ್ಹೊಣು ತಾನ್ನಿ ಸಾಂಗ್ಲೆ.
ಶಿರಸಿ ಅರ್ಬನ್ ಬ್ಯಾಂಕಾಚೆ ಉದರ್ಗತಿಚೆ ಸ್ಥೂಲ ಚಿತ್ರಣ ಬ್ಯಾಂಕಾಚೆ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ಆರತಿ ಎಸ್. ಶೆಟ್ಟರ್ ತಾನ್ನಿ ದಿಲ್ಲಿ.
ಸುರವೇಕ ಬ್ಯಾಂಕಾಚೆ ಸಂಸ್ಥಾಪಕ ಜಾಲೀಲೆ ದಿ.ರಾವ್ ಬಹಾದ್ದೂರ್ ಪುಂಡಲೀಕರಾವ್ ನಾರಾಯಣ ಪಂಡಿತ್ ತಶೀಚಿ ಶೇಷಗಿರಿ ನಾರಾಯಣ ಕೇಶವೈನ್ ತಾಂಗೆಲೆ ಪ್ರತಿಮೆಕ ಪುಷ್ಪ ಹಾರ ಸಮರ್ಪಣ ಕೆಲ್ಲಿ. ಹೇ ವೇಳ್ಯಾರಿ ಉಪಾಧ್ಯಕ್ಷ ಸಂತೋಷ ಎಸ್. ಪಂಡಿತ ಆನಿ ನಿರ್ದೇಶಕ ಮಂಡಳಿಚೆ ಉಪಸ್ಥಿತ ವ್ಹರಲೀಲೆ.
ಸರ್ವ ಸಾಧಾರಣ ಸಭಾಂತು ಬ್ಯಾಂಕಾಚೆ ಮ್ಹಾಲಗಡೆ ಸದಸ್ಯ ಜಾಲೀಲೆ ವಸಂತ ಎನ್.ನೇತ್ರೆಕರ್, ರಾಧಾಬಾಯಿ ಜಿ.ಮೆಣಸಿ, ದಾಮೋದರ ವಿ. ಭಟ್, ಪ್ರಕಾಶ ಎಸ್.ಬಂಗ್ಲೆ, ವಾಮನ ಜಿ. ನಾಡಿಗ , ಮಹಾಬಲೇಶ್ವರ ವೆಂ. ಭಟ್, ಕಕ್ಕೋಡ, ತಶೀಚಿ ಬ್ಯಾಂಕಾಚೆ ಸೇವಾನಿವೃತ್ತ ಸಿಬ್ಬಂದಿ ದೀಪಕ ಎಸ್. ಪ್ರಭು, ಸುರೇಶ ಜಿ. ಶೇಟ್, ಗಜಾನನ ಎಚ್. ಐಗಳ, ಚಂದ್ರಕಾಂತ ಕೆ. ಗೌಡ ತಾಂಕಾ ಸನ್ಮಾನ ಕೊರನು ಗೌರವ ಕೆಲ್ಲಿ. ಆನಿ ೨೫ ವರ್ಷಾಚಾನ ಕಾಯಂ ಜಾವ್ನು ಸೇವಾ ಪಾವಯತಾ ಆಸ್ಸುಚೆ ಬ್ಯಾಂಕಾಚೆ ೬ ಲೋಕ ಸಿಬ್ಬಂದಿಂಕ ಹೇಂಚಿ ವೇಳ್ಯಾರಿ ಗೌgವ ಕೆಲ್ಲೆ.
ಎಸ್‌ಎಸ್‌ಎಲ್‌ಸಿ ತಶೀಚಿ ಪಿಯುಸಿ ಪರೀಕ್ಷೆಂತು ಶೇ.೯೦ಪಶಿ ಚ್ಹಡ ಅಂಕ ಘೆತ್ತಿಲೆ ಆನಿ ಪದವಿ, ಸ್ನಾತಕೋತ್ತರ ಪದವಿ ಪರೀಕ್ಷೆಂತು ವಿಶ್ವವಿದ್ಯಾಲಯಾಕ ರ್‍ಯಾಂಕ್ ಘೆತ್ತಿಲೆ ಬ್ಯಾಂಕ್ ಸದಸ್ಯಾಂಗೆಲೆ ೭೭ ಚರಡುವಾಂಕ ಒಟ್ಟು ೩,೦೮ಲಕ್ಷ ರೂ., ಮೊತ್ತಾಚೆ ಪ್ರತಿಭಾ ಪುರಸ್ಕಾರ ವಾಂಟಿಲೆ. ನಿರ್ದೇಶಕ ಪ್ರೊ.ಕೆ.ಎನ್.ಹೊಸ್ಮನಿ ತಾನ್ನಿ ಪರಿಚಯ ಕೊರನು ದಿಲಯಾರಿ, ಆನ್ನೇಕ್ಳೆ ನಿರ್ದೇಶಕ ಸದಾನಂದ ಎಮ್. ನಾಯ್ಕ ತಾನ್ನಿ ಆಬಾರ ಮಾನಲೆ.