ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ, ಕೊಂಕಣ ಕಲಾ ಮಂಡಳ (ರಿ.) ಶಿರಸಿ ಹಾಂಗೆಲೆ ಸಹಯೋಗಾರಿ ಶಿರಸಿಚೆ ರಂಗಧಾಮ, ನೆಮ್ಮದಿ ಆವರಣ ಸಭಾಂಗಣಾಂತು ದಿನಾಂಕ ೨೪.೦೮.೨೦೨೫ ದಿವಸು ಕೊಂಕಣಿ ಮಾನ್ಯತಾ ದಿನಾಚರಣೆ- ೨೦೨೫ ಆಚರಣ ಕೆಲ್ಲಿ. ವಂ. ಸ್ವಾಮಿ ಪೀಟರ್ ಪಿಂಟೊ ತಾನ್ನಿ ಕೊಂಕಣಿ ಧ್ವಜಾರೋಹಣ ಕೊರನು ಕಾರ್ಯಕ್ರಮಾಕ ಸುರುವಾತ ದಿಲ್ಲಿ.
ಕಾರ್ಯಕ್ರಮಾಚೆ ಅಧ್ಯಕ್ಷಪಣ ಘೆತ್ತಿಲೆ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ ಅಧ್ಯಕ್ಷ ಶ್ರೀ ಜೋಕಿಂ ಸ್ಟ್ಯಾನಿ ಆಲ್ವಾರಿಸ್ ತಾನ್ನಿ ಪ್ರಾಸ್ತಾವಿಕ ಜಾವನು ಉಲಯಿಲೆ. ಕೊಂಕಣಿ ಭಾಷೆಕ ರಾಷ್ಟ್ರೀಯ ಮಾನ್ಯತಾ ಮೆಳೀಲೆ ಖಾತೇರಿ ಆನಿ ತಾಜ್ಜೆ ಮಹತ್ವ ಸಭಾಕ ಕಳಯಿಲೆ. ಕೊಂಕಣಿ ಶಿಕ್ಕಾ, ಕೊಂಕಣಿ ವಿಸರನಾಶಿ ಕೊಂಕಣಿಂತು ಉಲಯಕಾ ಮ್ಹೊಣು ತಾನ್ನಿ ಆಪೋವ್ಣಿ ದಿಲ್ಲಿ.
ಶಿರಸಿಯ ಡಾನ್ ಬೊಸ್ಕೊ ಚರ್ಚ ಪ್ರಧಾನ ಧರ್ಮಗುರು ವಂ. ಸ್ವಾ. ಪೀಟರ್ ಪಿಂಟೊ ತಾನ್ನಿ ಸಮಾರಂಭಾಚೆ ಉದ್ಘಾಟನ ಕೊರನು ಕೊಂಕಣಿ ಕವನ ವಾಚನ ಕೊರನು ದೇವು ಬರೆಂ ಕೊರೊ ಮ್ಹಳ್ಳೆ.
ಹೇ ಕಾರ್ಯಕ್ರಮಾಚೆ ಉಪರಾಂತ ಶಾಳಾ/ಕಾಲೇಜು ವಿದ್ಯಾರ್ಥ್ಯಾಂಕ ಕೊಂಕಣಿ ಭಾಷಣ ತಶೀಚಿ ಕೊಂಕಣಿ ಗೀತಗಾಯನ ಸ್ಪರ್ಧಾ ಚಲ್ಲೆ.
ಶ್ರೀ ವಾಸುದೇವ ಶಾನಭಾಗ ಹಾಂಗೆಲೆ ಅಧ್ಯಕ್ಷಪಣಾರಿ ಚಲೀಲೆ ಕವಿಗೋಷ್ಟಿ ಕಾರ್ಯಕ್ರಮಾಂತು ಕೊಂಕಣಿ ಕವಿ ಜಾಲೀಲೆ ದೀಪಾಲಿ ಸಾಮಂತ, ನಾಗೇಶ ಅಣ್ವೇಕರ, ಶ್ರೀನಿವಾಸ ಶಾನಭಾಗ, ಕೃಷ್ಣ ಪದಕಿ, ರಾಜೇಂದ್ರ ಕುಮಾರ ಎಸ್. ಮಿರಾಂದಾ, ಅಜಿತ ಬಿಳಗಿ, ಉಮೇಶ ದೈವಜ್ಞ – ತಾನ್ನಿ ತಾಂಗತಾಂಗೆಲೆ ಕವಿತಾ ವಾಚನ ಕೆಲ್ಲಿ. ರವಿ ಹೆಗಡೆ ಗಡಿಹಳ್ಳಿ ಶಿರಸಿ ಹಾನ್ನಿ ಕಾರ್ಯಕ್ರಮ ನಿರೂಪಣ ಕೆಲ್ಲಿ.
ಸಮಾರೋಪ ಕಾರ್ಯಕ್ರಮಾಚೆ ಅಧ್ಯಕ್ಷಪಣ ಘೆತ್ತಿಲೆ ಕೊಂಕಣಿ ಅಕಾಡೆಮಿ ಅಧ್ಯಕ್ಷ ಶ್ರೀ ಜೋಕಿಂ ಸ್ಟ್ಯಾನಿ ಆಲ್ವಾರಿಸ್ ತಾನ್ನಿ ಸಕಡಾಂಕ ಯೇವಕಾರ ಕೆಲ್ಲಿ.
ಮುಖೇಲ ಸೊಯರೆ ಜಾವನು ಆಯಲೀಲೆ ಶಿರಸಿ- ಸಿದ್ದಾಪುರ ವಿಧಾನಸಭಾ ಕ್ಷೇತ್ರಾಚೆ ಶಾಸಕ ಶ್ರೀ ಭೀಮಣ್ಣ ಟಿ. ನಾಯ್ಕ ತಾನ್ನಿ ಉಲೋನು ‘ದೇಶಾಚೆ ಖಂಚೇಯಿ ಮೂಲ್ಲೇಕ ಘೆಲಯಾರೀಚಿ ಥಂಯಿ ಕೊಂಕಣಿ ಉಲಯಚೆ ಲೋಕು ಆಸ್ಸಾತಿ. ಸಬಾರ ಭಾಷೆ ಮಧೇ ಕೊಂಕಣಿ ಭಾಸ ಭಾಂದವ್ಯಾಚೆ ಭಾಸ ಜಾವನು ಮೆರ್‍ವತಾ ಆಸ್ಸಾ. ಕೊಂಕಣಿ ಭಾಸ ಉದರ್ಗತಿ ಪಾವೋ, ಸರಕಾರಾನಿ ಕೊಂಕಣಿ ಭಾಷಾಭಿವೃದ್ಧಿ ಖಾತೇರಿ ದಿವಚೆ ಸವಲತ್ತ ತಾನ್ನಿ ಸದುಪಯೋಗ ಕೊರನು ಘೆವ್ಕಾ ಮ್ಹೊಣು ಸಾಂಗ್ಲೆ.
ಮಾನಾಚೆ ಸೊಯರೆ ಜಾವ್ನಾಯ್ಯಿಲೆ ನಗರ ಸಭಾ ಶಿರಸಿಚೆ ಉಪಾಧ್ಯಕ್ಷ ಶ್ರೀ ರಮಾಕಾಂತ ಎಂ. ಭಟ್ಟ ತಾನ್ನಿ ಕಾರ್ಯಕ್ರಮಾಕ ದೇವು ಬರೆಂ ಕೊರೊ ಮ್ಹಳ್ಳೆ.
ಕೊಂಕಣಿ ಭಾಷಣ ಆನಿ ಕೊಂಕಣಿ ಗೀತಗಾಯನ ಸ್ಪರ್ಧಾ ವಿಜೇತಾಂಕ ಪ್ರಶಸ್ತಿ ತಶೀಚಿ ಪ್ರಮಾಣಪತ್ರ ವಾಂಟಿಲೆ. ಕೊಂಕಣಿ ಭಾಷಣ ಸ್ಪರ್ಧೆಂತು ಪ್ರಣಮ್ಯ ಹರೀಶ ಭಟ್ಟ- ಪ್ರಥಮ ಸ್ಥಾನ, ರೀತು ಕಿರಣ್ ಶೇಟ್ – ದ್ವಿತೀಯ ಸ್ಥಾನ, ರಿತು ವಿ. ಕರ್ಕಿ – ತೃತೀಯ ಸ್ಥಾನ ಜಿಕ್ಲೆ. ಕೊಂಕಣಿ ಗೀತಗಾಯನ ಸ್ಪರ್ಧೆಂತು ಪ್ರಿಸ್ಟನ್ ಡಾಯಸ್ ತಶೀಚಿ ಮೆಲ್ವಿತಾ – ಪ್ರಥಮ ಸ್ಥಾನ, ಸೌಜನ್ಯ ಅನುತಿ ಸಿದ್ದಿ- ದ್ವಿತೀಯ ಸ್ಥಾನ, ತಶೀಚಿ ಗಿರಿಧರ ಗೋಕುಲದಾಸ – ತೃತೀಯ ಸ್ಥಾನ ಜಿಕ್ಲೆ.
ವೇದಿಕೆರಿ ಅಕಾಡೆಮಿ ಸದಸ್ಯ ಜಾಲೀಲೆ ನವೀನ್ ಲೋಬೊ ಉಪಸ್ಥಿತ ವ್ಹರಲೀಲೆ. ಸ್ಥಳೀಯ ಸಂಚಾಲಕ ಜಾಲೀಲೆ ಶ್ರೀ ರಾಮ ಕಿಣಿ ತಾನ್ನಿ ಕಾರ್ಯಕ್ರಮಾಚೆ ನಿರೂಪಣ ಕೆಲ್ಲಿ. ವೆಗವೆಗಳೆ ಸಾಂಸ್ಕೃತಿಕ ಕಲಾತಂಡಾಚಾನ ಯಕ್ಷಗಾನ ತಾಳಮದ್ದಲೆ, ಲೋಕವೇದ ವೈಭವ, ಕಲಾ ವೈವಿಧ್ಯ, ವಿನೋದಾವಳಿ ಕಾರ್ಯಕ್ರಮ ಘಡ್ಲೆ.