ವೊವಿಯೊ- ವೇರ್ಸ್ ಕಾರ್ಯಗಾರ್ 29.06.2025ವೆರ್ ಕಲ್ಯಾಣ್ಪುರಾಚ್ಯಾ ಮಿಲಾಗ್ರಿಸ್ ಕೊಲೆಜಿಚ್ಯಾ ಸಭಾಂಗಣಾಂತ್ ಚಲ್ಲೆಂ. ಕಾರ್ಯಗಾರಾಚೆಂ ಅಧ್ಯಕ್ಷ್‌ಪಣ್‌ ಕರ್ನಾಟಕ ಕೊಂಕಣಿ ಸಾಹಿತ್ಯ್‌ ಅಕಾಡೆಮಿ ಅಧ್ಯಕ್ಷ್‌ ಮಾನೆಸ್ತ್‌ ಜೋಕಿಂ ಸ್ಟ್ಯಾನಿ ಆಲ್ವಾರಿಸ್‌ ಹಾಣೆಂ ಘೆತ್‌ಲ್ಲೆಂ. ಗುಮಟ್‌ ವಾಜೊಂವ್ಚ್ಯಾ ಸವೆಂ ಕಾರ್ಯಾಗಾರಾಚೆಂ ಉಗ್ತಾವಣ್‌ ಕರ್ನ್‌ ʼಖಂಯ್ಚ್ಯಾಯ್‌ ಲೊಕಾ ಸಮುದಾಯಾಚೆಂ ಐತಿಹಾಸಿಕ್‌ ಸಾಮಾಜಿಕ್‌ ಪಾಟ್‌ಥಳ್‌ ಸಮ್ಜುಂಕ್‌ ತ್ಯಾ ಲೊಕಾಚ್ಯಾ ಸಾಂಪ್ರದಾಯಿಕ್‌ ಪದಾಂಚಿಂ ವಳಕ್ ಭೋವ್‌ ಗರ್ಜ್‌ ಆಸಾ. ತಶೆಂ ಜಾಲ್ಲ್ಯಾನ್‌ ಯುವ ಪಿಳ್ಗೆನ್ ಆಪ್ಲ್ಯಾ ಸಮುದಾಯಾಚ್ಯಾ ಜಾನಪದ್‌ ಸಾಹಿತ್ಯಾ ತೆವ್ಶಿಂ ಆಪ್ಲಿ ಆಸಕ್ತ್‌ ದಾಕಯ್ಜೆʼ ಮ್ಹಣಾಲೊ.
ಕರ್ನಾಟಕ ಕೊಂಕಣಿ ಸಾಹಿತ್ಯ್‌ ಅಕಾಡೆಮಿ ಕೊಂಕಣಿ ಭಾಸ್‌, ಶಿಕಪ್‌, ಸಾಹಿತ್ಯ್‌, ಕಲಾ, ಜಾನಪದ್‌ ಆನಿ ಪರಂಪರಾ ಉರೊಂವ್ಕ್‌ ತಶೆಂಚ್‌ ವಾಗೊಂವ್ಕ್‌ ನಿರಂತರ್‌ ಪ್ರೋತ್ಸಾವ್‌ ದೀವ್ನ್‌ ಆಸಾ. ಸರ್ವ್‌ ಕೊಂಕ್ಣಿ ಭಾಂವ್ಡಾಂನಿಂ ಅಕಾಡೆಮಿನ್‌ ಚಲೊಂವ್ಚ್ಯಾ ಅಸಲ್ಯಾ ಕಾರ್ಯಕ್ರಮಾಂನಿಂ ವಾಂಟೊ ಘೆಂವ್ಚ್ಯಾ ಮುಕಾಂತ್ರ್‌ ಹಾಚೊ ಫಾಯ್ದೊ ಆಪ್ಣಾಂವ್ಕ್‌ ಉಲೊ ದಿಲೊ.
ಮುಕೆಲ್‌ ಸಯ್ರೊ ಜಾವ್ನ್‌ ಹಾಜರ್‌ ಆಸ್‌ಲ್ಲ್ಯಾ ಮಿಲಾಗ್ರಿಸ್ ಕೊಲೆಜಿಚೊ ಪ್ರಿನ್ಸಿಪಾಲ್‌ ಮಾನೆಸ್ತ್‌ ವಿನ್ಸೆಂಟ್‌ ಆಳ್ವ ಹಾಣೆಂ ದೊ| ಪ್ಲಾವಿಯಾ ಕ್ಯಾಸ್ತೆಲಿನೊನ್‌ ಬರಯಿಲ್ಲ್ಯಾ ʼತುಜ್ಯಾ ಹಾಸ್ಯಾಂ ಖಾತಿರ್‌ʼ ಕವಿತಾ ಪುಸ್ತಕಾಚೆಂ ಮೆಕ್ಳಿಕ್‌ ಕೆಲೆಂ. ಮುಕಾರ್‌ ಉಲೊವ್ನ್‌ ಜಾಗತೀಕರಣಾಚ್ಯಾ ಕಠಿಣ್‌ ದಬಾವಾ ಫಳಾನ್‌ ಆಯ್ಚ್ಯಾ ಯುವಜಣಾಂಕ್ ಆಪ್ಲಿ ಪರಂಪರಾ ಆನಿ ಜಾನಪದ್‌ ಸಂಸ್ಕೃತೆವಿಶಿಂ ಅಭಿಮಾನ್‌ ವಾಡಯ್ನಾಸ್ಲಲಿ ಪರಿಸ್ಥಿತಿ ನಿರ್ಮಾಣ್‌ ಜಾತಾ. ಹೆಂ ಜಾಯ್ತ್ಯಾ ಅನಾಹುತಾಂಕ್‌ ವಾಟ್‌ ಕರುನ್‌ ದಿತಾ. ಹ್ಯಾ ವಾಟೆಥಳಾರ್‌ ಆವಯ್‌ ಬಾಪಯ್‌ ಆನಿ ವ್ಹಡಿಲಾಂನಿಂ ಆಪ್ಲ್ಯಾ ಭುರ್ಗ್ಯಾಂಕ್‌ ಆಧುನಿಕ್‌ ಶಿಕಪ್‌ ದಿಂವ್ಚ್ಯಾ ಸವೆಂ ಆಪಾಪ್ಲ್ಯಾ ಕುಟ್ಮಾಚ್ಯಾ ಪರಂಪರೆಚೊ ಉಡಾಸ್‌ ಕರೊವ್ನ್‌ಚ್‌ ಆಸೊಂಕ್‌ ಜಾಯ್‌ʼ ಮ್ಹಣಾಲೊ.
ಕಾರ್ಯಾಚೊ ಅನ್ಯೆಕ್ಲೊ ಸಯ್ರೊ ಬಾಪ್| ಪ್ರಮೋದ್‌ ಕಾರ್ಡೊಜಾ ಉಲೊವ್ನ್‌ ಪಾಶ್ಚ್ಯಾತೀಕರಣಾಚ್ಯಾ ಪ್ರಭಾವಾನ್‌ ಆಮ್ಚ್ಯಾ ಲೊಕಾ ಮಧೆಂ ಜಾನಪದ್‌ ಆನಿ ಸಾಂಸ್ಕೃತಿಕ್‌ ಕಾರ್ಯಾಂನಿಂ ನಾನಾಂತಿ ಅನಾಹುತ್‌ಭರಿತ್‌ ಬದ್ಲಾವಣ್‌ ಜಾಲ್ಯಾತ್. ಹ್ಯಾ ವಿಶಿಂ ಆಮ್ಚ್ಯಾ ಘರಾಂನಿಂ ಕಾರ್ಯಿಂ ಮಾಂಡುನ್‌ ಹಾಡ್ತಾನಾ, ಚಡಿತ್‌ ಗುಮಾನ್‌ ದೀವ್ನ್‌ ಜಾಯ್ತ್ಯಾಂನಿಂ ನೆಣ್ತ್ಯಾಂಕ್‌ ಸಾರ್ಕ್ಯೆ ವಾಟೆನ್‌ ಹಾಡ್ಚ್ಯಾ ಪರಿಂ ಜಾಯ್ಜೆʼ ಮ್ಹಣಾಲೊ.
ಕಾರ್ಯಾಚೊ ಸಹ ಸಂಘಟಕ್‌ ಕಥೊಲಿಕ್‌ ಸಭಾ ಕಲ್ಯಾಣ್‌ಪುರ್ ಹಾಚಿ ಅಧ್ಯಕ್ಷಿಣ್ ಮಾನೆಸ್ತಿಣ್‌ ಮಾರ್ಸೆಲಿನ್‌ ಸೆರಾನ್‌ ಸ್ವಾಗತ್‌ ಕೆಲೊ. ಉಡುಪಿ ಜಿಲ್ಲಾ ಸಾಹಿತ್ಯ್‌, ಕಲಾ ಆನಿ ಸಾಂಸ್ಕೃತಿಕ್‌ ಸಂಘಟನಾಚಿ ಅಧ್ಯಕ್ಷಿಣ್ ದೊ| ಪ್ಲಾವಿಯಾ ಕ್ಯಾಸ್ತೆಲಿನೊ ಹಿಣೆಂ ಉಪ್ಕಾರ್‌ ಆಟಯ್ಲೊ. ರಿತೇಶ್‌ ಡಿಸೋಜ ಹಾಣೆಂ ಕಾರ್ಯೆಂ ಚಲಯ್ಲೆಂ.
ಸಭಾ ಕಾರ್ಯಾ ಉಪ್ರಾಂತ್‌ ಮಾನೆಸ್ತಿಣ್‌ ಐರಿನ್‌ ರೆಬೆಲ್ಲೊ, ಮಾನೆಸ್ತ್‌ ಅನಿಲ್‌ ಡಿಕುನ್ಹಾ ಆನಿ ಮಾನೆಸ್ತ್‌ ಗ್ಲೆನನ್‌ ಡಿಸೋಜ ಹಾಂಚ್ಯಾ ಫುಡಾರ‍್ಪಣಾಖಾಲ್‌ ವೊವಿಯೊ ವೇರ್ಸ್ ಕಾರ್ಯಾಗಾರ್‌ ಚಲ್ಲೆಂ. ಹಾಂತು ವೊವಿಯೊ ಆನಿ ವೇರ್ಸಾ ವಿಶ್ಯಾಂತ್‌ ಶಿಕಯ್ಲೆಂ.
ಸಾಂಜೆರ್‌ ಚಲ್‌ಲ್ಲ್ಯಾ ಸಂಪ್ಣೆ ಕಾರ್ಯಾಂತ್‌ ತರ್ಬೆತಿ ಜೊಡ್ಲಲ್ಯಾ ಶಿಬಿರಾರ್ಥಿಂನಿಂ ಸಾಂಪ್ರದಾಯಿಕ್‌ ಗಾನಾಂಚೆಂ ಪ್ರದರ್ಶನ್‌ ದಿಲೆಂ. ಹ್ಯಾ ಕಾರ್ಯಾಂತ್‌ ಫೆದರ್‌ ಕಮ್ಯನಿಕೇಶನ್‌ ಸಂಸ್ಥ್ಯಾಚೊ ಮ್ಹಾಲಕ್‌ ಮಾನೆಸ್ತ್‌ ವಾಲ್ಟರ್‌ ಪಿಂಟೊ ಮುಕೆಲ್‌ ಸಯ್ರೊ ಜಾವ್ನ್‌ ಹಾಜರ್‌ ಆಸೊನ್‌ ಶಿಬಿರಾರ್ಥಿಂಕ್‌ ಪ್ರಮಾಣ್‌ ಪತ್ರಾಂ ವಾಂಟ್ಲಿಂ.
ಹ್ಯಾ ಕಾರ್ಯಾಂತ್‌ ಅಕಾಡೆಮಿ ಸಾಂದೆಂ ನವೀನ್‌ ಲೋಬೊ, ದಯಾನಂದ ಮಡ್ಕೇಕರ್‌ ಹಾಜರ್‌ ಆಸ್‌ಲ್ಲೆ.