ಸಮಾಜಾಚೇ ಉದರಗತೀಂತ ಬಾಯಲಾಂಕ ಖೂಬ ಯೋಗದಾನ ಆಸಾ. ಆವಯ, ಭಯಣ ಆನೀ ಬಾಯಲ ಮ್ಹಣೂನ ತಿಚೀ ಭುಮಿಕಾ ತಾರೀಪು ಕೊರಚೆ ವರಿ ಆಸಾ. ವ್ಹರಡೀಕ ಜಾವ್ನು ಯವ್ನು ರಾತಿ ವಚ್ಚುನು ಸಕ್ಕಾಣಿ ಜಾವ್ಚೆ ಭಿತ್ತರಿ ಪರಂಪರಾ, ಸಂಸ್ಕೃತಾಯ ಆನೀ ಭಾಸ ವೇಗಳೀ ಆಸಲೀ ತರೀ ತೀ ಸಕ್ಕಡ ಸೋಂಸತಾ ಆನೀ ಕುಟುಂಬ ಚಲಯತಾ. ಬಾಯಲಾಂ ಮದೀಂ ಆತ್ಮವಿಸ್ವಾಸ ನಿರ್ಮಾಣ ಕರಪಾ ಖಾತೀರ ಅಸ್ಸಾಲೆ ಕಾರ್ಯಾವಳೀಂಚೀ ಗರಜ ಆಸಾ. ೫೦ ಟಕ್ಕೇ ಬಾಯಲೋ ಮುಖೇಲ ಪ್ರವಾಹಾಂತ ಆಯಲ್ಯಾರ ದೇಶ ಬಳಿಶ್ಟ ಜಾತಲೋ. ಬಾಯಲಾಂಕ ಸಗಳ್ಯೋ ಜವಾಬ್ದಾರ್ಯೋ ಸಹಜಪಣಾನ ನಿರ್ವಹಣ ಕರತಾತಿ. ಚಡಾಂತ ಚಡ ರಾಜಕಾರಣಾಂತ ಪ್ರವೇಶ ಕೇಲ್ಯಾರ ತಾಂಕಾಂ ಮನಶಾಚ್ಯಾ ಮುಲ್ಯಾಂ ಸಯತ ರಾಜಕಾರಣ ಚಲೋವಂಕ ಮೇಳಟಾ. ಮ್ಹೊಣು ಕರ್ನಾಟಕ ವಿಧಾನಸಭೇಚೇ ಅಧ್ಯಕ್ಷ ಯು.ಟಿ. ಖಾದರ್ ತಾನ್ನಿ ಸಾಂಗಲೇಂ. ಕರ್ನಾಟಕ ಕೋಂಕಣೀ ಸಾಹಿತ್ಯ ಅಕಾದೇಮೀನ ಆಯೋಜೀತ ಕೇಲ್ಲ್ಯಾ ಆಂತರರಾಷ್ಟ್ರೀಯ ಬಾಯಲಾಂ ದೀಸ ಆನೀ ಸುರ್ ಸಂಭ್ರಮ ೨೦೨೬ ಕಾರ್ಯಾವಳೀಚೇಂ ಉಕ್ತಾವಣ ತಾಂಣೀ ೦೮.೦೩.೨೬ ದಿಸಾ ಕಲಂಗನಾ, ಶಕ್ತಿನಗರ ಹಾಂಗಾ ಕೊರನು ಉಲಯತಾಲೆ.
ಕನ್ನಡ ಅಭಿವೃದ್ಧಿ ಪ್ರಾದಿಕಾರಾಚೆ ಅಧ್ಯಕ್ಷ ಪ್ರೋ. ಪುರುಷೋತ್ತಮ ಬಿಳಿಮಲೆ ಉಲಯತಾ “ಭಾರತಾಂತ ೭೨ ಟಕ್ಕೇ ಬಾಯಲೋ ಶೇತವಡೀಂತ ವಾವುರತಾತ, ಪೂಣ ೫೪ ಟಕ್ಕೇ ಬಾಯಲೋ ಕುಪೋಶಣಾಚೋ ತ್ರಾಸ ಸೋಂಸತಾತ. ಉಣ್ಯಾಂತ ಉಣೀಂ ೭೦ ವರ್ಸಾಂ ಆಮಕಾಂ ಬಾಯಲ ಮುಖ್ಯಮಂತ್ರೀ ಮೇಳಪಾಚೇಂ ಭಾಗ್ಯ ಮೇಳೂಂಕ ನಾ. ಹ್ಯಾ ಸಗಳ್ಯಾ ಸಮಸ್ಯಾಂ ಮದೀಂ ಆಮೀ ಹ್ಯಾ ವರ್ಸಾಯ ಬಾಯಲಾಂಚೋ ದೀಸ ಮನಯತಾತ. ಆಯಜ ದೋನ ಪುಸ್ತಕಾಂ ಪ್ರದರ್ಶೀತ ಜಾಲೀಂ. ಏಕ ಗದ್ಯ, ಏಕ ಛಂದ. ಭಾಸ ಅಕಾದೇಮೀಂನೀ ಅಣಕಾರಾಂತ ಏಕಾಮೇಕಾಂಕ ಸಹಕಾರ್ಯ ಕೇಲ್ಯಾರ ಸಮಾಜ ಆನೀ ಸಾಹಿತ್ಯ ಘಟಮೂಟ ಜಾತಲೇಂ. ಶಕ್ಯ ಜಾಲ್ಯಾರ ವೇಂಚೂನ ಕಾಡಿಲ್ಲೇ ಪದನ ಕೋಂಕಣೀಂತ ಹಾಡಚೇ ಕೊರಕಾ. ಅಕಾದೇಮೀ ಆಮಚೀ. ಗಾಯತಾಲೀಂ, ಖೇಳತಾಲೀ ಆಮ್ಗೆಲೇಚಿ ಮ್ಹಣ್ಚೆ ಭಾವಾ ದವರೂನು ಘೇತಲೇರಿ ಭಾಸ ವಾಡತಾ, ವ್ಹರತಾ. ಅಶೇಂ ತಾಂಣೀ ಸಾಂಗಲೇಂ.
ವಿಧಾನ ಪರಿಷದ ಸದಸ್ಯ ಐವನ್ ಡಿಸೋಜ, ಕರ್ನಾಟಕ ಪರಿಸರ ಪ್ರವಾಸೋದ್ಯಮ ಅಭಿವೃದ್ಧಿ ಮಂಡಳಿ ಅಧ್ಯಕ್ಷ ಶಾಲೆಟ್ ಪಿಂಟೊ, ಬೆಥನಿ ಸಂಸ್ಥೆಚೆ ಮುಖೇಲ ಸಿ. ರೊಸ್ ಸೆಲಿನ್ ಬಿ.ಎಸ್. ತಾನ್ನಿ ದೇವು ಬರೆಂ ಕೊರೊಂ ಮ್ಹಳ್ಳೆ. ಅಕಾಡೆಮಿ ಅಧ್ಯಕ್ಷ ಜೊಕಿಂ ಸ್ಟ್ಯಾನಿ ಆಲ್ವಾರಿಸ್ ತಾನ್ನಿ ಪ್ರಾಸ್ತಾವನ ಉತ್ರ ಉಲಯಿಲೀ. ವೇದಿಕೆರಿ ರಿಜಿಸ್ಟ್ರಾರ್ ರಾಜೇಶ್ ಜಿ. ಸದಸ್ಯ ನವೀನ್ ಲೋಬೊ, ರೊನಾಲ್ಡ್ ಕ್ರಾಸ್ತಾ, ಅಕ್ಷತಾ ನಾಯಕ್, ಸಪ್ನಾ ಕ್ರಾಸ್ತಾ, ದಯಾನಂದ್ ಮಡ್ಕೇಕರ್ ಉಪಸ್ಥಿತ ವ್ಹರಲೀಲೆ.. ಸ್ಟೀವನ್ ಕ್ವಾಡ್ರಸ್ ತಾನ್ನ ಆಬಾರ ಮಾನಲೆ. ಉಪರಾಂತ ವೇಗವೇಗಳ್ಯಾ ಪ್ರದೇಶಾಂತಲ್ಯಾ ಸಾತ ತೇ ಸತ್ತರ ವರ್ಸಾಂ ಪಿರಾಯೇಚ್ಯಾ ಬಾಯಲಾಂಚ್ಯಾ ಪಂಗಡಾಂನೀ ಕೋಂಕಣೀ ಗಾಯನ ಕೇಲೇಂ. ರೋಶನ ಡೀಸೂಝಾ ಆಂಜೇಲೋರ ಹಾಚ್ಯಾ ಫುಡಾರಪಣಾಖಾಲ ಸಂಗೀತಕಾರಾಂನೀ ಸಂಗೀತ ದಿಲೇಂ.ಐರಿನ್ ರೆಬೆಲ್ಲೊ ತಾನ್ನಿ ಸ್ವರ ಸಂಚಾಲನ ಕೆಲ್ಲೆ.
