ಸಾಧನಾ ಮ್ಹಣಚೆ ಕೇವಲ ಶಿಕ್ಪಣಾಕ ಸೀಮಿತ ಜಾವಚಾಕ ನಜ್ಜ, ಆಮ್ಗೆಲೆ ಸಂಸ್ಕಾರ, ದಿವ್ಯ ಸಂಸ್ಕೃತಿ ಜೀವನಾಂತು ಆಸ್ಸ ಕೊರನು ಘೆವ್ಕಾ ಮ್ಹೊಣು ಧಾರವಾಡ್ಚೆ ಅಖಿಲ ಕರ್ನಾಟಕ ದೈವಜ್ಞ ಸಮಾಜಾಚೊ ರಾಜ್ಯಾಧ್ಯಕ್ಷ ರವಿ.ಎಸ್.ಗಾವಂಕರ್ ತಾನ್ನಿ ಸಾಂಗಲೆ. ತಾನ್ನಿ ಆರತಾಂ ದಾವಣಗೆರೆಂತು ಶ್ರೀಮತಿ ಗೌರಮ್ಮ ನರಹರಿ ಶೇಟ್ ಸಭಾ ಭವನಾಂತು ಶ್ರೀಮತಿ ಪ್ರೇಮಾ ಅರುಣಾಚಲ ಎನ್.ರೇವಣಕರ್ ಪ್ರತಿಷ್ಠಾನ ತಾಕೂನು ೨೦೨೪-೨೫ವೇಂ ವರ್ಷಾಂತು ಎಸ್‌ಎಸ್‌ಎಲ್‌ಸಿ ಪರೀಕ್ಷೆಂತು ಚಾಂಗ ಅಂಕ ಘೆತ್ತಿಲೆ ದೈವಜ್ಞ ಸಮಾಜಾಚೆ ಪ್ರತಿಭಾವಂತ ಚರಡುಂವಾ ಖಾತ್ತಿರಿ ಆಯೋಜನ ಕೆಲೀಲೆ ಶಾರದಾ ಪುರಸ್ಕಾರ -೨೦೨೫ ರಾಜ್ಯ ಪ್ರಶಸ್ತಿ ಪ್ರದಾನ ಸಮಾರಂಭ ಉದ್ಘಾಟನ ಕೊರನು ಉಲಯತಾಲೆ.
ಮಾಜಿ ಶಾಸಕ ಗಂಗಾಧರ ನಾಗೇಶ ಶೇಟ್ ತಾನ್ನಿ ಉಲೋನು “ಚರಡುವಾಂಕ ಸಂಸ್ಕಾರ, ಸಂಸ್ಕೃತಿ ಪರಂಪರೆಚೆ ಮಾಹಿತಿ ತಾಂಗೆಲೆ ಜೀವನಾಂತು ಆವಯಿ-ಬಾಪಯಿನ ಶಿಖಯಕಾ, ತಾನ್ನಿ ಶಿಕ್ಪಣಾಂತು ಉನ್ನತ ಸ್ಥಾನಾಕ ಪಾವಚಾಕ ಪೋಕಾಂಗೆಲೆ ಜವಾಬ್ದಾರಿ ವರೇನ ಆಸ್ಸಾ ಮ್ಹಳ್ಳೆ.
ಪ್ರತಿಷ್ಠಾನದ ಸಂಸ್ಥಾಪಕ ಡಾ.ನಲ್ಲೂರು ಅರುಣಾಚಲ ಎನ್.ರೇವಣಕರ್ ತಾಂಗೆಲೆ ಅಧ್ಯಕ್ಷ ಪಣಾಂತು ಹೇ ಕಾರ್ಯಕ್ರಮ ಚಲ್ಲೆ. ಗೋಂಯ್ಚೆ ಮಾಪುಸಾಚೆ ಜಿಲ್ಲಾ ಆನಿ ಸೆಷನ್ಸ್ ನ್ಯಾಯಾಧೀಶ ಜಾಲೀಲೆ ಶ್ರೀರಾಮ್ ಸುಬ್ರಾಯ್ ಪ್ರಭು ದೇಸಾಯಿ, ಪ್ರತಿಷ್ಠಾನಾಚೆ ಅಧ್ಯಕ್ಷೆ ಪ್ರೇಮಾ ಅರುಣಾಚಲ ಎನ್.ರೇವಣಕರ್, ದೈವಜ್ಞ ಬ್ರಾಹ್ಮಣ ಸಮಾಜಾಚೆ ಅಧ್ಯಕ್ಷ ಪ್ರಶಾಂತ್ ವಿಶ್ವನಾಥ್ ವರ್ಣೆಕರ್ ಸಭಾಂತು ಉಪಸ್ಥಿತ ವರಲೀಲೆ.
ಸಾಯಿಶ್ರೀ ಸುಧೀಂದ್ರ ವರ್ಣೆಕರ್ ಪ್ರಾರ್ಥನಾ, ಕವಿತಾ ಗುರುಪ್ರಸಾದ್ ತಾಕೂನು ಯೇವ್ಕಾರ, ಸಾಲಿಗ್ರಾಮ ಗಣೇಶ ಶೆಣೈ ತಾಂಗೆಲೆ ತಾಕೂನು ಕಾರ್ಯಕ್ರಮ ನಿರೂಪಣ ಚೋಲ್ನು ಅಖೇರಿಕ ನಲ್ಲೂರು ಲಕ್ಷ್ಮಣ್‌ರಾವ್ ತಾನ್ನಿ ಆಬಾರ ಮಾನಲೆ. ಹೇ ವೇಳ್ಯಾರಿ ರಾಜ್ಯಾದ್ಯಂತ ತಾಕೂನು ಆಯಲೀಲೆ ಸುಮಾರ ೧೫೦ ವಿದ್ಯಾರ್ಥ್ಯಾಂಕ ಪುರಸ್ಕಾರ ಕೆಲ್ಲೆ.