ತಿರುಮಲೇಶು ಮ್ಹಳಯಾರಿ ತಿರುಪತಿ ವೆಂಕಟರಮಣು, ಕಲಿಯುಗಾಚೆ ಕಲ್ಪವೃಕ್ಷು, ದೇಹಿ ಮ್ಹೊಣು ಆಯ್ಯಿಲ್ಯಾಲೆ ಸಕ್ಕಡ ಕಷ್ಟ ನಿವಾರಣ ಕೊರಚೆ ಕೃಪಾಮೂರ್ತಿ. ದೇವು ಕಿತ್ಲಕಿ ಭಕ್ತಾಂಕ ಕಷ್ಟದಿತ್ತಾ, ಕಷ್ಟ ಆಯ್ಲೆ ಮ್ಹೊಣು ದೇವಾಕ ವಿಸರಚಾಕ ನಜ್ಜ ಆಮ್ಮಿ. ಆನ್ನೀಕೆ ಶೃದ್ದೇರಿ ತಾಗೇಲೆ ಉಪಾಸನ ಕೊರಕಾ. ಹಾಕ್ಕಾ ಉದಾಹರಣ ಹಾಥಿರಾಮ್ ಬಾಬಾ ಮ್ಹಣಚೆ ಶ್ರೀ ರಾಮಾಲೋಂ ನಾಮಾಧಿಕ ಭಕ್ತಾಗ್ರೇಸರು. ಮೂಲತಃ ಹಾನ್ನಿ ಉತ್ತರ ಭಾರತಾಚೊ ಸಂತ. ತಾನ್ನಿ ಪಂದ್ರಾವೇಂ ಶೇಕಡ್ಯಾಂತು ತೀರ್ಥಯಾತ್ರಾ ಕರೀತ ಶ್ರೀ ವೆಂಕಟರಮಣಾಲೆ ಕ್ಷೇತ್ರ ತಿರುಮಲಾಕ ಆಯ್ಲೆ. ಶ್ರೀ ವೆಂಕಟರಮಣಾಕ ದರ್ಶನ ಕೆಲ್ಲೆ ನಂತರ ಶ್ರೀನಿವಾಸಾಲೆ ವ್ಹಡ ಭಕ್ತ ಜಾವ್ನು ತಿರುಮಲಾಂತೂಚಿ ಆಪಲೆ ಆಶ್ರಮ ಸ್ಥಾಪನ ಕೊರನು ಥಂಯಿಚಿ ವ್ಹರಲೆ. ಹೇ ಆಶ್ರಮಾಕ ಹಾಥಿರಾಮ್ ಬಾಬಾ ಮಠ ಮ್ಹೊಣೂ ನಾಂವ ಆಯಲೆ. ಆತ್ತ ತ್ಯಾ ಮಠಾಚೆ ಆಡಳಿತ ಟಿಟಿಡಿ ಹಾನ್ನಿ ಚಲಾಯಿಸಿತಾತಿ.
ದಂತಕಾಣ್ಯಾ ಪ್ರಕಾರ ವೆಂಕಟೇಶ್ವರಾಕ ಹಾಥಿರಾಮ್ ಭಾವಾಜಿನಿಚಿ ಭಗವಾನ್ ಬಾಲಾಜಿ ಮ್ಹೊಣು ನಾಮಕರಣ ಕೆಲ್ಲೆ. ಹಾಥಿರಾಮ್ ಬಾಬಾಲೆ ಅಪರಿಮಿತ ಶೃದ್ಧಾ- ಭಕ್ತಿ, ಪ್ರೀತಿನಿ ವೆಂಕಟರಮಣ ದೇವಾಕ ಮಸ್ತ ಆನಂದ ಜಾಲ್ಲೆ. ಆನಿ ಪರಮಾತ್ಮು ಹಾಥಿರಾಮ್ ಬಾಬಾಲೆ ಮಠಾಕ ಕೆದ್ನಾಯಿ ಯವ್ನು ತಾಗೆಲೊಟ್ಟು ಪಗಾಂಚೋ (ಪಗಡೆ) ಖೇಳು ಖೆಳ್ತಾಶ್ಶಿಲೊ. ಏಕ ದಿವಸು ಖೇಳು ಮಸ್ತ ದೀರ್ಘ ಕಾಲ ಚಲ್ಲೆ; ಪ್ರತಿ ದಿವಸಾಚೆ ಪೂಜೆಕ ತೊಡೋವು ಜಾಲ್ಲೆ. ವೆಂಕಟರಮಣು ಆಪಣೇಲೆ ಏಕ ಸೋರು ಥಂಯಿಚಿ ಸೋಡ್ನು ವಚ್ಚು ಘೆಲ್ಲೊ. ಭಟ್ಮಾಮ್ಮಾನಿ ದೇವಳಾಚೆ ಬಾಗಿಲ ಕಾಡಲೆ ಸತ್ತಾ ದೇವಾಲೆ ದಾಗೀನ ಚೋರಿ ಜಾಲೀಲೆ ದೆಕ್ಕೂ ಪಡಲೆ. ಆನಿ ಖಬ್ಬರ ಏಕಳ್ಯಾ ತಾಕೂನು ಆನ್ನೇಕ್ಲ್ಯಾಕ ಕೋಳ್ನು ಸಕ್ಕಡ ಪೋರ ಘೆಲೀಲೆ ದೇವಾಲೆ ಸೋರು ಸೊಚ್ಚಾಕ ಲಾಗಲೆ. ಹೆಕ್ಕಡೆ ದೇವಾನಿ ಸೋಡ್ನು ಘೆಲೀಲೆ ಸೋರು ಹಾಥಿರಾಮ್ ಬಾಬಾಲೆ ದೋಳ್ಯಾಕ ಪಡಲೆ. ತಾನ್ನಿ ತ್ಯಾ ಪರತೂಚಾಕ ಶ್ರೀ ವೆಂಕಟರಮಣಾಲೆ ದೇವಳಾಕ ಘೆಲ್ಲೆ.
ಹಾಥಿರಾಮ್ ಬಾಬಾಲೆ ಹಾತಾಂತು ಪೋರ ಘೆಲೀಲೆ ದೇವಾಲೆ ಸೋರು ಪಳೆಯಿಲೆ ಸಕಡಾನಿ ತಾನ್ನೀಚಿ ತ್ಯಾ ಚೋರಲಾ ಮ್ಹೊಣು ಸಮಜಿಲೆ. ಆನಿ ಬಾಬಾಕ ಧೋರ್ನು ಚವಕಶೀ ಕೊರಚೆ ಖಾತೇರಿ ರಾಯಾಲೆ ಮುಖಾರ ವ್ಹರ್ನು ರಾಬಯಲೆ. ರಾಯಾನಿ ನಿಮ್ಗಿಲೀಲೆ ಸಕ್ಕಡ ಸವಾಲಾಕ ಬಾಬಾ ಕಸಲೇ ಚಲ್ಲ್ಯಾಕಿ ತಶೀಚಿ ಖರೇ ಜವಾಬ ದಿಲ್ಲೊ. ಜಾಲಯಾರೀಚಿ ತಾಗೆಲೆ ಉತ್ರಾಂಕ ರಾಯಾ ಸಹಿತ ಥಂಯಿ ಆಶ್ಶಿಲೆ ಕೋಣಯಿ ವಿಶ್ವಾಸ ದವರಲೋ ನಾ. ತ್ಯಾ ಖಾತ್ತಿರಿ ರಾಯು ಬಾಬಾಲೆ ಉತ್ರಾಚೆ ಖರೇಪಣ ಕೋಳ್ನು ಘೆವ್ಕಾ ಮ್ಹೊಣು ದೇವಾಲೆ ಸೋರು ಕಾಂಪಿಲ್ಯಾಕ ಶಿಕ್ಷಾ ಮ್ಹೊಣು ಬಾಬಾಲೆ ಘಽರ ಭೊರನು ಕಬ್ಬು ಭೊರಚಾಕ ಆಪಣೇಲೆ ಸೇವಕಾಂಕ ಆದೇಶ ಕೆಲ್ಲೊ. ಮಾಗಿರಿ ಸೂರ್ಯಾನಿ ಉದ್ದೆಚೆ ಪಯಲೆ ತ್ಯಾ ಸಕ್ಕಡ ಕಬ್ಬು ಬಾಬಾನಿ ಏಕಳ್ಯಾನಂಚಿ ಕಾವಕಾ ಮ್ಹೊಣು ಕರಾರ ಕೆಲ್ಲೊ.ಖಾಯ್ನಾ ಜಾಲಯಾರಿ ದುಸರೋ ಶಿಕ್ಷಾ ಫಾಯಿ ನಿಕ್ಕಿ ಕರತಾ ಮ್ಹಳ್ಳೊ ಆನಿ ಬಾಬಾಲೆ ಘರಾ ಭಿತರಿ ಕೊಣೇಯಿ ರಿಗನಾಶಿ ಪಳಯಚಾಕ ಘರಾಚೆ ಸಗಳೇ ವಟೇನ ಕಠೀಣ ಜಾಲೀಲೆ ಬಂದೋಬಸ್ತ ಕರೈಲೊ. ಸಂತಾ ವಯ್ರಿ ಪಾಪ… ಪುಣ್ಯ ಲೆಕಚೆ ಖಂಚೇ ಮನುಷ್ಯಾಕ ಹಾಥಿರಾಮ್ ಬಾಬಾಕ ಮದತ್ ಕೊರಚಾಕ ಜಾವಚಾಕ ನಜ್ಜ ಮ್ಹಣಚೆ ರಾಯಾಲೆ ವಿಚಾರು ಜಾವ್ನಾಶ್ಶಿಲೆ.
ಜಾಲಯಾರಿ ಬಾಬಾಕ ಹೇ ಖಂಚೇ ವಯರೀಚಿ ಧ್ಯಾಸ ನಾಶ್ಶಿಲೆ. ತೋ ಆಪಣಾಲೆ ಇಷ್ಟದೇವು ವೆಂಕಟೇಶ್ವರಾಲೆ ಜಪಚಾಂತೂಚಿ ಬುಡ್ಡೂನು ಘೆಲೀಲೊ. ಶೃದ್ಧಾ-ಭಕ್ತೀನಿ ತಾಗೆಲೆ ಧ್ಯಾನ ಕರತಾಚಿ ರಾಯಾಲೆ ದರಬಾರಾಚಾನ ಯವ್ನು ನಿದ್ದೊನು ಸೊಡಲೊ. ನಿದ್ದೆಂತು ವರೇನ ತೋಂ ಶ್ರೀ ವೆಂಕಟರಮಣಾಲೆ ನಿರಂತರ ಧ್ಯಾನ ಕರತಾಚಿ ಆಶ್ಶಿಲೊ. ಲೋಕಾಂಕ ಸಕ್ಕಡ ದಿಸಲೆ “ಏಕ ಕೂಡಾ ಭಿತ್ತರಿ ಆಶ್ಶಿಲೆ ಕಬ್ಬೂ ಏಕ ರಾತ್ತಿ ಭಿತ್ತರಿ ಕಾವ್ಚೆ ಮ್ಹಳಯಾರಿ ತ್ಯಾ ಚರಡಪಣವೇ? ಬಕಾಸುರ, ತಾಕ್ಕಾ ಮಾರಲೀಲೊ ಭೀಮಸೇನಾಯ ಜಾಯಸನಾ. ಖಂಡಿತ ಫಾಯಿ ರಾಜದರಬಾರಾಂತು ಬಾಬಾಕ ಚಾಪಕಾನ ಮಾರಪ (ಚಾಟಿಯೇಟು) ಜಾಂವೊ ಕಾಳ್ಕಾ ಕೂಡಾಚೆ ಶಿಕ್ಷಾ ಖಂಡಿತ ಮ್ಹೊಣು ಉಲೋನು ಘೆತ್ತಾತಿ. ಕೆಲವ ಲೋಕ ತಾಗೆಲೆ ಘರ್‍ಚೆ ಸರವಳೆಂತು ಬಾಬಾ ಕಾಂಯತರಿ ಮ್ಯಾಜಿಕ್ ಕರತವೇ ಮ್ಹೊಣು ಹಣಕೂನು ಪಳಯತಾತಿ. ದೇವಾಲೆ ಧ್ಯಾಸ ಏಕ ಸೋಡ್ನು ಬಾಬಾ ಆನಿ ಕಸಲೇ ಕರತಾ ನಾಶ್ಶಿಲೊ. ಫಾಯಿ ಬಾಬಾಕ ಶನ್ನೀಕೆ ವ್ಹಡ ಶಿಕ್ಷಾ ಗ್ಯಾರಂಟಿ ಮ್ಹೊಣು ಯವಜಿತಾ ತಾಂಗತಾಂಗೆಲೆ ಘರಾಕ ವಚ್ಚುನು ನಿದ್ದೆಲೆಂ.
ಸಕಡಾನಿ ನಿದ್ದೊನು ಜಾಲ್ಲ ಮಾಗಿರಿ ಬಾಬಾಲೆ ಘರಾ ಭಿತ್ತರಿ ಅಚಾನಕ್ ಜಾವನು ವ್ಹಡ ಏಕ ಧಂವೆ ಹಸ್ತಿ ಆಯಲೆಂ. ಆನಿ ಸಕ್ಕಡ ಕಬ್ಬು ಖಾವ್ನು ಕೋಣಾಲೆ ದೋಳ್ಯಾಕ ದಿಸನಾಶಿ ಘೆಲ್ಲೆ. ಹೆರ್‍ದೀಸು ಸಕ್ಕಾಣಿ ಹೇ ವಿಷಯು ಕಳ್ಳಿಲೊ ರಾಯು ಮಸ್ತ ಆಶ್ಚರ್ಯ ಪಾವಲೊ. ಹಸ್ತಿ ಯವ್ನು ಕಬ್ಬು ಖಾವ್ನು ಘೆಲ್ಲ್ಲಾ ಮ್ಹಣಚಾಕ ಖಂಯಿಚಿ ತಾಜ್ಜೆ ಪಾಯ್ಯಾ ಪಾವಲೀಚೆ ಗುರ್‍ತೂ ವರೇನ ನಾಶ್ಶಿಲೆ. ಹಾಜೇನ ರಾಯಾಲೆ ದೋಳೆ ಉಗಾಡ್ಲೆ. ತಾನ್ನಿ ಸಾಂಗಿಲೆ ಸತ್ಯ ಮ್ಹಣಚೆ ಖಾತ್ರಿ ಜಾಲ್ಲೆ. ಆನಿ ಹಾಥಿರಾಮ ಬಾಬಾ ಮಹಾಭಕ್ತು ಮ್ಹಣಚೆ ರಾಯಾಲೆ ಆನಿ ಲೋಕಾಂಗೆಲೆ ಕಳೀತಾಕ ಆಯ್ಲೆ. ಆಪಲೆ ಭಕ್ತಾಗ್ರೇಸರಾಕ ರಾಕಚಾಕ ಆನಿ ತಾಗೆಲೆ ಕೀರ್ತಿ ಸಕ್ಕಡೆ ಪಸರಚೆ ವರಿ ಕೊರಚಾಕ ಪರಮಾತ್ಮಾನಂಚಿ ಹೇ ಸಕ್ಕಡ ಘಟನಾ ಚೊಲ್ಚೆ ವರಿ ಕೆಲ್ಲೆ ಮ್ಹೊಣು ಸಮಜೂನು ರಾಯು ಹಾಥಿರಾಮ ಬಾಬಾಲೆ ಮ್ಹಾಪಿ ಮಾಗಲೊ. ತಾಕ್ಕಾ ಸನ್ಮಾನಾಧಿಕ ಕೊರನು ಗೌರವ ದಾಖಯಲೊ. ತಾಜ್ಜ ಉಪರಾಂತ ಹಾಥಿರಾಮ್ ಬಾಬಾಂಗೆಲೆ ಕೀರ್ತಿ ಸಕ್ಕಡೆ ಪಾವನು ತಾನ್ನಿ ಮಸ್ತ ಕೀರ್ತಿವಾನ ಜಾಲ್ಲೆ.