ತಸ್ಮಾತ್ ದುಃಖಾತ್ಮಕಂ ನಾಸ್ತಿ ನ ಚ ಕಿಂಚಿತ್ಸುಖಾತ್ಮಕಂ|
ಮನಸಃ ಪರಿಣಾಮೋಽಯಂ ಸುಖದುಃಖಾದಿಲಕ್ಷಣಃ||
ಕಸಲೇಯಿ ದುಖ್ಖಾಃಕ ಜಾಂವೊ ಸುಖಾಕ ಖಂಚೇಯಿ ಕಾರಣ ನ್ಹಂಹಿ. ಸುಖದುಖ್ಖಃ ಮನಾಚೆ ಫಲಿತಾಂಶ ವಯ್ರಿ ಅವಲಂಬನ ಜಾವ್ನು ಆಸ್ತಾ. – ವಿಷ್ಣು ಪುರಾಣ ೨-೬-೪೭
ಏಕ ಜಾಡಾಂತು ಫುಲ್ಲಿಲೆ ಫುಲ್ಲಾಕ ಪಳಯಿಲ ತೆದ್ದನಾ ಆಮ್ಗೆಲೆ ಮನಾಕ ಮಸ್ತ ಆನಂದ ಜಾತ್ತಾ. ತಶೀಚಿ ಕೋಣತರಿ ಖೂನಿ ಕೆಲೀಲೆ ಪಳಯಿಲ ತೆದ್ದನಾ ಜಾಂವೊ ಮಾರಾಮಾರಿ ಪಳಯಿಲ ತೆದ್ದನಾ ಭಯಿ ದಿಸ್ತಾ. ದುಡ್ಡು ಆಯ್ಯಿಲ ತೆದ್ದನಾ ಆನಂದ ಜಾತ್ತಾ, ದುಡ್ಡು, ಸಂಪತ್ತಿ, ಮುನಾಪೋ ಆಯ್ಯಿಲ ತೆದ್ದನಾ ಆನಂದ ಜಾತ್ತಾ. ಲುಕ್ಸಾನ, ರೋಗ, ಆತಂಕ ಆಯ್ಯಿಲ ತೆದ್ದನಾ ಭಯಿ ದಿಸ್ತಾ. ಕೆಲವ ಲೋಕಾಂಕ ಭಯಿ ಆಯಲೇರಿ ತ್ಯಾ ಆತ್ಮಹತ್ಯಾಂತು ಮುಕ್ತಾಯ ಜಾವಚಾಕ ಪುರೊ.
ಕರೋನಾ ಉಪರಾಂತ ಮನೀಷು ಸಬಾರ ಸಮಸ್ಯೆಕ ಶಿರಕೂನು ವಳವಳ್ತಾ ಆಸ್ಸಾ. ತಾಂತು ಮುಖೇಲ ಜಾಲೀಲೆ ಮ್ಹಳಯಾರಿ ಭಯಿ. ಭಯಾಂತು ಪ್ರಮುಖ ಜಾವ್ನು ತೀನಿ ನಮೂನ್ಯಾಚೆ ಭಯಿ ಆಸ್ಸಾ ಮ್ಹೊಣು ವಿಜ್ಞಾನಿ ಲೋಕ ಸಾಂಗತಾತಿ. ತ್ಯಾ ಮ್ಹಳಯಾರಿ ಪಶು, ಪಕ್ಷಿ ಖಾತ್ತರಿ ಭಯಿ(ಎನಿಮಲ್ ಫೋಬಿಯಾ), ಮನಾಂತುಲಿ ಭಯಿ (ಮೆಂಟಲಿ ಫೋಬಿಯಾ) ಆನಿ ಪದಾರ್ಥ ತಾಕೂನು ಯವಚೆ ಭಯಿ (ಹೈಡ್ರೋಫೋಬಿಯಾ). ಹಾಂತೂಯಿ ಪರತ ವೆಗವೆಗಳೆ ಭಯಿ ಆಸ್ಸಾ. ಪಶು, ಪಕ್ಷಿಂಗೆಲೆ ಭಯೆಂತು ವಾಘು, ಚೀತಾ, ಸಿಂಹಾ ಇತ್ಯಾದಿ ಕ್ರೂರ ಪಶುಂಗೆಲೆ ಭಯಿ, ಜರಲೊ, ದಿವಡೊ, ಪಕ್ಷಿ ಇತ್ಯಾದಿ ಭಯಿ ಆಸಲೇರಿ, ಮನಾಂತುಲಿ ಭಯೆಂತು ಮೊರಚೆ ಭಯಿ, ಏಕಾಂಗಿ ಮ್ಹಣ್ಚೆ ಭಯಿ, ಗರೀಬ ಜಾತ್ತ ಕಿತ್ಕಿ, ರೋಗಿಸ್ಟ ಜಾತ್ತ ಕಿತ್ಕಿ, ಕೋಣಯಿ ನಾಂತಿ ಜಾಲ್ಯಾರಿ ಮ್ಹಣ್ಚೆ ಭಯಿ, ಆದಿ ಆಸ್ಸಾ. ತಶೀಚಿ ಪದಾರ್ಥ ವಯಚೆ ಭಯ್ಯಾಂತು ಉದಕಾ ಭಯಿ, ಉಜ್ಜೇ ಭಯಿ, ರಾನ್ನಾ ಭಯಿ, ಶಬ್ಧಾ ಭಯಿ, ಘರ ಪಡಲಾರಿ ಮ್ಹಣ್ಚೆ ಭಯಿ ಆದಿ ಎತ್ತಾ.
ಭಯಿ ಮನೀಷಾಕ ಉದರ್ಗತಿಕ ವ್ಹರ್ನಾ ಅಧೋಗತಿ ಬಗಲೇನ ಚಲಯತಾ. ಭಯಿ, ದುಃಖ, ಅಜ್ಞಾನ, ಅನಾರೋಗ್ಯ ಆದಿ ಸಕ್ಕಡ ನಕಾರಾತ್ಮಕ ವಿಷಯ ಏಕ್ಪಂತ ಆಮ್ಗೆಲೆ ಭಿತ್ತರಿ ರಿಗಲೆ ಮ್ಹಳಯಾರಿ ತ್ಯಾ ವೃದ್ಧಿ ಜಾತ್ತಾಚಿ ವತ್ತಾ. ಕಶ್ಶಿ ಸ್ಪರ್ಶ(ಪರುಷ) ಮಣಿಕ ಕಸಲೇ ಲಾಗಲೇರಿಚಿ ತ್ಯಾ ಭಾಂಗಾರ ಜಾತ್ತಾಕಿ ತಶೀಚಿ ನಕಾರಾತ್ಮಕ ವಿಷಯ ಅಖೇರಿಕ ಭಯಿ ಜಾತ್ತಾ. ಜೀವನಾಚೆ ಸಕ್ಕಡ ಅಪಜಯ, ದುಃಖಾಕ ಹೇ ಭಯಿ ಕಾರಣ ಜಾತ್ತಾ. ಭಯಿ ಜಾಂವೊ ಅಶಾಂತಿ ಯವಚೆ ಅಜ್ಞಾನಾನಿ. ಪಯಲೆ ಆಮ್ಮಿ ಹೇ ಕಳೀತಾಕ ಹಾಡ್ನು ಘೆವ್ಕಾ.
ಮನೀಷು ಮಹತ್ವಾಕಾಂಕ್ಷಿ. ಕೆದನಾಂಯಿ ತಾಗೆಲೆ ಮನಾ ಭಿತ್ತರಿ ಆಪ್ಪಣ ಹೇ ಜಗಾಂತೂ ಶ್ರೇಷ್ಠ ಜಾವ್ಕಾ ಮ್ಹಣಚೆ ಆಶಾ ಪ್ರಜ್ವಲಿತ (ಜಳ್ತಾ) ಆಸ್ತಾ. ಹೇ ಮೂಲತಃ ಆತ್ಮಾಚೆ ಇಚ್ಛಾ. ಆತ್ಮ ಹೇ ಅಣು, ರೇಣು, ತೃಣ, ಕಾಷ್ಟಾಂತು ಘುಸ್ಸೂನು ಆಸ್ಸುಚೆ ಚೈತನ್ಯದಾಯಕ ಪುರುಷಾಲೆ(ಪರಮಾತ್ಮಾಲೆ) ಅಂಶ. ಚರಡಾಕ ಕೆದನಾಂಯಿ ಅವಯಿಲೆಚೆ ಧ್ಯಾಸು ಆಸ್ಸುಚೆ ವರಿ ಆತ್ಮಾಕ ಪರಮಾತ್ಮಾಲೇಚಿ ಧ್ಯಾಸು. ಕಿತಯಾಕ ಮ್ಹಳಯಾರಿ ಆತ್ಮಾಚೆ ಗಮ್ಯಸ್ಥಾನ ಪರಮಾತ್ಮುಚಿ ಜಾವ್ನಾಸ್ಸಾ. ಅಖೇರಿಕ ಆಮ್ಮಿ ಲೌಖಿಕ ಜೀನಾಂತು ಅರಿಷಡ್ವರ್ಗಾಚೆ ಬಲೇಂತು ಪೋಡ್ನು ಸಂಪತ್ತಿ, ಕೀರ್ತಿಚಿ ಶ್ರೇಷ್ಠ ಮ್ಹೊಣು ಸಮಜಿತಾತಿ.
ಉಪರ್ಯುಪರಿ ಲೋಕಸ್ಯ ಸರ್ವೋ ಭವಿತುಮಿಚ್ಪಮಿ|
ಯತತೇ ಚ ಯಥಾಶಕ್ತಿ ನ ಚ ತದ್ವರ್ತತೇ ತಥಾ||
ಹೇ ಸುಭಾಷಿತಾಂತು ಸಕ್ಕಡ ಲೋಕ ಜಗಾಕ ಮೀರೂನು ವಯರ ವಯರಿ ವಚಕಾ ಮ್ಹೊಣು ಯವ್ಜಿತಾತಿ; ಆಪಣೇಲೆ ಶಕ್ತಿ ಮೀರೂನು ಪ್ರಯತನ ಕರತಾತಿ. ಜಾಲಯಾರಿ ತಶ್ಶಿ ಮಾತ್ರ ಜಾಯ್ನಾ.
ಅಪತ್ಯಂ ಮೇ ಕಳತ್ರಂ ಧನಂ ಮೇ ಬಾಂಧವಾಶ್ಯ ಮೇ| ಜಲ್ಪಂತಮಿತಿ ಮರ್ತ್ಯಾಜಂ ಹಂತಿ ಕಾಲವೈಕೋ ಬಲಾತ್||
ಮ್ಹೊಣು ಗರುಡ ಪುರಾಣಾಂತು ಸಾಂಗಿಲ ವರಿ ಆಪಣೇಲೆ ಬಾಯ್ಲ, ಆಪಣೇಲೆ ಚರಡುಂವ, ಆಪಣೇಲೆ ಸೊಯರೆ ಮ್ಹೊಣು ಒದರತಾ (ಗರ್ವಪಾವತಾ) ಆಸ್ಸುಚೆ ಮನೀಷು ಮ್ಹಣಚೆ ಬೋಕಡೀಕ ಕಾಲ(ವಿಧಿ) ಮ್ಹಣಚೆ ರಾನ್ಸೂಣೇ(ತೋಳ) ಬಲತ್ಕಾರ ಜಾವ್ನು ಮಾರನು ಕಾಡತಾ.
ಹೇ ವಾಜ್ಜಿತಾನಾ ಜೀವನಾಂತು ದುಡ್ಡು, ಕೀರ್ತಿ, ಸಂಬಂಧ ಸಕ್ಕಡಾ ಪಶಿ ವಿಂಗಡ ಮಹತ್ವಾಚೆ ಕಸಲ್ಕಿ ಆಸ್ಸಾ ಮ್ಹಣಚೆ ಖಾತ್ರಿ ಜಾತ್ತಾ. ತ್ಯಾಂಚಿ ಆನಂದ. ಆನಂದಾಕ ಜ್ಞಾನ ಮಾರ್ಗ ಜಾಲಯಾರಿ ಆನಂದಾ ತಾಕೂನು ಮೆಳ್ಚೆ ಶಾಂತಿ. ಜ್ಞಾನಿ ಲೋಕಾಂಕ ಆನಂದ ತನ್ಮೂಲಕ ಶಾಂತಿ ಮೆಳೀಲೆ ಜಾಲಯಾರಿ ಖಂಡಿತ ತಾಂಗೆಲೆ ಜ್ಞಾನ ಚ್ಹಡ ಜಾತ್ತಾ ವತ್ತಾ. ತ್ಯಾಂಚಿ ವೇಳ್ಯಾರಿ ಅಜ್ಞಾನ ಕಮ್ಮಿ ಜಾತ್ತಚಿ ವತ್ತಾ. ಶಾಂತಿ ಮ್ಹಳಯಾರಿ ತಾಂತು ಚ್ಹಡ ಕಮ್ಮಿ ಜಾವಚೆ ಮ್ಹೊಣು ಆಸ್ಸನಾ. ಸಮುದ್ರಾ ಭಿತ್ತರಿ ಕೋಟಿಗಟ್ಲೆ ಜೀವು ಹೆಕ್ಕಡೆ ತೆಕ್ಕಡೆ ಪಿರ್ತಾ ಆಸತಾತಿ. ರತ್ನ, ಮೋತಿ, ಪೆಟ್ರೋಲ್ ತಸ್ಸಾಲೆ ಕಿಮ್ಮತ್ತಾಚೆ ಪದಾರ್ಥ ತಾಜ್ಜ ಭಿತ್ತರಿ ಆಸತಾ. ಜಾಲಯಾರಿಚಿ ತಾಜ್ಜೆ ತಟಾರಿ ರಾಬ್ಬೂನು ದೆಕಲೇರಿ ತ್ಯಾ ಶಾಂತ ಜಾವ್ನು ಆಸ್ಸುಚೆ ಆಮಕಾ ದೆಕ್ಕುಪಡ್ತಾ. ತಶೀಚಿ ಭಿತ್ತರಿ ಕಿತ್ಲೇಚಿ ದುಃಖ, ಧೂಖಿ ಆಸಲೇರಿಚಿ ಶಾಂತ ಮನಾಂತು ಆಸ್ಸುಚೆ ಪ್ರಯತನ ಕೊರಕಾ.
ತಾಜ್ಜ ಖಾತ್ತಿರಿ ಪಯಲೆ ಜಾವನು ಕೋಪು ಸೊಡಕಾ. ಕೋಪು ಜಾಂವೊ ರಾಗು ಹೇ ಆಮ್ಗೆಲೆ ಜೀವನಾಂತು ಜಾವಚೆ ಸಕ್ಕಡ ಅನರ್ಥಾಕ ಕಾರಣ. ಆಮಕಾ ಮನ ಆನಿ ಶರೀರ ವೆಗಳೆ ವೆಗಳೆ ಮ್ಹಣಚೆ ಗೊತ್ನಾ. ಕಿತಯಾಕ ಮ್ಹಳಯಾರಿ ತಾಕ್ಕಾ ರೂಪ ನಾ. ಜೋಡಿಲೆ ಪೂರಾ ದುಡ್ಡು ಖರ್ಚಿತಾಲೊ ಕೆದನಾಂಯಿ ಶ್ರೀಮಂತು ಜಾಯ್ನಾ. ತಶೀಚಿ ಮನಾಂತು ಆಯ್ಯಿಲೆ ಸರ್ವ ವಿಷಯು ಕಾರ್ಯರೂಪಾಕ ಹಾಡತಲೊ, ಉಲಯತಲೊ ಜ್ಞಾನಿ ಜಾಯನಾ. ಮನ ಮ್ಹಣಚೆ ಭಾವನೆಂಕ ಉಟ್ಕರೋಚೆ ಜಾಂವೊ ವಿಚಾರ ಮ್ಹಣಚೆ ಕಚ್ಚಾ ಪದಾರ್ಥ ತಯಾರ ಕೊರಚೆ ಸಾಧನ. ತ್ಯಾ ಕಚ್ಚಾಪದಾರ್ಥ ಆಯ್ಯಿಲೆ ತಶೀಚಿ ಪ್ರತಿಕ್ರಿಯಾ ದಾಖಯಲಾರಿ ಖಂಡಿತ ಯಶ ಮೇಳ್ನಾ. ತ್ಯಾ ಭಾವನಾ ಬುದ್ಧಿ ಮ್ಹಣಚೆ ಪ್ಯಾಕ್ಟರಿಂತು ಶುದ್ಧ ಜಾವ್ನು ಚಲಾವಣೆಕ ತಯಾರ ಜಾವ್ಕಾ. ತೆದನಾಂಚಿಚಿ ಆಮ್ಗೆಲೆ ಖಂಚೆಯಿ ಗೊಂದಳಾಕ ಶಿರಕನಾಂಚಿ ಮನೀಷು ಜೀವನಾಂತು ಪಾರಜಾತ್ತಾ.
ಹೇ ಪಿಂಡಾಂಡಾಂತು ಪ್ರಕೃತಿ ತಿತ್ಲೆ ವ್ಹಡ ಗುರು ವಿಂಗಡ ಕೋಣ ನಾ; ಖಂಚೇಯಿ ನಾ. ಶಿಕ್ಷಕ ವರಿ, ಭಾಷಣಕಾರ ವರಿ ತ್ಯಾ ಆಪಣಾಲೆ ಬೋಧನಾ ತೊಂಡಾಂತು ಸಾಂಗ್ನಾ. ವೆಗಳೆ ಉದಾಹರಣೆ ಮೂಖಾಂತರ ದಾಖಯತಾ. ಸೂರ್ಯ ಪ್ರತಿಫಲಾಪೇಕ್ಷೆ ನಾಶಿ ಹುಜವಾಡು, ವಾತ ದಿತ್ತಾ, ರೂಕು ಉದ್ದಾಕ ಘಾಲೋ, ಕಾಂಡೂನು ವ್ಹರೋ, ಪಾತ್ತೊರು ಮಾರೊ ಫಳ ದಿವಚೆ ಚುಕ್ಕೇನಾ, ನ್ಹಂಹಿ ತಾನ ಮ್ಹೊಣು ಆಯ್ಯಿಲೆ ಸಕಡಾಂಕ ದುಡ್ಡು ನಿಮಿಗಿನಾಶಿ ಉದ್ದಾಕ ದಿತ್ತಾ. ಹೇಂಚಿ ಪ್ರಕೃತಿಚೆ ನೇಮು. ಹ್ಯಾ ಕೋಳ್ನು ಘೆತ್ತಿಲೊ ಜೀವನಾಂತು ಕೆದನಾಂಯಿ ಕಷ್ಟಾಕ ಶಿರಕನಾ. ನಿಸರ್ಗಾಚೆ ಹರ್ಯೇಕ ಪದಾರ್ಥಾಕ ಜಡ ಪದಾರ್ಥಾಕ ಪಳೇಯಾ. ತ್ಯಾ ದುಸರ್ಯಾಲೆ ಉಪೇಗಾ ಖಾತ್ತಿರಿ ಆಸ್ತಾ. ತಸ್ಸಾಲೇಚಿ ಗೂಣ ಪಶುಂತು ಗಾಂಯ್ಕ ಆಸ್ಸಾ. ಮ್ಹೊಣೂಯಿ ಆಮ್ಮಿ ಗಾಂಯ್ಕಗೋಮಾತೆ ಮ್ಹೊಣು ಆಪಯತಾತಿ. ವರಸಾಕ ಏಕ್ಪಟಿ ದೀಪಾವಳಿ ಪರಭೆಂತು ಗೋಪೂಜಾ ಕೊರನು ತಿಕ್ಕಾ ಕೃತಜ್ಞತಾ ಪಾವಯತಾತಿ. ಫಲಾಪೇಕ್ಷೆ ನಾಶಿ ಬಹುಜನೋಪಯೋಗಿ ಜಾವಚೆ ಖಂಚೇಯಿ ಪದಾರ್ಥ ಪೂಜ್ಯ ಜಾತ್ತಾ. ತಾಜ್ಜೆ ಗೂಣಾನಿಂಚಿ ತಾಕ್ಕಾ ತ್ಯಾ ಗೌರವು ಪ್ರಾಪ್ತ ಜಾತ್ತಾ.
ಜಾಲಯಾರಿ ಮನೀಷು ಅರಿಷಡ್ವರ್ಗ ಕಾರಣಾನಿ ಆಪ್ಪಣಚಿ ನಾನಾ ನಮೂನ್ಯಾಚೆ ಅಹಂ, ಗಮಂಡಿಪಣಾಚೆ ಭಾವನೇಕ ಶಿರಕೂನು ಜೀವನಪೂರ್ತಿ ನಿಸರ್ಗಾಚೆ ಗೌರವ ತಾಕೂನು ವಿಮುಖ ಜಾತ್ತಾತಿ. ಅಗತ್ಯ ನಾಶಿ ಕಷ್ಟ, ದುಖ್ಖಃ ಭೊಗತಾತಿ. ಹೇ ಕಶ್ಶಿ ಮ್ಹಳಯಾರಿ ಸೋರೊ ಪಿವಚೆ, ಗುಟಕಾ ಕಾವಚೆ ತಾಕೂನು ಶರೀರಾ ವಯರಿ ನಾನಾ ನಮೂನ್ಯಾಚೆ ವಾಯಟ ಪರಿಣಾಮ ಜಾತ್ತ ಮ್ಹೊಣು ಸಕಡಾಂಕ ಗೊತ್ತಾಸ್ಸ. ಜಾಲಯಾರೀಚಿ ಅಸ್ಸಾಲೆ ಚಟಾಕ ಪೋಡ್ನು ಕೇಸ ಪಿಕಚೆ ಪಶಿ ಪಯಲೇಚಿ ಯಮಧರ್ಮರಾಯಾಲೆ ಸೊಯರೆ ಜಾವ್ನು ವಚ್ಚೆ ಲೋಕ ಜಗಾಂತು ಕೋಟಿಗಟ್ಲೆ ನಾಂತಿವೇ?
ಮನೀಷಾಕ ಕರ್ಮ ಬಂಧನ ಆಸ್ಸಾ. ತಾಕ್ಕ ಅನುಸಾರ ತಾಜ್ಜೆ ಫಲ ವರೇನ ತಾಕ್ಕಾ ಪ್ರಾಪ್ತ ಜಾತ್ತಾ. ಲ್ಹಾನ ಕಾಮ ಕರ್ತಲ್ಯಾಕ ಥೊಡೊ ದುಡ್ಡು ಆಯಲೇರಿ ವ್ಹಡ ವ್ಹಡ ಕಾಮ ಕರ್ತಲ್ಯಾಕ ವ್ಹಡ ಪ್ರಮಾಣಾರಿ ಮುನಾಪೋ ಪ್ರಾಪ್ತ ಜಾತ್ತಾ. ಬರಪೂರ ಉದ್ದಾಕ ಯವ್ನು ಥಂಳೆ ಭರಲೆ ಮಾಗಿರಿ ಉದ್ದಾಕ ವೊಕ್ಕೂನು ಭಾಯ್ರಿ ವತ್ತಾ, ತಶೀಚಿ ನಂಯೆಂತು ಉವಾರೋ ಆಯ್ಯಿಲ ತೆದ್ನಾ ವರೇನ ತಶೀಚಿ ಚಲ್ತಾ. ಆಪಣಾಕ ಧರಚಾಕ ಜಾಯ್ನಾತ್ತಿಲೆ ಉದ್ದಾಕ ತ್ಯಾ ದೊನ್ನೀಚಿ ಭಾಯರ ಘಾಲ್ನು ಸೊಡತಾತಿ. ತಶೀಚಿ ಗರಜ ಆಶ್ಶಿಲೆ ಪಶಿ ಚ್ಹಡ ಸಂಪತ್ತ ಆಯ್ಯಿಲ ತೆದ್ದನಾ ಗರಜ ಆಶ್ಶಿಲ್ಯಾಲೆ ಬರೇಪಣಾಕ ವಾಪರಲೇರಿ ತೆದ್ದನಾ ತ್ಯಾ ಮನೀಷಾಕ ಖಂಡಿತ ನಿಸರ್ಗ ತಾಕೂನು ಮರ್ಯಾದ ಮೆಳ್ತಾ.
ಮನಾಂತು ಆಯ್ಯಿಲೆ ಭಾವನಾ ಬುದ್ಧಿಂತು ಮಂಥನ ಜಾಲೀಲ ತೆದ್ನಾ ಆಮ್ಗೆಲೆ ಬಾಲೀಶಪಣ ಆಮಗೆಲೇಚಿ ನಜರಾಕ ಎತ್ತಾ. ತುಮ್ಮಿ ಕೋಣಾಲೆ ಪೂಣಿ ಜಗಡಚಾಕ ಪುರೊಂತಿ, ಮಾರ್ನು ಘೇವ್ನು ಆಸ್ಸುಚಾಕ ಪುರೊಂತಿ. ಜಾಲಯಾರಿ ಅಶ್ಶೀಚಿ ಬಶ್ಶಿಲ ತೆದ್ನಾ ಹಾಂವಪಣಾಚೆ ಭಾವನಾ ಬಗಲೇನ ದವರೂನು ತ್ಯಾ ಖಾತ್ತಿರಿ ಮಂಥನ ಕೊರನು ಪಳೆಯಾ. ತುಮ್ಮಿ ಕೆಲೀಲೆ ಚೂಕ ಮ್ಹಣಚೆ ವೇದ್ಯ ಜಾತ್ತಾ. ತೆದ್ದನಾ ಹಾಂವೆ ಗಪ್ ಉರಲ್ಯಾರಿ ಜಾಂವೊ ತಾಕ್ಕಾ ಮ್ಹಾಪ ಕೆಲಯಾರಿ ಮೆಗೆಲೆ ಸಂಗಟ ಊಣೆ ಜಾವ್ನು ಆನಂದ ಚ್ಹಡ ಜಾತ್ತಾಶ್ಶಿಲೆ ಮ್ಹೊಣು ದಿಸ್ತಾ. ಲಡಾಯಿ ಕರತನಾ, ಸೋವೊನು ಘೆತ್ತಾನಾ ಆಮ್ಗೆಲೆ ಬುದ್ಧಿ ಕೊಪ್ಪಾಚೆ ಹಾತ್ತಾಂತು ಆಸ್ತಾ; ತಾಜೇನ ಎದರಾಚೆಲೇಚಿ ಚೂಕಿ ಮ್ಹೊಣು ದಿಸತಾ. ತ್ಯಾಂಚಿ ಸಮಾಧಾನಾಂತು ಆಶ್ಶಿಲ ತೆದ್ನಾ ವಿವೇಕ ಜಾಗೃತ ಜಾವ್ನು ಆಮ್ಗೆಲೆಚಿ ಚ್ಹೂಕ ಮ್ಹಣಚ ವರಿ ದಾಖಯತಾ. ತ್ಯಾ ಖಾತ್ತಿರಿ ಪ್ರಪ್ರಥಮ ಜಾವನು ಆಮ್ಮಿ ಸಮಾಧಾನ ಮನಸ್ಥಿತಿಂತು ಆಸ್ಸುಕಾ. ಆನಂದ ಪಾವಚಾಕ ಹೇಂಚಿ ಪಯಲೇಚೆ ಪಾವಲೊ. ತಶಿ ಜಾಲಯಾರಿ ಮನಾಕ ಸಮಾಧಾನ ಜಾಂವೊ ಶುದ್ಧ ಕೊರಚೆ ಕಶ್ಶಿ?