ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿಚಾನ ಅಕಾಡೆಮಿ ಸಭಾಂಗಣಾಂತು ನವೆಂಬರ್ 08, 2025ಕ ‘ಕಾವ್ಯಾಂ ವ್ಹಾಳೊ-8’ ಶೀರ್ಷಿಕೇರಿ ಕವಿಗೋಷ್ಟಿ ಆಯೋಜನ ಕೆಲೀಲೆ. ಅಧ್ಯಕ್ಷ ಶ್ರೀ ಜೋಕಿಂ ಸ್ಟ್ಯಾನಿ ಆಲ್ವಾರಿಸ್ ತಾನ್ನಿ ಕಾರ್ಯಕ್ರಮಾಚೆ ಅಧ್ಯಕ್ಷಪಣ ಘೇವ್ನು ಪ್ರಾಸ್ತಾವಿಕ ಜಾವ್ನು ಉಲಯಿಲೆ. ಅಕಾಡೆಮಿ ಹರ ಮ್ಹಹಿನೋ ವೆಗವೆಗಳೆ ರಂಗಾಂತು ಸಾಧನ ಕೆಲೀಲೆ ಏಕಳೋ ಕೊಂಕಣಿ ಮನುಷ್ಯಾಕ ಗೌರವ ಪಾವಯತಾ ಆಯಲಾ. ಕವಿಂಕ ತಾಂಗೆಲೆ ಕವಿತಾ ಸಾದರ ಕೊರಚಾಕ ಅವಕಾಶ ಕೊರನು ದಿವಚೆ ಬರಶಿ ಬರೋಪಿಂಗೆಲೆ ಒಟ್ಟು ಸಂವಾದ ಚಲಾಯಿಸೂನು ತಾಂಕಾ ತಾಂಗೆಲೆ ಗುರ್‍ತು ಸಮಾಜಾಕ ಕೊರನು ದಿತ್ತಾ ಆಸ್ಸಾ. ಹೇ ಕವಿಗೋಷ್ಟಿ ಹರಯೇಕ ಕವಿಂಕ ತಾಂಗೆಲೆ ಪ್ರತಿಭಾ ಪ್ರಕಾಶನಾಕ ವೇದಿಕಾ ಜಾವನು ತಾಂಕಾ ಪ್ರೋತ್ಸಾಹ ದಿತ್ತಾ ಆಸ್ಸ ಮ್ಹೊಣು ಸಾಂಗೂನು ಸರ್ವಾಂಕ ಯೇವ್ಕಾರ ಕೆಲ್ಲೆ.
ಖ್ಯಾತ ನಾಟಕಕಾರ ತಶೀಚಿ ಚಲನಚಿತ್ರ ನಿರ್ಮಾಪಕ ಶ್ರೀ ಹೆನ್ರಿ ಡಿಸಿಲ್ವ ಹಾಂಕಾ ಹೇಂಚಿ ವೇಳ್ಯಾರಿ ಸನ್ಮಾನ ಕೆಲ್ಲಿ. ತಾನ್ನಿ ಉಲೋನು ಆಪಣೇನಿ ಕೆಲೀಲೆ ಸಾಧನಾ ದೆಕ್ಕೂನು,ಕೊಂಕಣಿ ಅಕಾಡೆಮಿನಿ ಮಾಕ್ಕಾ ಗೌರವ ದಿಲ್ಲ್ಯಾ. ತುಮಗೇಲೆ ಸಕಡಾಲೆ ಸಹಕಾರಾನಿ ಹಾಂವೆ ಕೆಲೀಲೆ ಸಿನೆಮ ಯಶಸ್ವಿ ಜಾಲ್ಲ್ಯಾ. ಮ್ಹೊಣು ಕಾರ್ಯಕ್ರಮಾಕ ದೇವು ಬರೆಂ ಕೊರೊಂ ಮ್ಹಳ್ಳೆ. ಮುಖೇಲ ಸೊಯರೆ ಜಾವನು ದ.ಕ. ಜಿಲ್ಲಾ ಕುಡುಬಿ ಸಮಾಜ ಸೇವಾ ಸಂಘಾಚೆ ಅಧ್ಯಕ್ಷ ಶ್ರೀ ಕೃಷ್ಣ ಕೊಂಪದವು ಹಾನ್ನಿಕೊಂಕಣಿ ಅಕಾಡೆಮಿಚಾನಿ ಕುಡುಬಿ ಜಾನಪದ ಸಮಾವೇಶ ಆಯೋಜನ ಕೆಲೀಲೆ ನಿಮಿತ್ತ್ಯಾನಿ, ಕುಡುಬಿ ಸಮಾಜಾಚೆ ಲೋಕಾಂಕ ತಶೀಚಿ ಸಂಘಟನೆಂಕ ಮಸ್ತ ಗರ್ವ (ಅಭಿಮಾನ) ಪಾವ್ಚೆ ವರಿ ಜಾಲ್ಲ್ಯಾ. ತ್ಯಾ ಖಾತೇರಿ ಆಪ್ಪಣ ಕೊಂಕಣಿ ಅಕಾಡೆಮಿಕ ಸಮಸ್ತ ಕುಡುಬಿ ಸಮಾಜಾಚೆ ತರಪೇನಿ ಧನ್ಯವಾದ ಪಾವಯತಾ ಆಸ್ಸಾ. ಮ್ಹಳ್ಳೆ.
ಕೊಂಕಣಿಚೆ ನಾಮಾಧಿಕ ಕವಿ, ಪೊಯೆಟಿಕಾ ಪಂಗಡಾಚೆ ಮುಖ್ಯಸ್ಥ ಶ್ರೀ ನವೀನ್ ಪಿರೇರಾ ತಾನ್ನಿ ವೆಗವೆಗಳೆ ಆಯಾಮಾಂತು ಕವಿತಾ ಬರಯಕಾ ಮ್ಹೊಣು ವಿವರಣ ದಿಲ್ಲೆ.
ಶ್ರೀಮತಿ ಐರಿನ್ ರೆಬೆಲ್ಲೊ ಹಾನ್ನಿ ಕವಿಗೋಷ್ಟಿ ಚಲೋನು ದಿಲ್ಲೆ. ಶ್ರೀ ಮಾರ್ಸೆಲ್ ಡಿಸೋಜ (ಮಾಚ್ಚಾ ಮಿಲಾರ್), ಶ್ರೀಮತಿ ಅಸುಂತಾ ಡಿಸೋಜ, ಕು. ಸೃಜನಾ ಮಥಾಯಸ್, ಶ್ರೀಮತಿ ಚಂದ್ರಿಕಾ ಮಲ್ಯ, ಶ್ರೀಮತಿ ಫ್ಲಾವಿಯಾ ಅಲ್ಬುಕರ್ಕ್, ಶ್ರೀ ರವೀಂದ್ರ ನಾಯಕ ಸಣ್ಣಕ್ಕಿಬೆಟ್ಟು, ಶ್ರೀ ಪ್ರವೀಣ್ ತಾವ್ರೊ, ಶ್ರೀ ಜೀವನ್ ಕ್ರಾಸ್ತಾ, (ಜೀವ್ ನಿಡ್ಡೋಡಿ), ಶ್ರೀ ಲ್ಯಾನ್ಸಿ ಸಿಕ್ವೇರ ಸುರತ್ಕಲ್, ಆದಿ ಲೋಕಾನಿ ತಾಂಗತಾಂಗೆಲೆ ಕವಿತಾ ವಾಚನ ಕೆಲ್ಲಿ.
ಅಕಾಡೆಮಿ ಸದಸ್ಯ ಶ್ರೀ ಸಮರ್ಥ್ ಭಟ್ ತಾನ್ನಿ ಕಾರ್ಯಕ್ರಮಾಚೆ ನಿರೂಪಣ ಕೆಲ್ಲಿ. ಸದಸ್ಯ ರೊನಾಲ್ಡ್ ಕ್ರಾಸ್ತಾ, ನವೀನ್ ಲೋಬೊ, ಅಕ್ಷತಾ ನಾಯಕ್ ಉಪಸ್ಥಿತ ವ್ಹರಲೀಲೆ.