ಪಡುತಿರುಪತಿ ನಾಮಾಂಕಿತ ಕಾರ್ಕಳ ಶ್ರೀ ವೆಂಕಟರಮಣ ದೇವಳಾಚೆ ಲಕ್ಷ ದೀಪೋತ್ಸವು ನವೆಂಬರ್ ೨೦ಕ ವಿಜೃಂಭಣೆರಿ ಚಲ್ಲೆ. ಧೋಂಪಾರಾಚೆ ಮಹಾ ಪೂಜಾ ಜಾಲ್ಲೆ ಉಪರಾಂತ ಶ್ರೀ ಶ್ರೀನಿವಾಸ ದೇವಾಕ ಸ್ವರ್ಣ ಮಂಟಪಾಂತು ಆನಿ ಶ್ರೀ ವೆಂಕಟರಮಣ ದೇವಾಕ ಸ್ವರ್ಣ ಪಾಲ್ಕಿಂತು ಬಸಕರೋನು ಭಕ್ತಗಣ ಶ್ರೀನಿವಾಸಾಶ್ರಮಾಕ ಆಯಲೆ. ಥಂಯಿ ದೇವಾಂಕ ಪಂಚಾಮೃತಾಭಿಷೇಕ, ಧಾತ್ರಿ ಹವನ, ಹರಿವಾಣ ನೈವೇದ್ಯ, ಮಹಾ ನೈವೇದ್ಯ, ಮಹಾಮಂಗಳಾರ್ತಿ ಚೋಲ್ನು ಮಾಗಿರಿ ಭೂರಿ ಭೋಜನ ಚಲ್ಲೆ. ಪರತೂನು ವನಾಚಾನ ಪೆಂಟಾಕ ಆಯ್ಯಿಲೊ ದೇವಂ ಪೆಂಟಾ ಮಧೇಚೆ ಗೋಪುರಾಂತು ಆಶೀನ ಜಾಲ್ಲೊ. ಸಮಾಜ ಬಾಂಧವ ಆನಿ ಭಕ್ತ ಲೋಕ ವ್ಹಡ ಅಂಕಡ್ಯಾರಿ ಲೈನಾರಿ ಯವ್ನು ನಾರ್‍ಲು-ಕೇಳೆ ಕೊರೊನು ದೇವಾಲೆಂ ತಾಂಗೆಲೆ ಮಾಗಣಿ ದವರೂನು ಪೂರ್ತಿ ಕೊರಚಾಕ ಪ್ರಾರ್ಥನ ಕೆಲ್ಲೆ. ದೇವಳಾಚೆ ಅರ್ಚಕ, ಮೊಕ್ತೇಸರ ಸಹಿತ ಭಕ್ತ ಬಾಂದವಾನಿ ದೇವಾಕ ಶೃಂಗಾರ ಕೊರನು, ರಾಜೋಪಚಾರ ಸೇವಾ ಪಾವೋನು ಮೆರ್‍ವಣಿಗೇರಿ ಶ್ರೀ ಶ್ರೀನಿವಾಸ ದೇವು ರಥಾರೂಢ ಜಾಲಯಾರಿ ಉತ್ಸವಮೂರ್ತಿ ಶ್ರೀ ವೆಂಕಟರಮಣ ದೇವಾನಿ ಹರ್‍ಯೇಕ ಗುರ್ಜಿಂತು ಬಸ್ಸೂನು ಪೂಜಾ ಸ್ವೀಕರ್ಲೆ.
ಉತ್ಸವು ದೇವಳಾಕ ಪಾವ್ಲೆ ಮಾಗಿರಿ ವೀರ ಮಾರುತಿ ದೇವಳಾಂತು ದೊನ್ನೀ ದೇವಾಕ ಪೂಜಾ ಚಲ್ಲೆ. ಮಾಗಿರಿ ಸ್ವರ್ಣ ಪಾಲ್ಕಿಂತು ದೊಗ್ಗಽ ದೇವಾಂಕ ಎದ್ರ ಎದ್ರ ಬಸಕರೋನು ಉತ್ಸವ, ವಸಂತ ಪೂಜಾ ಚಲ್ಲೆ. ಹೆರ್‍ದೀಸು ನ.೨೧ಕ ರಾಮ ಸಮುದ್ರಾಂತು ಅವಭೃಥ ನ್ಹಾ, ವೈಭಾವಾರಿ ಪಾಲ್ಕಿ ಉತ್ಸವು ಚಲ್ಲೆ.