ತುಮಚೋ ಅಭ್ಯಾಸ ಫಕತ ಅಂಕ ಜೊಡಚಾಕ ಮಾತ್ರ ಮಿತ ಜಾವನು ಆಸ್ಸುಚಾಕ ನಜ್ಜ. ಜ್ಞಾನ ಜೊಡಚಾಕ ವರೇನ ಪ್ರಾಧಾನ್ಯತಾ ದಿವಕಾ. ತೆದ್ನಾ ಯಶ ತುಮಕಾಂ ಸೊದ್ದುನು ಯೇತಲೇಂ ಅಶೇಂ ಮ್ಹೊಣು ಬೆಂಗಳೂರು ದೂರದರ್ಶನ ಕೇಂದ್ರಾಚೊ ನಿರೂಪಕ ಎಚ್.ರಾಜಶೇಖರ್ ತಾನ್ನಿ ಸಾಂಗಲೆ. ಆನೀ ಕ್ಷಮತಾ ಲಕ್ಷ್ಯ ಸಕಲ ದೇಂವೋವಂಕ ಫಾವನಾ, ತೀ ಸದಾಂಚ ಉಂಚ ಆಸೂಂಕ ಜಾಯ ಅಶೇಂ ಸ್ವಾಮೀ ವಿವೇಕಾನಂದಾಚೋ ಉಲ್ಲೇಖ ಕರೂನ ಸಾಂಗಲೇಂ ದಾವಣಗೆರೆಚೆ ಕಲಾಕಂಚ ಸಾಂಸ್ಕೃತೀಕ ಸಂಸ್ಥೆಚಾನ ೨೦೨೪-೨೫ ವರ್ಸಾಚೇ ಎಸ್.ಎಸ್.ಎಲ್.ಸಿ. ಪರಿಕ್ಷೇಂತ ಕನ್ನಡ ಕುವರಾ-ಕುವರೀ ಪುರಸ್ಕಾರ ಸುವಾಳ್ಯಾಚೇಂ ಉಕ್ತಾವಣ ಶೆನ್ವಾರು ಶಾಮನೂರಾಂತಲ್ಯಾ ಶಿವಶಂಕರಪ್ಪಾ ಪಾರ್ವತಮ್ಮ ಸಮುದಾಯ ಭವನಾಂತ ಕೇಲ್ಯಾ ಉಪರಾಂತ ತಾನ್ನಿ ಉಲಯತಾಲೇ. ಅಭ್ಯಾಸಾಚೇರ ಆತ್ಮವಿಸ್ವಾಸ ಆಸೂಂಕ ಜಾಯ, ಪೂಣ ಚಡ ಆತ್ಮವಿಸ್ವಾಸ ದವರಪ ಬರೋಬರ ನ್ಹಯ. ಕಷ್ಟ ಕರೂನ ಅಭ್ಯಾಸ ಕರನಾಶಿ ಫಕತ ನಶೀಬಾ(ಅದೃಷ್ಟಾ)ನ ಚಡ್ತೆ ಅಂಕ ಮೇಳತಲೇ ಅಶಿಂ ಸಮಜೂನ ಘೇವಚೇಂ ಪಿಶೇಂಪಣ, ತಶ್ಶಿ ಮೇಳೂಂಕ ಫಾವನಾ. ದರ ಏಕಾ ಅಭ್ಯಾಸಾಕ ಆಪಲೀ ಜಾಲೀಲೆ ನೌಕರಿ ಆಸತಾ ಅಶಿಂ ತಾನ್ನಿ ಸಾಂಗಲೇಂ.
ಕರ್ನಾಟಕ ಸುಗಮಾ ಸಂಗೀತ ಪರಿಷದ, ಮ್ಹೈಸೂರಚೇ ಜಿಲ್ಲಾಧ್ಯಕ್ಷ ಡಾ|| ನಾಗರಾಜ ಬೈರಿ ತಾನ್ನಿ ಉಲಯತಾ “ಕಲಾಕಂಚ ಸಂಸ್ಥೆಚಾನ ಘೆಲೀಲೆ ೩೩ ವರ್ಷಾಚಾನ ೩೫ ಹಜಾರ ಚರಡುವಾಂಕ ಸನ್ಮಾನ ಕೊರನು ಗಿನ್ನಿಸ್ ದಾಖಲೆಂತು ದಾಖಲ ಜಾವಚೆ ತಸ್ಸಾಲೆ ಕಾರ್ಯ ಕೆಲ್ಲ್ಯಾ ಮ್ಹೊಣು ತಾರೀಪು ಕೆಲ್ಲೆ. ಕಲಾಕುಂಚ ಸಂಸ್ಥೆಚೆ ಸಂಸ್ಥಾಪಕ ಶ್ರೀ ಸಾಲಿಗ್ರಾಮ ಗಣೇಶ ಶೆಣೈ, ಬಾಯಲಾಂಚೋ ವಿಭಾಗಾಚೊ ಸಂಸ್ಥಾಪಕಿ ಶ್ರೀಮತಿ ಜ್ಯೋತಿ ಗಣೇಶ ಶೆಣೈ, ಸಂಘಟನೇಚೇ ಅಧ್ಯಕ್ಷ ಕೆ.ಎಚ್. ಮಂಜುನಾಥ, ವಾಸಂತಿ ಮಂಜುನಾಥ, ಬಾಯಲಾಂಚೋ ವಿಂಗ ಅಧ್ಯಕ್ಷ ಹೇಮಾ ಶಾಂತಪ್ಪಾ ಪೂಜಾರೀ, ಕಾರ್ಯದರ್ಶಿ ಕೆ.ಸಿ. ಉಮೇಶ ಆನೀ ಹೇರ ಲೋಕ ಹ್ಯಾ ಕಾರ್ಯಕ್ರಮಾಂತು ಹಾಜೀರ ಆಶಿಲ್ಲೇ.
ನೇತ್ರವತೀ ಸಾಯಿ ಪ್ರಕಾಶ ಹೀಣೆ ಪ್ರಾರ್ಥನಾ ಕೇಲೀ, ಪುಷ್ಪ ಮಂಜುನಾಥ ಹೀಣೆ ಯೇವಕಾರ ದಿಲೋ. ಕಾರ್ಯಾವಳೀಂತ ಗಣಮಾನ್ಯ ಸೊಯರ್‍ಯಾಂಕ ಪೂರ್ಣಕುಂಭ ಯೇವಕಾರ ದಿವನು ವೇದಿಕೇರಿ ಆಪೋನು ಘೆತ್ಲೆ. ಪ್ರತಿಭಾವಾನ ಭುರಗೀಂ, ಪಾಲಕ ಆನೀ ಹೇರಾಂನೀ ಕಾರ್ಯಕ್ರಮಾಂತು ವಾಂಟೋ ಘೇತಲೋ.