ವೆಗಳೆ ಖಂಚೇಯಿ ರಾಜ್ಯಭಾಸ ಏಕಾ ರಾಜ್ಯಾಕ ಸೀಮಿತ ಆಸತ ಜಾಲ್ಯಾರ ಕೋಂಕಣೀಚೇಂ ಖಾಶೇಲ ಪಣ ಮ್ಹಳ್ಯಾರ ಪುರಾಯ ಕೋಂಕಣ ಪ್ರದೇಶಾಕ ಲಾಗೂ ಜಾವಪೀ ಭಾಸ. ಹಜಾರಾಂನೀ ಭಾಸೋ ಆನೀ ಬೋಲೀ ಆಶಿಲ್ಲ್ಯಾ ಭಾರತಾಂತ ಫಕತ ೨೨ ಭಾಶಾಂಕ ಅಧಿಕೃತ ಭಾಶೇಚೋ ದರ್ಜೋ ಮೇಳ್ಳಾ. ತಾತೂಂತ ಕೋಂಕಣೀ ಹೀ ಏಕ ಅಸೋ ಆಮಕಾಂ ಅಭಿಮಾನ ಆಸಾ. ಮಸ್ತ ಕಠಿಣ ನಿಬಂಧನಾ ಪಾರ ಕೊರನು ಸಂವಿಧಾನಾಚ್ಯಾ ಆಠವ್ಯಾ ಅನುಸುಚೀಂತ ತ್ಯಾ ಮೆಳಚಾಕ ಆಮಚ್ಯಾ ಮ್ಹಾಲ್ಗಡ್ಯಾನಿ ಖೂಬ ವಾವರೋ ಕೆಲ್ಲಾ. ಆಜಿ ಕರ್ನಾಟಕಾಂತ ಕೋಂಕಣೀ ಶಿಕ್ಷಣ, ಪದವ್ಯುತ್ತರ ಶಿಕ್ಷಣ ಆನೀ ಸಂಶೋಧನಾಕ ಅವಕಾಶ ಆಸ್ಸಾ. ತಾಚೋ ಉಪೇಗ ಕರಚೋ. ಆನೀ ಹೋ ತಂತ್ರಜ್ಞಾನಾಚೋ ಕಾಳ. ಸೋಶಲ ಮಿಡಿಯಾ ಆನೀ ಇಂಟರನ್ಯಾಟಾಚೋ ಪ್ರಭಾವೀ ವಾಪರ ಕರೂನ ಕೋಂಕಣೀ ವಿಶ್ವ ಮಟ್ಟಾಂತು ಫುಲ್ಚೆ ವರಿ ಕೊರಚಾಕ ಯುವಕಾರಾನಿ ಪ್ರಯತ್ನ ಕೊರಕಾ. ಅಶ್ಶಿ ಮ್ಹೊಣು ಪ್ರೊ. ಅರುಣ ಕಾಮತ್ ತಾನ್ನಿ ಯುವಕಾರಾಂಕ ಆಪೋವ್ಣಿ ದಿಲ್ಲಿ. ತಾನ್ನಿ ಕರ್ನಾಟಕ ಕೋಂಕಣೀ ಸಾಹಿತ್ಯ ಅಕಾದೇಮೀ ಆನೀ ಮಾಂಡಸೋಭಾನ ಹಾನ್ನಿ ಮೇಳ್ನು ಮಂಗಳೂರು ಶಕ್ತಿನಗರಾಚೆ ಕಲಾಂಗಣಾಂತು ದಿನಾಂಕ. ೨೦.೦೮.೨೦೨೫ ದಿವಸು ಆಯೋಜೀತ ೩೪ವ್ಯಾ ಕೋಂಕಣೀ ಮಾನ್ಯತಾಯ ದಿಸಾಚ್ಯಾ ಸಮಾರೋಪ ಸುವಾಳ್ಯಾಂತ ಮುಖೇಲ ಸೋಯರೇ ಜಾವನು ಯವನು ಉಲಯತಾಲೇ.
ಕರ್ನಾಟಕ ಕೋಂಕಣೀ ಸಾಹಿತ್ಯ ಅಕಾದೇಮೀಚೇ ಅಧ್ಯಕ್ಷ ಶ್ರೀ ಜೋಕಿಂ ಸ್ಟ್ಯಾನೀ ಆಲ್ವಾರೀಸ ಹಾನ್ನಿ ಯೇವಕಾರ ದಿವನ ಪ್ರಸ್ತಾವನಾ ಉಲೋವಪ ಕೇಲೇಂ. ಭಾರತಾಂತ ಮಾನ್ಯತಾಯ ಮೇಳಿಲ್ಲ್ಯಾ ೨೨ ರಾಜಭಾಶಾಂತು ಕೋಂಕಣೀ ಹೀ ಏಕ. ಆಮೀ ೨೦ ಅಗಸ್ಟ ೧೯೯೨ ದಿಸಾ ಕೋಂಕಣೀ ಮಾನ್ಯತಾಯ ದೀಸಾಚ್ಯಾ ನಾಂವಾನ ಆಮಚೇ ಭಾಶೇಚೀ ಮಾನ್ಯತಾಯ ಮನಯತಾತ. ತರಣಾಟ್ಯಾಂನೀ ಹಾತೂಂತಲ್ಯಾನ ಪ್ರೇರಣಾ ಘೇವನ ಕೋಂಕಣೀಚೋ ವೈಭವ ಪುರಾಯ ಜಗಾಚೆ ಸಕ್ಕಡೆ ಪಾವೋವಪಾ ಖಾತೀರ ಕಶ್ಟ ಕರಚೇ. ಭಾಸ ಉದರಗತೀ ಖಾತೀರ ಖಂಯಚ್ಯಾಯ ನವ್ಯಾ ವಿಚಾರಾಂಕ ಅಕಾದೇಮೀ ಸಹಕಾರ ಕರತಲೀ. ಮ್ಹೊಣು ತಾನ್ನಿ ಸಾಂಗಲೇಂ. ಮಂಗಳೂರು ಮಹಾನಗರ ಪಾಲಿಕೇಚೇ ಆದಲೇ ನಗರಸೇವಕ ರಂಗನಾಥ ಕಿಣಿ ಹಾನ್ನಿ ಕೋಂಕಣೀ ಧ್ವಜ ಉಬಾರೂನ ಹ್ಯಾ ದಿಸಾಚೋ ಉಕ್ತಾವಣ ಕೇಲೋ. ಉಪರಾಂತ ಹಾಯಸ್ಕೂಲ ಆನೀ ಕೊಲೇಜೀಚ್ಯಾ ವಿಭಾಗಾಂತ ವೇಗವೇಗಳೀಂ ಮನರಂಜನಾಚೆ ಸ್ಪರ್ಧಾ ಚಲ್ಲೆ.
ಪ್ರೌಢಶಾಲಾ ವಿಭಾಗಾಂತು ಕ್ರೈಸ್ಟ್ ಕಿಂಗ್ ಆಂಗ್ಲ ಮಾಧ್ಯಮ ಶಾಳಾ ಕಾರ್ಕಳ ಪ್ರಥಮ, ಮೌಂಟ್ ಕಾರ್ಮೆಲ್ ಸೆಂಟ್ರಲ್ ಸ್ಕೂಲ್ ದುಸರೇಚೆ ಆನಿ ಹೋಲಿ ಫ್ಯಾಮಿಲಿ ಆಂಗ್ಲ ಮಾಧ್ಯಮ ಶಾಳಾ ತೀಸರೇಚೆ ಸ್ಥಾನ ಘೆತ್ಲೆ. ಕಾರ್ಯಕ್ರಮ ನಿರ್ವಹಣ ಸ್ಪರ್ಧೆಂತು ಕ್ರೈಸ್ಟ್ ಕಿಂಗ್ ಶಾಳೆಚೆ ಲೆನಿಶಾ ಮೆಂಡೊನ್ಸಾ ಆನಿ ಸಾನ್ವಿ ಮಾರ್ಟಿಸ್ ಪ್ರಥಮ, ಮೌಂಟ್ ಕಾರ್ಮೆಲ್ ಶಾಳೆಚೆ ಅಲೋಮ ಲೋಬೊ ದುಸರೇಚೆ ಆನಿ ಕೆನರಾ ಪ್ರೌಢ ಶಾಳೆಚೆ ಜೀವಿಕಾ ಕುಡ್ವಾ ತೀಸರೇಚೆ ಸ್ಥಾನ ಘೆತ್ಲೆ.
ಕಾಲೇಜು ವಿಭಾಗಾಂತು ಸಂತ ಎಲೋಶಿಯಸ್ ಪಿಯು ಕಾಲೇಜು ಬಿ ತಂಡ ಪ್ರಥಮ, ಸಂತ ಎಲೋಶಿಯಸ್ ಪಿಯು ಕಾಲೇಜು ಎ ತಂಡ ದುಸರೇಚೆ ಆನಿ ಕಾರ್ಮೆಲ್ ಪಿಯು ಕಾಲೇಜು ಮೊಡಂಕಾಪು ತೀಸರೇಚೆ ಸ್ಥಾನ ಘೆತ್ಲೆ. ಕಾರ್ಯಕ್ರಮ ನಿರ್ವಹಣೆಂತು ಸಂತ ಎಲೋಶಿಯಸ್ ಪಿಯು ಕಾಲೇಜಾಚೆ ಲಿಸ್ಟನ್ ಕಾರ್ಲ್ ಪ್ರಥಮ, ಸಂತ ಎಲೋಶಿಯಸ್ ಪಿಯು ಕಾಲೇಜಾಚೆ ಆಡ್ಲಿನ್ ಸಿಕ್ವೇರಾ ಆನಿ ಕೆನರಾ ಸಂಧ್ಯಾ ಕಾಲೇಜಾಚೆ ಪಂಚಮಿ ಭಟ್ ದುಸರೇಚೆ ಆನಿ ಸಂತ ಎಲೋಶಿಯಸ್ ಪರಿಗಣಿತ ವಿವಿಚೆ ಸಾನ್ಸಿಯಾ ರೂತ್ ಡಿಕುನ್ಹಾ ತೀಸರೇಚೆ ಸ್ಥಾನ ಘೆತ್ಲೆ.. ವಿಕಾಸ್ ಕಲಾಕುಲ್ ತಾನ್ನಿ ಬಹುಮಾನ ಜಿಕ್ಕಿಲ್ಯಾಲೊ ವಿವರ ವಾಚ್ಚಿಲೆ. ಹೇಂಚಿ ವೇಳ್ಯಾರಿ ಆರತಾಂ ಭರತನಾಟ್ಯಾಂತು ವಿಶ್ವ ದಾಖಲೋ ನಿರ್ಮಾಣ ಕೆಲೀಲೊ ಕು. ರೆಮೊನ ಇವೆಟ್ ಪಿರೇರಾ ತಾಂಕಾ ಸನ್ಮಾನ ಕೆಲ್ಲಿ. ಸನ್ಮಾನ ಪತ್ರ ಅಕಾಡೆಮಿ ಸದಸ್ಯೆ ಶ್ರೀಮತಿ ಅಕ್ಷತಾ ನಾಯಕ್ ತಾನ್ನಿ ವಾಚ್ಚಿಲೆ.
ಅಕಾಡೆಮಿಯ ಮಾಜಿ ಅಧ್ಯಕ್ಷ ಶ್ರೀ ರೊಯ್ ಕ್ಯಾಸ್ತೆಲಿನೊ ತಾನ್ನಿ ಚಾಲ್ತಿ ಕೊಂಕ್ಣಿ’ ಪುಸ್ತಕಾಚೆ ಇ ಬುಕ್ ಆವೃತ್ತಿ ಉಗ್ತಾವಣ ಕೆಲ್ಲಿ. ಪುಸ್ತಕಾ ಖಾತೇರಿ ಕೇರನ್ ಮಾಡ್ತಾ ತಾನ್ನಿ ಮಾಹಿತ ದಿಲ್ಲಿ. ಮಾಂಡ್ ಸೊಭಾಣ್ ಅಧ್ಯಕ್ಷ ಶ್ರೀ ಲುವಿ ಜೆ. ಪಿಂಟೊ ತೀರ್ಪುಗಾರಾಂಕ ತಶೀಚಿ ಆರತಾಂ ಗುರು ಶ್ರೇಷ್ಟ ಗೌರವ ಘೆತ್ತಿಲೆ ಶಿಕ್ಷಕಿ ತಶೀಚಿ ಅಕಾಡೆಮಿ ಸದಸ್ಯೆ ಶ್ರೀಮತಿ ಸಪ್ನಾ ಕ್ರಾಸ್ತಾ ಹಾಂಕಾ ಗೌರವ ಕೆಲ್ಲಿ. ಅಕಾಡೆಮಿ ಸದಸ್ಯ ನವೀನ್ ಲೋಬೊ, ರೊನಿ ಕ್ರಾಸ್ತಾ, ದಯಾನಂದ ಮಡ್ಕೇಕರ್ ಉಪಸ್ಥಿತ ವ್ಹರಲೀಲೆ. ರಿಜಿಸ್ಟ್ರಾರ್ ರಾಜೇಶ್ ಜಿ. ತಾನ್ನಿ ಆಬಾರ ಮಾನಲೆ. ಉದ್ಘಾಟನಾ ಕಾರ್ಯಕ್ರಮ ಅಕಾಡೆಮಿ ಸದಸ್ಯ ಸಮರ್ಥ್ ಭಟ್ ಆನಿ ಸಮಾರೋಪ ಕಾರ್ಯಕ್ರಮ ವೆನಿಶಾ ಸಲ್ಡಾನ್ಹಾ ತಾನ್ನಿ ನಿರೂಪಣ ಕೆಲ್ಲಿ.