ಜುಲಾಯ್ 20, 2025 ರ್ ಮೂಡಬಿದ್ರಿ ಹೊಸ್ಪೆಟ್ ಫಿರ್ಗಜೆಚ್ಯಾ ಸಭಾಸಾಲಾಂತ್ ಕರ್ನಾಟಕ ಕೊಂಕಣಿ ಸಾಹಿತ್ಯ್ ಅಕಾಡೆಮಿನ್, ಐ.ಸಿ.ವೈ.ಎಮ್ ಹೊಸ್ಪೆಟ್ ಹಾಂಚ್ಯಾ ಸಹಯೋಗಾನ್ ಮಾಂಡುನ್ ಹಾಡ್ಲಲೆಂ ಸಾಹಿತ್ಯ್ ಕಾರ್ಯಾಗಾರ್ ವ್ಹಡ್ ಯಶಸ್ವಿ ಜೊಡುಂಕ್ ಪಾವ್ಲೆಂ. ಕಾರ್ಯಾಚ್ಯೆ ಸುರ್ವಾತೆರ್ ಹೊಸ್ಪೆಟ್ ಫಿರ್ಗಜೆಚೊ ವಿಗಾರ್ ಮಾ|ಬಾ|ಗ್ರೆಗರಿ ಡಿಸೋಜಾನ್ ಬರೆಂ ಮಾಗುನ್ ಕಾರ್ಯಾಚಿ ಸುರ್ವಾತ್ ಕೆಲಿ. ಸಕಾಳಿಂಚ್ಯಾ ಆದೆಸಾರ್ ನಾಮ್ಣೆಚಿ ಕವಯಿತ್ರಿ ಮಾನೆಸ್ತಿಣ್ ಫೆಲ್ಸಿ ಲೋಬೊ ಹಿಣೆಂ ಕವಿತಾ ಕಶಿ ಬರೊಂವ್ಚಿ, ಕವಿತೆಕ್ ಗರ್ಜೆಚೆ ವಿಶಯ್ ಹ್ಯಾ ವಿಶಿಂ ಮಾಹೆತ್ ದಿಲಿ.
ರೊನಿ ಕ್ರಾಸ್ತಾ ಕೆಲರಾಯ್ ಆನಿ ವಿನೋದ್ ಪಿಂಟೊ ತಾಕೊಡೆ ಹಾಂಣಿಂ ತಿಕಾ ಸಾಂಗಾತ್ ದಿಲೊ. ಕಾರ್ಯಾಗಾರಾಂತ್ ಭುರ್ಗ್ಯಾಂಕ್ ಪಂಗ್ಡಾಂನಿ ತರ್ಕ್ ಕರೊವ್ನ್ ಕವಿತಾ ರಚುಂಕ್ ಸಾಂಗ್ಲೆಂ. ಕಾರ್ಯಾಗಾರಾಕ್ ಹಾಜರ್ ಜಾಲ್ಲ್ಯಾಂನಿ ಸೊಭಿತ್ ಕವಿತಾ ರಚ್ಲ್ಯೊ.
ಉಪ್ರಾಂತ್ ರೊನಿ ಕ್ರಾಸ್ತಾ ಕೆಲರಾಯ್ ಹಾಣೆಂ ಕೊಂಕ್ಣಿ ಭಾಸ್ ಆನಿ ಸಂಸ್ಕೃತಿ ಹ್ಯಾವಿಶಿಂ ಮಟ್ವೊ ಉಲೊವ್ಪ್ ದಿಲೊ. ಫಾಮಾದ್ ಬರೊವ್ಪಿ ಡಾ| ಜೊಯರ್ ರುಡೋಲ್ಫ್ ನೊರೊನ್ಹಾ ಹಾಣೆಂ ಕೊಂಕ್ಣಿ ಸಾಹಿತ್ಯ್ ಆನಿ ಚರಿತ್ರಾ ಹ್ಯಾ ವಿಶಿಂ ಮಾಹೆತ್ ವಾಂಟುನ್ ಘೆತ್ಲಿ.
ಸಾಂಜೆರ್ ಜಾಲ್ಲಲ್ಯಾ ಸಂಪ್ಣೆ ಕಾರ್ಯಾಂತ್ ಅಕಾಡೆಮಿ ಅಧ್ಯಕ್ಶ್ ಶ್ರೀ ಜೋಕಿಂ ಸ್ಟ್ಯಾನಿ ಆಲ್ವಾರಿಸ್‌ ಹಾಂಣಿಂ ಉಲೊವ್ನ್, ʼಅಕಾಡೆಮಿ ಲೊಕಾಲಾಗಿಂ ಯೆತಾ ಆನಿ ಕೊಂಕ್ಣಿ ವಾವ್ರ್ ಕರ್ತಾ. ಹಾಚೊ ಫಾಯ್ದೊ ಘೆಜೆ ಮ್ಹಣಾಲೊ. ಆಯ್ಚ್ಯಾ ಕಾರ್ಯಾಗಾರಾ ಉಪ್ರಾಂತ್ ಹೊಸ್ಪೆಟಾಂತ್ ಎಕ್ಲೊ ತರೀ ಕವಿ ವಾ ಕವಯಿತ್ರಿ ಕೊಂಕ್ಣಿ ಭಾಶೆಕ್ ಮೆಳ್ಳಿಂ ತರ್ ಅಕಾಡೆಮಿಚೊ ವಾವ್ರ್ ಸುಫಳ್ ಜಾತಲೊ. ಯುವಜಣಾಂನಿ ಅಸಲ್ಯಾ ಕಾರ್ಯಾಕ್ರಮಾಂನಿ ಚಡ್ ಆನಿ ಚಡ್ ವಾಂಟೊ ಘೆವ್ನ್ ಕೊಂಕ್ಣಿ ಮಾಂಯ್ ಭಾಶೆಚ್ಯೆ ಉದರ್ಗತೆಕ್ ವಾವ್ರ್ ಕರುಂಕ್ ಉಲೊ ದಿಲೊ. ಉಪ್ರಾಂತ್ ವಾಂಟೊ ಘೆತ್ಲಲ್ಯಾ ಸರ್ವಾಂಕ್ ಪ್ರಮಾಣ್ ಪತ್ರಾಂ ವಾಂಟ್ಲಿಂ.
ಅಕಾಡೆಮಿ ಸಾಂದೊ ನವೀನ್‌ ಲೋಬೊ, ಸಿ.ಎಸ್.ಸಿ.ಎ ಅಧ್ಯಕ್ಶ್ ವಿನೋದ್ ಪಿಂಟೊ, ಐ.ಸಿ.ವೈ.ಎಮ್ ಅಧ್ಯಕ್ಶ್ ಶ್ರೀ ರೊಲ್‌ಸ್ಟನ್ ಫ್ಲೆಮಿಂಗ್‌ ಡಿಸೋಜ, ಐ.ಸಿ.ವೈ.ಎಮ್. ಪ್ರೇರಕ್ ಸೆಲ್ವಿನ್ ಜ್ಯೂಡ್ ಕುಲಾಸೊ ಆನಿ ಡೆನಿಸ್ ಫೆರ್ನಾಂಡಿಸ್ ಹ್ಯಾ ಸಂದರ್ಭಾರ್ ಹಾಜರ್ ಆಸ್‌ಲ್ಲೆ.
ಕೆನರಾ ಸ್ಪೋರ್ಟ್ಸ್ ಆನಿ ಕಲ್ಚರಲ್ ಎಸೋಸಿಯೇಶನ್ ಹಾಣಿಂ ಸಹಕಾರ್ ದಿಲ್ಲೊ.