ಜನವರಿ ೧೫, ೨೦೨೬ ದಿವಸು ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ ಆನಿ ಇಯಾನ್ ಕೇರ್ಸ್ ಫೌಂಡೇಶನ್ ಹಾಂಗೆಲೆ ಸಹಯೋಗ ಬರಶಿ ಕಿನ್ನಿಗೋಳಿಂತು `ಆಜ್ ಆಮಿ ಕೊಂಕ್ಣಿ ಉಲೊವ್ಯಾಂ ಮ್ಹಣ್ಚೆ ಕಾರ್ಯಕ್ರಮ ಮಸ್ತ ವಿಜೃಂಭಣೆನಿ ಆಯೋಜನ ಕೆಲೀಲೆ. ಪಯಲೇಕ ಮೂರುಕಾವೇರಿ ಜಂಕ್ಷನ್ ತಾಕೂನು ಕಾರ್ಯಕ್ರಮ ಚೊಲ್ಚೆ ಜಾಗೇಕ ಭವ್ಯ ಮೆರವಣಿಗೇರಿ ಯವ್ನು ಚಡ್ತೆ ಚಮಕ್ ದಿಲ್ಲೆ. ಕಿನ್ನಿಗೋಳಿ ಪರಿಸರಾಚಾನ ಮ್ಹಾಲ್ಗಡೆ ಜಾಲೀಲೆ ಶ್ರೀಮತಿ ಕಾರ್ಮಿಣ್ ರೊಡ್ರಿಗಸ್ ತಾನ್ನಿ ತಾಂದ್ಲಾ ಮುಡ್ಯಾ ತಾಕೂನು ತಾಂದುಲು ಕಾಡ್ಚೆ ಮುಖಾಂತರ ಕಾರ್ಯಕ್ರಮಾಚೆ ಉದ್ಘಾಟನ ಕೆಲ್ಲಿ. ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ ಅಧ್ಯಕ್ಷ ಜಾಲೀಲೆ ಜೋಕಿಂ ಸ್ಟ್ಯಾನಿ ಆಲ್ವಾರಿಸ್ ತಾನ್ನಿ ಪ್ರಾಸ್ತಾವಿಕ ಉತ್ರ ಉಲೋನು ಸಕಡಾಂಕ ಯೇವ್ಕಾರ ಕೆಲ್ಲಿ. ಇಯಾನ್ ಕೇರ್ಸ್ ಫೌಂಡೇಶನ್ನ ಸಂಸ್ಥಾಪಕ ಜಾಲೀಲೆ ಶ್ರೀ ಹೇಮಾಚಾರ್ಯ ವೇದಿಕೆರಿ ಉಪಸ್ಥಿತ ಆಶ್ಶಿಲೆ.
ಚರಡುವಾಂಕ ನಿಸರ್ಗ ಬರಶಿ ಜೋಡಪಾಕ ರಾನ ಭೋಂವಡೀ ಘಡೋವನ ಹಾಡಲೀ ಆನೀ ವೇಗವೇಗಳ್ಯಾ ಝಾಡಾಂ, ಫುಲಾಂ, ದ್ರಾಕ್ಷವೇಲೀ, ವಖದೀ ವನಸ್ಪತ, ಜನಾವರಾಂ, ಸುಕಣೀಂ, ಕಿಡೇ ಆನೀ ಮನಶಾಚೇ ಸಂಬಂದ ಹಾಂಚೀಂ ಕೋಂಕಣೀ ನಾಂವಾಂ ಕಳೋನು ದಿಲ್ಲಿ. ಉಪರಾಂತ ಚರಡುವಾಂಕ ಸಬಾರ ಸ್ಪರ್ಧಾ ಆಯೋಜನ ಕೊರನು ಆಕರ್ಷಕ ಇನಾಮು ದಿಲ್ಲೆ. ಹೇ ಕಾರ್ಯಕ್ರಮಾಂತು ಕೊಂಕಣಿ ಕ್ರೈಸ್ತ, ಜಿ.ಎಸ್,ಬಿ, ಸಿದ್ಧಿ ತಶೀಚಿ ಕುಡುಬಿ ಸಮುದಾಯಾಚೆ ಸುಮಾರ ೨೦೦ ಪಶಿ ಚ್ಹಡ ಚರಡುಂವ ವಾಂಟೊ ಘೆತ್ತಿಲೆ. ಕಾರ್ಯಕ್ರಮಾಂತು ಸಿದ್ಧಿ ಪಂಗಡಾಚೆ ಧಮಾಮ್ ನೃತ್ಯ, ಕುಡುಬಿ ಪಂಗಡಾಚೆ ಕೋಲಾಟ, ರೈಸಿಂಗ್ ಸ್ಟಾರ್ಸ್ ಕಿರೆಂ ಹಾಂಗೆಲೆ ಬ್ರಾಸ್ ಬ್ಯಾಂಡ್ ತಶೀಚಿ ಆಲನಿ ಡಿಸೋಜಾ ತಾಂಗೆಲೆ ಗಾಯನ ಲೋಕಾಂಕ ರಂಜನ ದಿಲ್ಲೆ.
ಸಮಾರೋಪ ಸಮಾರಂಭಾಚೆ ಅಧ್ಯಕ್ಷಪಣ ಅಕಾಡೆಮಿಚೆ ಅಧ್ಯಕ್ಷ ಜಾಲೀಲೆ ಜೋಕಿಂ ಸ್ಟ್ಯಾನಿ ಆಲ್ವಾರಿಸ್ ತಾನ್ನಿ ಘೆತ್ತಿಲೆ. ಮುಖೇಲ ಸೊಯರೆ ಜಾವ್ನು ದಾಯ್ಜಿ ವರ್ಲ್ಡ್ ಸಂಸ್ಥಾಪಕ ವಾಲ್ಟರ್ ನಂದಳಿಕೆ, ಮಾನಾಚೆ ಸೊಯರೆ ಜಾವನು ಕಿರೆಂ ಚರ್ಚಿನ ಧರ್ಮಗುರು ಜಾಲೀಲೆ ವಂ. ಸ್ವಾ. ಒಸ್ವಾಲ್ಡ್ ಮೊಂತೇರೊ, ಕಿನ್ನಿಗೋಳಿ ಚರ್ಚಿನ ಧರ್ಮಗುರು ವಂ. ಸ್ವಾ. ಜೋಕಿಂ ಫೆರ್ನಾಂಡಿಸ್, ಶ್ರೀ ರಾಮ ಮಂದಿರ ಕಿನ್ನಿಗೋಳಿ ಹಾಜ್ಜೆ ಅಧ್ಯಕ್ಷ ಶ್ರೀ ರಾಜೇಶ್ ನಾಯಕ್, ದ.ಕ. ಜಿಲ್ಲಾ ಕುಡುಬಿ ಸಮಾಜ ಸೇವಾ ಸಂಘ(ರಿ). ಕಾರ್ಯದರ್ಶಿ ಶ್ರೀ ಶೇಖರ ಗೌಡ, ಇಯಾನ್ ಕೇರ್ಸ್ ಫೌಂಡೇಶನ್ ಸಂಸ್ಥಾಪಕ ಶ್ರೀ ಹೇಮಾಚಾರ್ಯ ವೇದಿಕೆರಿ ಆಶ್ಶಿಲೆ.
ಕುಮಾರಿ ಮೆಲ್ಡ್ರಿಡಾ ರೊಡ್ರಿಗಸ್ ತಾನ್ನಿ ಕಾರ್ಯಕ್ರಮ ನಿರೂಪಣ ಕೆಲ್ಲಿ. ಅಕಾಡೆಮಿ ಸದಸ್ಯ ದಯಾನಂದ್ ಮಡ್ಕೇಕರ್, ಸುನೀಲ್ ಸಿದ್ಧಿ, ರೊನಾಲ್ಡ್ ಕ್ರಾಸ್ತಾ ತಶೀಚಿ ನವೀನ್ ಲೋಬೊ ಹಾಜರ ಆಶ್ಶಿಲೆ.