ಅಯೋಧ್ಯಾಂತು ಶ್ರೀ ರಾಮಲಲ್ಲಾಲೊ ಪ್ರತಿಷ್ಠಾಪನೆಚೊ ಪಯಲೇಚೆ ವಾರ್ಷಿಕೋತ್ಸವ ಸುಸಂದರ್ಭಾರಿ ಅಯೋಧ್ಯಾಚೆ ಶ್ರೀ ರಾಮಸೇವಾ ಪ್ರತಿಷ್ಠಾನಾಚೆ ತರಪೇನಿ ವಾರ್ಷಿಕೋತ್ಸವಾಚೆ ಪ್ರಯುಕ್ತ ಭಗವಾನ್ ಶ್ರೀ ರಾಮಾಕ ಸಂಬಂಧ ಪಾವ್ವಿಲೆ ಮೌಲ್ಯ ಆನಿ ಸಂಪ್ರದಾಯಾಚೆ ಪ್ರಚಾರ ಆನಿ ಆಚರಣೆ ಖಾತ್ತಿರಿ ವೆಗವೆಗಳೆ ನಮೂನ್ಯಾಚೆ ರಾಮೋತ್ಸವ ಸಾಂಸ್ಕೃತಿಕ ಸ್ಪರ್ಧಾ ಆನಿ ಪ್ರತಿಷ್ಠಿತ ರಾಮಲಲ್ಲಾ ಪುರಸ್ಕಾರ ಪ್ರಶಸ್ತಿ ಆಯೋಜನ ಕೆಲೀಲೆ. ದೇಶಾದ್ಯಂತಾಚೆ ಸಕಡಾನಿ ಹಾಂತು ವಾಂಟೊ ಘೆವಚೆ ಅವಕಾಶ ಆಸ್ಸುನು ಹೇ ವೇಳ್ಯಾರಿ ರಾಮಾಯಣ ರಸಪ್ರಶ್ನೆ, ನೃತ್ಯ, ಸಂಗೀತ ಆನಿ ಚಿತ್ರಕಲಾ ಸ್ಪರ್ಧಾ ತಶೀಚಿ ಫ್ಯಾನ್ಸಿ ಡ್ರೆಸ್ ಸ್ಪರ್ಧಾ ಆಯೋಜನ ಕೆಲೀಲೆ. ಹಾಜ್ಜೆ ಉದ್ದೇಶ ಲೋಕಾಂತುಲೆ ಸೃಜನಶೀಲತಾ ಆನಿ ಕಲಾತ್ಮಕತೆಚೆ ಅಭಿವ್ಯಕ್ತಿಕ ಉತ್ತೇಜನ ದಿವಚೆ, ಏಕತಾ ಆನಿ ಭಕ್ತಿ ಭಾವನಾ ವೃದ್ಧಿ ಕೊರಚೆ ಜಾವ್ನಾಶ್ಶಿಲೆ. ಹಾಂತು ಪ್ರತಿಯೇಕ ಸ್ಪರ್ಧೆಂತೂ ವಯಾಕ ಸಮ್ಮ ಜಾವ್ನು ದೋನ ಪಂಗಡ ಕೆಲೀಲೆ. ೧೩ ವಷಾ ಪಶಿ ಸಾನ ವಯಾಚಾಂಕ ಜೂನಿಯರ್ ಆನಿ ೧೩ ವರ್ಷಾ ಪಶಿ ಚ್ಹಡ ವಯಾಚಾಂಕ ಮಾಲ್ಗಡೆ ಮ್ಹಣ್ಚೆ ಪಂಗಡಾಂತು ವಿಂಗಡಣ ಕೆಲೀಲೆ. ಹಾಂತು ದೇಶಾದ್ಯಂತ ತಾಕೂನು ೩೦,೦೦೦ ಪಶಿ ಚ್ಹಡ ಸ್ಪರ್ಧಾಳು ಲೋಕಾನಿ ವಾಂಟೊ ಘೆತ್ತಿಲೆ.
ತಾಂತು ಬೆಂಗಳೂರ್‍ಚೆ ಶ್ರೀಮತಿ ವಿಜಯಾ ವಿಠ್ಠಲದಾಸ ನಾಯಕ ಆನಿ ತಾಂಗೆಲೆ ಪೂತು ನವನೀತ ವಿ. ನಾಯಕ ತಾನ್ನಿ ಚಿತ್ರಕಲಾ ಆನಿ ಕ್ಯಾನ್ವಾಸ ಚಿತ್ರಕಲಾ ವಿಭಾಗಾಂತು ವಾಂಟೊ ಘೆತ್ತಿಲೆ. ಹಾಂಗೆಲೆ ದೊಗ್ಗಾಲೆ ಉತ್ತಮ ಸಾಧನೆಕ ಹಾಂಕಾ ದೊಗ್ಗಾಂಕಚಿ ಸ್ಪರ್ಧಾ ಆಯೋಜಿತ ಅಯೋಧ್ಯಾಚೆ ಶ್ರೀ ರಾಮಸೇವಾ ಪ್ರತಿಷ್ಠಾನ ತರಪೇನಿ ರುಪ್ಯಾ ಲೊಕೇಟ್ ಆನಿ ಪ್ರಮಾಣ ಪತ್ರ ಮೆಳ್ಳಾ. ದೊಗ್ಗಾಂಕ ಸರಸ್ವತಿ ಪ್ರಭಾ ತರಪೇನ ಅಭಿನಂದನ ಪಾವಯತಾ ದೇವು ಬರೆಂ ಕೊರೊ ಮ್ಹಣತಾ.