ದುಡ್ಡಾಶ್ಶಿಲೊ ಧನವಂತಾ ಪಶಿ ಗುಣವಂತಾಕ ಗೌರವ ಪಾವ್ತಾ. ದುಡ್ಡು ಆನಿ ಜ್ಞಾನಾಚೆ ಸದ್ವಿನಿಯೋಗ, ಸಮಾಜಾಕ ಚಾಂಗ ಜಾವ್ಕಾ ಮ್ಹಣ್ಚೆ ಸಾಮೂಹಿಕ ಚಿಂತನೇನಿ ಸಕಡಾಂಕ, ಸಕ್ಕಡ ಚಾಂಗ ಜಾತ್ತಾ, ಶ್ರದ್ಧಾಭಕ್ತಿ ಪ್ರೀತಿ, ಅಂತಃಕರಣಾಚೆ ಸೇವೆನಿ ದೇವಾಲೆ ಅನುಗ್ರಹ ಸಾಧ್ಯ ಆಸ್ಸಾ ಅಶ್ಶಿ ಮ್ಹೊಣು ಶ್ರೀ ಸಂಸ್ಥಾನ ಕಾಶೀಮಠಾಧೀಶ ಶ್ರೀಮದ್ ಸಂಯಮೀಂದ್ರ ತೀರ್ಥ ಸ್ವಾಮ್ಯಾನಿ ಸಾಂಗ್ಲೆ. ತಾನ್ನಿ ೦೨-೦೨-೨೦೨೫ ದಿವಸು ಸಕ್ಕಾಣಿ ಉಡುಪಿ ಜಿಲ್ಲೆಚೆ ಕಾರ್ಕಳ ತಾಲೂಕಾಚೆ ಮುಂಡ್ಕೂರು ಸಚ್ಚೇರಿಪೇಟೆಚೆ ಜಿ.ಎಸ್.ಬಿ ಸಮಾಜ ಸೇವಾ ಸಂಘ (ರಿ) ಹಾಜ್ಜೆ ತರಪೇನಿ ಜೀರ್ಣೋದ್ಧಾರ ಜಾಲೀಲೆ ಶ್ರೀ ಲಕ್ಷ್ಮೀ ವೆಂಕಟೇಶ ಭಜನಾ ಮಂದಿರಾಂತು ಶ್ರೀ ಮಹಾಗಣಪತಿ ತಶೀಚಿ ಶ್ರೀ ಲಕ್ಷ್ಮೀ ವೆಂಕಟೇಶ ದೇವಾಲೆ ಪುನರ್ ಪ್ರತಿಷ್ಠಾ, ನೂತನ ಶ್ರೀ ಲಕ್ಷ್ಮೀ ವೆಂಕಟೇಶ ಕಲಾ ಮಂದಿರ ಉದ್ಘಾಟನ ಕೊರನು ಆಶೀರ್ವಚನ ದಿತ್ತಾ ಆಶ್ಶಿಲೆ. ಮುಖಾರಿ ಉಲಯತಾ ತಾನ್ನಿದಾಸರ ಪದಾಂತು ಮಧ್ವ ಸಿದ್ಧಾಂತಾಚೆ ಪರಿಣಾಮಕಾರಿ ಚಿತ್ರಣ ದಿಲ್ಲ್ಯಾ. ಮ್ಹಳೀಲೆ ಸ್ವಾಮೆಂ “ಗುಣಾಂತು ಗರೀಬ ಜಾವಚಾಕ ನಜ್ಜ. ಗುರು ಸುಧೀಂದ್ರಾಲೆ ಆಶಯ ಪ್ರಮಾಣೆ ಮಂದಿರ ಮೂಖಾಂತರ ಸಮಾಜಾಕ ಸಂಸ್ಕಾರವಂತ ಜಾವ್ನು ಸಂಘಟನ ಕೊರನು ಸಮಾಜಾಕ ಚಾಂಗ ಜಾವಚೆ ವಾಟ್ಟೆಂತು ಆಮ್ಮಿ ಸಕಡಾನಿ ಚಮಕೂಕಾ ಮ್ಹೊಣು ಸಾಂಗ್ಲೆ.
ಸಭಾ ಕಾರ್ಯಕ್ರಮಾಂತು ಸಚ್ಚೇರಿಪೇಟೆ ಜಿ.ಎಸ್.ಬಿ ಸಮಾಜ ಸೇವಾ ಸಂಘಾಚೆ ಅಧ್ಯಕ್ಷ ರಾಮಚಂದ್ರ ನಾಯಕ್ ತಾನ್ನಿ ಪ್ರಾಸ್ತಾವಿಕ ಸಕಡಾಂಕ ಯೇವ್ಕಾರ ಕೊರನು, ಪ್ರಾಸ್ತಾವಿಕ ಜಾವ್ನು ಉಲಯಿಲಿ. ಉಪಾಧ್ಯಕ್ಷ ಬಿ. ಶ್ರೀಕಾಂತ್ ಕಾಮತ್, ಜೊತೆ ಕಾರ್ಯದರ್ಶಿ ವಿನೋದ್ ಶೆಣೈ ಸಹಿತ ಪದಾಧಿಕಾರಿ ತಾಕೂನು ಪೂಜ್ಯ ಸ್ವಾಮ್ಯಾಂಗೆಲೆ ಪಾದ ಪೂಜಾ ಚಲ್ಲೆ. ಕಾರ್ಯದರ್ಶಿ ಅಭಿಜತ್ ಶೆಣೈ ತಾನ್ನಿ ದಾನಿಂಗೆಲೆ ನಾಂವ ವಾಚ್ಲೆ.
ರಜತ ಸಿಂಹಾಸನ ಸೇವೆದಾರ ಎಂ.ಏಕನಾಥ ಪ್ರಭು, ಅಕ್ಷತಾ ಪ್ರಭು ಮಂಗಳೂರು, ಶಿಲಾ ವಸಂತ ಮಂಟಪ ಸೇವೆದಾರ ಬೋಳ ಗಣೇಶ್ ಕಾಮತ್, ಲತಾ ಕಾಮತ್, ದಾನಿ ಜಾಲೀಲೆ ಶ್ರೀನಿವಾಸ ರಘುನಂದನ ಕಾಮತ್, ಸಿದ್ಧಾಂತ್ ರ ಘುನಂದನ್ ಕಾಮತ್, ಗಿರೀಶ್ ಪೈ, ಸಹಿತ ಸೇವಾದಾರಾಂಕ ಪೂಜ್ಯ ಸ್ವಾಮ್ಯಾನಿ ಗೌರವ ಪ್ರಸಾದ ದಿಲ್ಲೆ.
ಶ್ರೀಮದ್ ಸುಧೀಂದ್ರ ತೀರ್ಥ ಸ್ವಾಮ್ಯಾಂಗೆಲೊ ಜನ್ಮ ಶತಾಬ್ದಿ ಮಹೋತ್ಸವ ಅಂಗ ಜಾವ್ನು ಚಲೀಲೆ “ಶ್ರೀ ಸುಧೀಂದ್ರ ಫಲೋದ್ಯಾನ” ಅಭಿಯಾನಾಚೆ ಅಂಗ ಜಾವ್ನು ಮಂದಿರಾಚೆ ಆವಾರಾಂತು ವ್ಹೋವ್ನು, ವಾಡ್ಡೋಚಾಕ ಫಳಾಚೆ ಸಸಿಂಕ ಪೂಜ್ಯ ಸ್ವಾಮ್ಯಾನಿ ಸಾಂಕೇತಿಕ ಜಾವ್ನು ಮಂದಿರಾಚೆ ಪದಾಧಿಕಾರಿಂಕ ಹಸ್ತಾಂತರ ಕೆಲ್ಲಿ.
ಮಂಗಳೂರು ಶ್ರೀ ವೆಂಕಟರಮಣ ದೇವಳಾಚೆ ಮೊಕ್ತೇಸರ ಮುಂಡ್ಕೂರು ಜಗನ್ನಾಥ ಕಾಮತ್, ಮೂಡುಬಿದಿರೆ ಶ್ರೀ ವೆಂಕಟರಮಣ ಆನಿ ಶ್ರೀ ಹನುಮಂತ ದೇವಳಾಚೆ ಆಡಳಿತ ಮೊಕ್ತೇಸರ ಜಿ. ಉಮೇಶ್ ಪೈ, ಮುಂಡ್ಕೂರು ವಿಠೋಭಾ ಮಂದಿರಾಚೆ ಎಂ. ವೆಂಕಟೇಶ ಕಾಮತ್, ಮೂಲ್ಕಿ ಶ್ರೀ ವೆಂಕಟರಮಣ ದೇವಳಾಚೆ ಆಡಳಿತ ಮಂಡಳಿ ಸಹಿತ ಆಸ್ಪಾಸಾಚೆ ಮುಖೇಲ ಗಣ್ಯ ಉಪಸ್ಥಿತ ವ್ಹರಲೀಲೆ.
ಪುನರ್ ಪ್ರತಿಷ್ಠಾ ಪ್ರಯುಕ್ತ ಆಯ್ತವಾರ ಸಕ್ಕಾಣಿ ದೇವಮಾಗಣಿ, ಶ್ರೀದೇವಾಕ ಪಂಚಾಮೃತ ಅಭಿಷೇಕ, ಪ್ರತಿಷ್ಠಾ ಕಲಶ ಪೂಜನ, ಪ್ರತಿಷ್ಠಾ ಹೋಮ ಮಹಾಪೂರ್ಣಾಹುತಿ ಚಲ್ಲೆ. ಮಂಗಳೂರು ಮೊಕ್ಕಾಂ ತಾಕೂನು ಆಯಲೀಲೆ ಪೂಜ್ಯ ಸ್ವಾಮ್ಯಾಂಕ ಮಂಗಲ ವಾದ್ಯ, ವೇದಘೋಷ ಸಹಿತ ಪೂರ್ಣಕುಂಭ ಸ್ವಾಗತ ದಿವನು ಆಪೋನು ಘೆತ್ಲೆ.
ದ್ವಾರ ಪೂಜಾ, ಲಕ್ಷ್ಮೀ ಪೂಜಾ, ಗೋದಾನ, ಮುಹೂರ್ತ ನಿರೀಕ್ಷಣ ಉಪರಾಂತ ಸ್ವಾಮ್ಯಾಂಗೆಲೆ ದಿವ್ಯ ಕರಕಮಲಾನಿ ದೇವಬಿಂಬಾಚೆ ಪುನರ್ ಪ್ರತಿಷ್ಠಾ, ಶ್ರೀದೇವಾಲೊ ಪ್ರಸನ್ನ ಪೂಜಾ ಚಲ್ಲೆ. ಅಷ್ಠಮಂಗಲ ನಿರೀಕ್ಷಣ, ಶ್ರೀದೇವಾಕ ಪಟ್ಟಕಾಣಿಕಾ, ಗುರುಕಾಣಿಕಾ ಸಮರ್ಪಣ ಕೆಲ್ಲಿ. ಮೂಲ್ಕಿಚೆ ವೇ. ಮೂ. ಸುರೇಶ್ ಭಟ್ ತಾಂಗೆಲೆ ಮುಖಾಲ ಪಣಾಂತು ವೈದಿಕಾಂಗೆಲೆ ಸಹಕಾರಾನಿ ಸರ್ವ ಧಾರ್ಮಿಕ ವಿಧಾನ ಚಲ್ಲೆ.
ಸಭಾಕಾರ್ಯಕ್ರಮಾಚೆ ಉಪರಾಂತ ಕಾರ್ಕಳ ಶ್ರೀ ವೆಂಕಟರಮಣ ಭಜನಾ ಮಂಡಳಿ ತರಪೇನ ಭಜನಾ ಸೇವಾ, ಅಪರಾಹ್ನ ಮಹಾಪೂಜಾ, ಪ್ರಸಾದ ವಿತರಣ, ಭೂರಿ ಸಮಾರಾಧನ ಚಲ್ಲೆ. ರಾತ್ರಿ ಪೂಜಾ, ಮಂದಿರಾಚೆ ಪ್ರಾಂಗಣಾಂತು ಶ್ರೀದೇವಾಲೆ ಪಾಲ್ಕಿ ಉತ್ಸವು, ಭೂವೈಕುಂಠ ದರ್ಶನ, ವಿಶೇಷ ದೀಪಾಲಂಕಾರ ಸೇವಾ, ವಸಂತ ಪೂಜಾ, ಪ್ರಸಾದ ವಾಂಟಪ. ಬೆಂಗಳೂರು ಬಾಲಚಂದ್ರ ಪ್ರಭು ತಂಡಾಚಾನ ಭಜನಾಮೃತ ಕಾರ್ಯಕ್ರಮ ಚಲ್ಲೆ. ಸಮಾಜ ಬಾಂಧವ ವ್ಹಡ ಅಂಕಡ್ಯಾರಿ ಉಪಸ್ಥಿತ ಉರ್ನು ಹರಿ-ಗುರು ಕೃಪೇಕ ಪಾತ್ರ ಜಾಲ್ಲೆ.
- ವರದಿ : ಎಮ್. ಗಣೇಶ ಕಾಮತ್ ಮೂಡಬಿದ್ರೆ