ಉಡುಪಿ ಜಿಲ್ಲೆಂತು ಜಿಲ್ಲಾಧಿಕಾರಿ, ಸಂಸದೆ, ಉಸ್ತುವಾರಿ ಸಚಿವೆ ಸಹಿತ ಸಕ್ಕಡ ರಂಗಾಂತು ಬಾಯ್ಲಮನಶಿಚಿ ಆಡಳಿತ ಆನಿ ಅಧಿಕಾರ ಕರತಾ ಆಸ್ಸುನು ಸಗಳೆ ರಾಷ್ಟ್ರಾಕ ಆದರ್ಶನೀಯ ಮ್ಹೊಣು ಬ್ರಹ್ಮಾವರ ಶಾಸಕ ಯಶ್‌ಪಾಲ್ ಸುವರ್ಣ ತಾನ್ನಿ ಆರತಾಂ ಸಾಂಗಲೆ. ತಾನ್ನಿ ಭಾರತೀಯ ಜನತಾಪಾರ್ಟಿ ಮಹಿಳಾ ಮೋರ್ಚಾ, ಉಡುಪಿ ಗ್ರಾಮಾಂತರ ಹಾಜ್ಜೆ ತರಪೇನ ಚಲೀಲೆ ಮಹಿಳಾ ದಿನಾಚರಣೆ ಉದ್ಘಾಟನ ಕೊರನು ಉಲಯತಾಲೆ. ಹೇಂಚಿ ವೇಳ್ಯಾರಿ ತಾನ್ನಿ ಸಬಾರ ಸಾಧಕ ಬಾಯ್ಲಮನಶೆಂಕ ಸನ್ಮಾನ ಕೆಲ್ಲಿ. ತಾಂತು ಯಕ್ಷಗಾನ ಆನಿ ಸಮಾಜ ಸೇವೆಂತು ನಾಂವ ಪಾವ್ವಿಲೆ ಕೊಕ್ಕರ್ಣೆಚೆ ಶ್ರೀಮತಿ ಜ್ಯೋತಿ ಎಂ.ಪ್ರಭು(ಯಕ್ಷಗಾನ) ವರೇನ ಏಕಳೆ. ಹಾನ್ನಿ ಜ್ಯೋತಿ ಮಹಿಳಾ ಮಂಡಲಾಚೆ ಕಾರ್ಯದರ್ಶಿ ಜಾವ್ನಾಸ್ಸತಿ. ಕೊಕ್ಕರ್ಣೆ ಶ್ರೀ ದುರ್ಗಾ ಪರಮೇಶ್ವರಿ ದೇವಳಾಚೆ ಉಪಾಧ್ಯಕ್ಷ, ಶ್ರೀ ದುರ್ಗಾಪರಮೇಶ್ವರಿ ಮಹಿಳಾ ಯಕ್ಷಗಾನ ಸಂಘಾಚೆ ಅಧ್ಯಕ್ಷಿಣಿ ಜಾವನು ಸುಮಾರ ೨೫ ವರಸಾಚಾನ ಸೇವಾ ಪಾವಯತಾ ಆಸ್ಸಾತಿ. ಸ್ಥಳೀಯ ಚೆಲ್ಲಿಯಾ ಚರಡುವಾಂಕ ಯಕ್ಷಗಾನ ಶಿಕೋನು ದಿತ್ತಾ ಯಕ್ಷಗಾನ ಕಲೆಕ ಪ್ರೋತ್ಸಾಹ ದಿತ್ತಾ ಆಸ್ಸಾತಿ. ಸುಧನ್ವ ಕಾಳಗಾಂತು ಅರ್ಜುನ, ದ್ರೌಪದಿ ಪ್ರತಾಪಾಂತು ಭೀಮ, ಕೊಂಕಣಿ ಯಕ್ಷಗಾನ ಹಿಡಿಂಬಾ ವ್ಹರಡಿಕೆಂತು ಭೀಮ, ಶನೀಶ್ವರ ವಾಮನ ಚರಿತ್ರೆಂತು ಬಲಿ ಚಕ್ರವರ್ತಿ ಅಶ್ಶಿ ನಾನಾ ಪಾತ್ರ ಕೊರನು ಪ್ರೇಕ್ಷಕ ತಾಕೂನು ಸೈ ಮ್ಹಣೋನು ಘೆತ್ಲ್ಯಾ.
ತಾಂಗೆಲೆ ಹೇ ಸಕ್ಕಡ ಸಾಧನಾ ಮಾನೂನು ಅವುಂದೂಚೆ ಮಹಿಳಾ ದಿನಾಚರಣೆ ಸಂದರ್ಭಾರಿ ತಾಂಕಾ ಸನ್ಮಾನು ಕೆಲ್ಲೆ. ಹೇ ಸಂದರ್ಭಾರಿ ಗ್ರಾಮಾಂತರ ಅಧ್ಯಕ್ಷ ರಾಜು ಕುಲಾಲ್, ಮುಖೇಲ ಗಣ್ಯ ಸಂದ್ಯಾ ರಮೇಶ್, ನಳಿನಿ ಪ್ರದೀಪ್ ರಾವ್, ಬಿರ್ತಿ ರಾಜೇಶ್ ಶೆಟ್ಟಿ, ಧನಂಜಯ ಅಮೀನ್, ರಾಘವೇಂದ್ರ ಜೆ.ಬಿ.ಎಸ್.ನಾರಾಯಣ ಆದಿ ಲೋಕ ಉಪಸ್ಥಿತ ವ್ಹರಲೀಲೆ. ಶೋಭಾ ಪೂಜಾರಿ ತಾಕೂನು ಪ್ರಾರ್ಥನಾ, . ಮಹಿಳಾ ಮೋರ್ಚಾ ಅಧ್ಯಕ್ಷೆ ರಮ್ಯಾ ಉಳ್ಳೂರು ತಾಕೂನು ಯೇವ್ಕಾರ, ಹೇಮಾ ಅಶೋಕ್ ತಾನ್ನಿ ಆಬಾರ ಮಾನಲೆ. ಅರ್ಪಿತಾ ಬ್ರಹ್ಮಾವರ ತಾನ್ನಿ ಕಾರ್ಯಕ್ರಮ ನಿರೂಪಣ ಕೆಲ್ಲೆ.