ಖಂಚಕಿ ಜಾಡಾಂತು ಫೂಲಿಲೆ ಫೂಲ ಕಿತ್ಲಕಿ ದೂರಾಚೆ ದೇವಾಲೆ ಮಾಥಿಯೇರಿ ಚೋಡ್ನು ಪ್ರಸಾದ ಜಾತ್ತಾ, ಖಂಚಕಿ ಗುಡಯೇರಿ ಜನ್ಮಿಲೆ ವಜರ(ನೀರಿನ ಸೆಲೆ) ಆನಿಕಿತ್ಲಕಿ ದೂರ ಪೋವ್ನು ನಂಯಿ ಜಾವ್ನು ವೆಗವೆಗಳೆ ಪುಣ್ಯಕ್ಷೇತ್ರ ನಿಮಿತ್ತ್ಯಾನ ತೀರ್ಥ ಜಾವ್ನು ಭಕ್ತಲೋಕ ದೇವಾಲೆ ಅನುಗ್ರಹ ಖಾತೇರಿ ತ್ಯಾ ತೀರ್ಥ ಶೃದ್ಧಾಭಕ್ತಿಂತು ಪಿವ್ಚೆ ತಶ್ಶಿ ಪವಿತ್ರ ಜಾತ್ತಾ. ತಶೀಚಿ ಖಂಯಕಿ ಜನ್ಮಿಲೊ ಮನೀಷು ಆನಿ ಖಂಯಕಿ ಪಾವ್ನು ನಿರಂತರ ಪರಿಶ್ರಮಾನಿ ಯಶ ಪಾವ್ನು ಸಮಾಜಾಂತು ನಾಂವ, ಪ್ರತಿಷ್ಠಾ ಜೋಡ್ನು ದುಸರ್‍ಯಾಂಕ ಅದರ್ಶಪ್ರಾಯ ಜಾತ್ತಾ.
ತಸ್ಸಾಲೆ ಏಕಳೇ ಸಾಧನ ಕೆಲೀಲೆ ಮನೀಷು ಮ್ಹಳಯಾರಿ ಧಾರವಾಡಾಚೆ ಶ್ರೀ ರತ್ನಾಕರ ಕೆ. ಪೈ ಮಾಮು. ಭಟ್ಕಳ ತಾ||ಚೆ ಹುಡೀಲು ಮ್ಹಣ್ಚೆ ಲಾನ ಗಾಂವಾಂತು ಜನ್ಮುನು, ಕುಂದಾಪುರ ತಾ||ಚೆ ನಾಯ್ಕನಕಟ್ಟೆಂತು ಬಾಲ್ಯ ಜೀವನ ಚಲೋನು ಧಾರವಾಡಾಕ ಆಯ್ಲೆ. ಧಾರವಾಡ ಮಾರ್ಕೇಟಾಂತು ಆಸ್ಸುಚೆ ಶ್ರೀ ವೆಂಕಟೇಶ ಕಾಮತ್ ಮಾಮ್ಮಾಲೆ ನಾಮಾಧಿಕ ಸರಸ್ವತಿ ರೆಸ್ಟೋರೆಂಟಾಂತು ಆಪಣೇಲೆ ವೃತ್ತಿ ಜೀವನ ಆರಂಭ ಕೆಲ್ಲಿ. ಉಪರಾಂತ ವೆಂಕಟೇಶ ಕಾಮತ್ ಮಾಮ್ಮಾಲಿ ಸಹಕಾರಾನಿಂಚಿ ಆಜಿಕ ೪೮ ವರ್ಷಾ ಮಾಕಶಿ ಮ್ಹಳಯಾರಿ ೧೯೭೬ ಇಸ್ವೆಂತು ಮರಾಠಾ ಕಾಲನಿಂತು ೧೯೭೬ ಇಸ್ವೆಂತು ಪೈ ಸ್ಟೋರ್‍ಸ ಮ್ಹಣ್ಚೆ ಕಿರಾಣಿ ದುಕಾನ ಆರಂಭ ಕೆಲ್ಲಿ. ಸತತ ಪರಿಶ್ರಮಾನಿ ಅಭಿವೃದ್ಧಿ ಕೆಲ್ಲಿ. ಆಜಿ ಹೇ ಧಾರವಾಡ ಮರಾಠಾ ಕಾಲನಿಂತೂ ಪ್ರಖ್ಯಾತ ಕಿರಾಣಿ ದುಕಾನ ಮ್ಹಣ್ಚೆ ನಾಂವ ಪಾವಲಾ. ಹಾಂಗೆಲೆ ಬಾಯ್ಲ ಶ್ರೀಮತಿ ಶಾರದಾ ಪೈ ಮಾಯಿ. ಬಾಮ್ಣಾಲೆ ಸಾವಳಿ ಜಾವ್ನು ಶ್ರೀ ರತ್ನಾಕರ ಮಾಮ್ಮಾಲೆ ಹರ್‍ಯೇಕ ಪ್ರಯತ್ನಾಕ ನಿರಂತರ ಸಹಕಾರ ದಿತ್ತಾ ಆಯಲೆ. ಹ್ಯಾ ಯಶಸ್ವಿ ದಂಪತಿಂಕ ತಿಗ್ಗ ಲೋಕ ಚೆಲ್ಲಿ ಆನಿ ದೀಪಕ ಪೈ ತಶೀಚಿ ಗುರುಮೂರ್ತಿ ಪೈ ಮ್ಹೊಣು ದೊಗ್ಗ ಲೋಕ ಚಾಲ್ಲಿಯಾ ಚರಡುಂವ ಆಸ್ಸಾತಿ. ಧಾರವಾಡ ಗೌಡ ಸಾರಸ್ವತ ಬ್ರಾಹ್ಮಣ ಸಮಾಜಾಂತು ಶ್ರೀ ರತ್ನಾಕರ ಪೈ ಮಾಮ್ಮಾನಿ ಮಸ್ತ ಕಾಳ ಸಕ್ರೀಯ ಕಾರ್‍ಯಕರ್ತ ಜಾವನು ಸೇವಾ ಪಾವಯಲಾ, ಸಬಾರ ವರ್ಷ ಆಡಳಿತ ಸಮಿತಿ ಸದಸ್ಯ ಜಾವ್ನು, ಪದಾಧಿಕಾರಿ ಜಾವ್ನು ವರೇನ ಜವಾಬ್ದಾರಿ ವ್ಹೋವ್ನು ಘೆತ್ಲ್ಯಾ.
೨೦೦೨ ಇಸ್ವೆಂತು ಶ್ರೀಮದ್ ವಿದ್ಯಾಧಿರಾಜ ತೀರ್ಥ ಸ್ವಾಮ್ಯಾಂಗೆಲೆ ಚಾತುರ್ಮಾಸು ಧಾರ್‍ವಾಡ ಸಮಾಜಾಂತು ಸಂಪನ್ನ ಜಾಲೀಲೆ ತೆದ್ನಾ ಖರೀದಿ ಸಮಿತಿಚೆ ಅಧ್ಯಕ್ಷ ಜಾವ್ನು ವ್ಹಡ ಜವಾಬ್ದಾರಿ ವ್ಹೋವ್ನು ಘೇವ್ನು ತಿತ್ಲೇಚಿ ಚಾಂಗ ನಿರ್ವಹಣ ಕೆಲೀಲೆ ಆಸ್ಸಾ. ತೆದ್ನಾ ತಾನ್ನಿ ಧಾರವಾಡ ಗೌಡ ಸಾರಸ್ವತ ಬ್ರಾಹ್ಮಣ ಸಮಾಜಾಚೆ ಕಾರ್ಯಕಾರಿ ಸಮಿತಿಚೆ ಸದಸ್ಯ ವರೇನ ಜಾವ್ನಾಶ್ಶಿಲೆ.
ವೃತ್ತಿ ಆನಿ ಸಮಾಜಾ ಸೇವಾ ಕ್ಷೇತ್ರಾಂತು ಅಪಾರ ಸಾಧನ ಕೆಲೀಲೆ ಶ್ರೀ ರತ್ನಾಕರ ಕೆ. ಪೈ ಹಾಂಕಾ ಆತ್ತ 8೦ಚೆ ಸಂಭ್ರಮು. ತತ್ಸಂಬಂಧ ತಾಂಗೆಲೆ ಸಹಸ್ರ ಚಂದ್ರ ದರ್ಶನ ಶಾಂತಿ ಸೋಮಾರಾ, ಹೇಂಚಿ ಎಪ್ರಿಲ್ 21ಕ ಧಾರವಾಡಾಚೆ ಸರಸ್ವತಿ ನಿಕೇತನಾಂತು ಚೊಲ್ಚೆ ಆಸ್ಸಾ. ಶ್ರೀ ರತ್ನಾಕರ ಕೆ. ಪೈ ಆನಿ ಶ್ರೀಮತಿ ಶಾರದಾ ಆರ್. ಪೈ ಹಾಂಗೆಲೆ ಆದರ್ಶ ದಾಂಪತ್ಯ, ಸಾಧನಾ ಆಯಚೆ ತರ್ನಾಟೆಂಕ ಸಕಡಾಂಕ ಆದರ್ಶ ಜಾವೋ ಮ್ಹೊಣು ಅಪೇಕ್ಷ ಕರತಾ ಪರಮಾತ್ಮು ಮುಖಾರಿ ವರೇನ ತಾಂಕಾ ಚಾಂಗ ಆಯುಷ್ಯ, ಆರೋಗ್ಯ ದಿವನು ರಕ್ಷಣ ಕೊರೊ ಮ್ಹೊಣು ದೇವಾಲಾಗ್ಗಿ ಮಾಗಣಿ ಕರತಾ.