ಉಡ್ಪಿಂತು ಶ್ರೀ ಲಕ್ಷ್ಮೀವೆಂಕಟರಮಣ ದೇವ್ಳಾಚೆ ೧೨೫ ವರ್ಷಾಚರಣೆ ಪ್ರಯುಕ್ತ ಅಖಂಡ ಭಜನಾ ಮಹೋತ್ಸವು

ಉಡುಪಿಂತು ದ್ವೈತ ಮತ ಪ್ರತಿಪಾದಕ ಮಧ್ವಾಚಾರ್ಯಾಂಗೆಲೆ ಕಾಲಾಪಶಿ ಮಾಕಶಿಚಾನ ಗೌಡ ಸಾರಸ್ವತ ಬ್ರಾಹ್ಮಣ ಸಮುದಾಯ ಅಸ್ತಿತ್ವಾಂತು ಆಶ್ಶಿಲೆ. ಮಧ್ವಾಚಾರ್ಯಾನಿ ಶ್ರೀ ಕೃಷ್ಣಾಕ ಉಡುಪಿಂತು ಪ್ರತಿಷ್ಠಾಪನ ಕೊರನು ಉಡುಪಿ ಪಾವನ ಜಾವಚೆ ವರಿ ಕೆಲ್ಲೆ. ಉಡುಪಿ ಶ್ರೀ ಕೃಷ್ಣಾಲೆ ದೇವಳಾಚಾನ ಥೊಡೆ ದೂರಾಂತು ಆಸ್ಸುಚೆ ತೆಂಕಪೇಟೆಂತು “ಭಕ್ತಭೀಷ್ಠ ಪ್ರದಾಯಕ” ಮ್ಹೊಣು ಭಕ್ತಾ ತಾಕೂನು ಆಪೋನು ಘೆವ್ಚೆ ಶ್ರೀ ಲಕ್ಷ್ಮೀವೆಂಕಟೇಶ ದೇವಾಲೆ ಏಕಶಿಲಾ ವಿಗ್ರಹ ಪರಮ ಪೂಜ್ಯ ಶ್ರೀಮದ್ ವರದೇಂದ್ರ ತೀರ್ಥ ಶ್ರೀಪಾದ ಸ್ವಾಮ್ಯಾಂಗೆಲೆ ಅಮೃತ ಹಾತ್ತಾನಿ ೧೮೯೬ ಎಪ್ರಿಲ್ ೨೯ಕ ಪ್ರತಿಷ್ಠಾಪಣ ಕೆಲ್ಲಿ. ಶ್ರೀ ದೇವಳಾಂತು ವೆಗಳೆ ಸಬಾರ ಉತ್ಸವ ಮ್ಹಣಕೆ ಶಂಬರಬಽರಿ ವರ್ಷಾಚಾನ ಶ್ರಾವಣಾಂತು ವಿಜೃಂಭಣೆರಿ ಭಜನಾ ಸಪ್ತ ಚಲೋನು ಘೇವನು ಎತ್ತಾ ಆಸ್ಸಾತಿ.
ಆತ್ತ ಉಡುಪಿ ಶ್ರೀ ಲಕ್ಷ್ಮೀ ವೆಂಕಟೇಶ ದೇವಳಾಚೆ ಶತಮಾನೋತ್ತರ ರಜತ ಮಹೋತ್ಸವ ೧೨೫ ವರ್ಷಾಚರಣೆ ಪ್ರಯುಕ್ತ ೧೨೫ ದಿವಸಾಂಚೆ ಅಹೋರಾತ್ರಿ ಅಖಂಡ ಭಜನಾ ಮಹೋತ್ಸವ ಚಲ್ತಾ ಆಸ್ಸುನು ಹೇ ಮಹೋತ್ಸವಾಕ ಶ್ರೀ ಪುರಂದರ ಜಯಂತಿ ಆರಾಧನೆಚೆ ಪರ್ವಕಾಲಾರಿ ಹೇಂಚಿ ವರ್ಷ ಜನವರಿ ೨೯ಕ ಕಾಶಿ ಮಠ ಸಂಸ್ಥಾನಾಚೆ ಮಠಾಧಿಪತಿ ಪೂಜ್ಯಶ್ರೀ ಶ್ರೀಮದ್ ಸಂಯಮೀಂದ್ರ ತೀರ್ಥ ಸ್ವಾಮ್ಯಾನಿ ದಿವೋ ಜಳೋನು ಚಾಲನಾ ದಿಲ್ಲಿ. ೧೨೫ ದಿವಸಾಚೆ ಭಜನಾ ಮಹೋತ್ಸವಾಂತು ಪ್ರತಿ ದೋನ ಘಂಟ್ಯಾಕ ಏಕ್ಕೇಕ ತಂಡ ಬಾಂದೂನು ವೇಳು ನಿಗ್ದಿ ಕೆಲ್ಲ್ಯಾ. ಸುಮಾರ ೨೫೦ ಪಶಿ ಚ್ಹಡ ಸಂಗೀತ ಕಲಾವಿದಾನ ವಾಂಟೊ ಘೆವ್ಚೆ ನಿರೀಕ್ಷಾ ಆಸ್ಸಾ. ಗಾಂವ್ಚೆ- ಪರಗಾಂವ್ಚೆ ಶಂಬರಬಽರ ಭಜನಾ ತಂಡ ವಾಂಟೊ ಘೆತ್ತಾತಿ ಆನಿ ಪ್ರತಿ ಆಯ್ತವಾರು ಸಾಂಜವಾಳಾ ನಗರ ಭಜನಾ ಚಲ್ತಾ ಮ್ಹೊಣು ಭಜನಾ ಮಹೋತ್ಸವಾಚೆ ರೂವಾರಿ ಮಟ್ಟಾರ್ ಸತೀಶ್ ಕಿಣಿ ತಾನ್ನಿ ಹೇ ವೇಳ್ಯಾರಿ ಕಳಯಿಲಾ.

ಉಪರಾಂತ ಚಿತ್ರಾಪುರ ಮಠಾಧೀಶ ಶ್ರೀಮದ್ ಸದ್ಯೋಜಾತ ಶಂಕರಾಶ್ರಮ ಸ್ವಾಮೆಂ ಫೆಬ್ರವರಿ ೧೧ಕ ಯವ್ನು ಭಜನಾ ಸಂಕೀರ್ತನೆಂತು ವಾಂಟೊ ಘೇವನು ಆಶೀರ್ವಚನ ದಿಲ್ಲೆ. ಸಂವ್ಸಾರ ಪಾಡ್ವೆಚೆ ಪರ್ವಕಾಲಾರಿ ಗಿಂಡಿ ನರ್ತನ ಕಲಾವಿದ ಜಾಲೀಲೆ ಶ್ರೀ ನಾಡಾ ಸತೀಶ್ ನಾಯಕ್, ಶ್ರೀ ಚೇಂಪಿ ರಾಮಚಂದ್ರ ಅನಂತ ಭಟ್ ಉಡುಪಿ ತಶೀಚಿ ಪ್ರಶಾಂತ್ ಆಚಾರ್ಯ ಬಸ್ರ್ರೂರು ಹಾನ್ನಿ ಗಿಂಡಿನರ್ತನ ಸೇವಾ ಪಾವಯಿಲೆ.
ಸಂವ್ಸಾರಪಾಡ್ವೆಚೆ ಹೆರ್‍ದೀಸು ಮಾರ್ಚ್ ೩೧ಕ ಉಡುಪಿ ಶ್ರೀ ಲಕ್ಷ್ಮೀ ವೆಂಕಟೇಶ ದೇವಳಾಕ ಶ್ರೀ ಕೈವಲ್ಯ ಮಠ ಸಂಸ್ಥಾನಾಚೆ ಮಠಾಧಿಪತಿ ಪೂಜ್ಯಶ್ರೀ ಶ್ರೀಮದ್ ಶಿವಾನಂದ ಸರಸ್ಪತಿ ಶ್ರೀಪಾದ ಸ್ವಾಮೆಂ ಭೇಟಿ ದಿಲ್ಲೆ. ದೇವಳಾಚೆ ತರಪೇನಿ ಪೂಜ್ಯ ಸ್ವಾಮ್ಯಾಂಕ ವಾಜ್ಜಪ, ವೇದಘೋಷ ತಶೀಚಿ ಪೂರ್ಣಕುಂಭ ಬರಶಿ ಯೇವ್ಕಾರ ಕೆಲ್ಲಿ. ಪೂಜ್ಯ ಸ್ವಾಮೆಂ ಶ್ರೀ ಲಕ್ಷ್ಮೀ ವೆಂಕಟೇಶ ದೇವಾಲೆ, ಪರಿವಾರ ದೇವಾಲೆಂ ಆನಿ ಶ್ರೀ ವಿಠೋಬ ರಖುಮಾಯಿ ದೇವಾಲೆ ದರ್ಶನ ಘೆತ್ಲಿಂತಿ. ಶ್ರೀ ದೇವಳಾಚೆ ತರಪೇನಿ ಕಾಣಿಕಾ, ಪಾದಪೂಜಾ ಸ್ವೀಕಾರ ಕೊರನು ಜಮೀಲೆ ಭಕ್ತಾಧಿಂಕ ಆಶೀರ್ವಚನ ಆನಿ ಫಲಮಂತ್ರಾಕ್ಷತ ದಿಲಿ.
ಆಪಣೇಲೆ ಆಶೀರ್ವಚನಾಂತು ಪೂಜ್ಯ ಸ್ವಾಮ್ಯಾನಿಂ `೧೨೫ ವರ್ಷಾಚರಣೆ ಪ್ರಯುಕ್ತ ೧೨೫ ದಿವಸಾಚೆ ಅಹೋರಾತ್ರಿ ಅಖಂಡ ಭಜನಾ ಮಹೋತ್ಸವ ಚಲಯತಾ ಆಸ್ಸುಚೆ ಸಂತಸ ಹಾಡಲಾ. ದೇವಾಲೆ ನಾಮಸ್ಮರಣಿ ಮ್ಹಣಚೆ ಯಜ್ಞ ಕಾರ್ಯಾಕ ಸಮ್ಮ ಜಾಲ್ಲ್ಯಾ. ಮನುಷ್ಯಾಲೆ ಜೀವನಾಂತು ಪರಮೇಶ್ವರಾಲೆ ಕೃಪಾ ಜೋಡ್ನು ಘೆವಚೆ ಮುಖ್ಯ ಲಕ್ಷ ಜಾವ್ನಾಸ್ಸುಚೆ ವೊಚ್ಚುನು ನಿರಂತರ ಭಗವಂತಾಲೆ ಆರಾಧನೆನಿ ಖಂಡಿತಾ ಮುಕ್ತಿ ಪ್ರಾಪ್ತಿ ಜಾತ್ತಾ. ವೈದಿಕ ಧರ್ಮಾಕ ಆಮ್ಮಿ ಪ್ರಾಧಾನ್ಯತಾ ದಿವಕಾ. ಕಿತಯಾಕ ಮ್ಹಳಯಾರಿ ಪರಮಾತ್ಮ ತಾಕುನೂಯಿ ವೇದ ನಿರ್ಮಾಣ ಜಾವ್ನಾಶ್ಶಿಲೆ ನಿಮಿತ್ತ್ಯಾನಿ ತ್ಯಾ ಸತ್ಯ ಜಾವ್ನಾಸ್ಸಾ. ಜ್ಞಾನ ಸ್ವರೂಪಿ ಜಾವ್ನಾಸ್ಸಾ. ಆಮ್ಗೆಲೆ ಸಕಡಾಲೆ ಉದರ್ಗತಿಕ ಕಾರಣೀಭೂತ ಜಾವ್ನಾಸ್ಸಾ. ತ್ಯಾ ವಿಸರೂಕ ನಜ್ಜ. ಆಮ್ಗಲೆ ಮ್ಹಾಲ್ಗಡ್ಯಾನಿ ಆರಂಭ ಕೆಲೀಲೆ ಹರಿನಾಮ ಸಂಕೀರ್ತನೇಕ ಗುರೂಂಗೆಲೆ ತಶೀಚಿ ಶ್ರೀ ದೇವಾಲೊ ವಿಶೇಷ ಅನುಗ್ರಹ ತುಮ್ಗೆಲೆ ಸಕಡಾಲೆ ವಯ್ರಿ ಕೆದನಾಂಯಿ ಆಸ್ಸೊ ಮ್ಹೊಣು ಅನುಗ್ರಹ ಕೆಲ್ಲಿ.

ದೇವಳಾಚೆ ಪ್ರಧಾನ ಅರ್ಚಕ ವಿನಾಯಕ ಭಟ್, ವೇದ ಮೂರ್ತಿ ಚೇಂಪಿ ರಾಮಚಂದ್ರ ಭಟ್, ದೇವಳಾಚೆ ಮೊಕ್ತೇಸರ ಪಿ ವಿ ಶೆಣೈ, ದೇವಳಾಚೆ ಭಜನಾ ಮಂಡಳಿಚೆ ಅಧ್ಯಕ್ಷ ಮಟ್ಟಾರ್ ಸತೀಶ್ ಕಿಣಿ, ಸಂತೋಷ್ ವಾಗ್ಲೇ, ಆಡಳಿತ ಮಂಡಳಿ ಸದಸ್ಯ ಜಾಲೀಲೆ ವಸಂತ್ ಕಿಣೆ , ಪುಂಡಲೀಕ್ ಕಾಮತ್, ಶಾಂತಾರಾಮ್ ಪೈ, ಗಣೇಶ್ ಕಿಣಿ, ಉಮೇಶ್ ಪೈ, ಕೈಲಾಸನಾಥ ಶೆಣೈ, ನಾರಾಯಣ ಪ್ರಭು, ಅಶೋಕ ಬಾಳಿಗ, ರೋಹಿತಾಕ್ಷ ಪಡಿಯಾರ್ ತಶೀಚಿ ವೆಗವೆಗಳೆs ಭಜನಾ ಮಂಡಳಿ ಸದಸ್ಯ, ಜಿ ಎಸ್, ಬಿ ಯುವಕ ಆನಿ ಮಹಿಳಾ ಮಂಡಳಿ ಸದಸ್ಯ, ಗಾಂವ್ಚೆ ಪರಗಾಂವ್ಚೆ ಹಜಾರ ಬಽರಿ ಸಮಾಜ ಭಾಂದವ ಹೇ ವೇಳ್ಯಾರಿ ಉಪಸ್ಥಿತ ವ್ಹರಲೀಲೆ. ವಿಶೇಷ ಸೂಚನಾ : ಕೈವಲ್ಯ ಮಠಾಧೀಶ ಪರಮ ಪೂಜ್ಯ ಶ್ರೀಮದ್ ಶಿವಾನಂದ ಸರಸ್ವತಿ ಸ್ವಾಮ್ಯಾನಿ ಉಡುಪಿ ಶ್ರೀ ಲಕ್ಷ್ಮೀವೆಂಕಟೇಶ ದೇವಳಾಕ ದಿಲೀಲೆ ಭೇಟೆ ಆನಿ ತಾನ್ನಿ ದಿಲೀಲೆ ಆಶೀರ್ವಚನಾಚೆ ಸಾಕ್ಷಾತ ವೀಕ್ಷಣ ಆಮ್ಗೆಲೆ ಸರಸ್ವತಿ ಪ್ರಭಾ ಯೂಟ್ಯೂಬ್ ಚಾನಲ್ಲಾಚೆಸರಸ್ವತಿ ಪ್ರಭಾ ಸುದ್ಧಿ-ಸಮಾಚಾರ https://youtu.be/LiOypvkJFkQ?si=O8wE61wy9Jr5ilhO ಹೇ ಲಿಂಕಾಂತು ಮೆಳ್ತಾ. ಮುದ್ದಾಂ ವೀಕ್ಷಣ ಕರಾ. ದುಸರ್‍ಯಾಂಕ ಸಾಂಗಾತಿ. ಸಬ್‌ಸ್ಕೈಬ್ ಜಾಯಾತಿ.

Video Link : https://youtu.be/LiOypvkJFkQ?si=bqo_abNfs4Yjl7EA