ಶ್ರೀ ಕಾಶೀಮಠಾಧೀಶ ಶ್ರೀಮದ್ ಸಂಯಮಿಂದ್ರ ತೀರ್ಥ ಸ್ವಾಮ್ಯಾಂಗೆಲೆ ಅಯೋದ್ಯಾ ವಾಸ್ತವ್ಯ ದಿನಾಂಕ. ೨೭-೦೬-೨೦೨೪ ತಾಕೂನು ೦೨-೦೭-೨೦೨೪ ಪರ್‍ಯಂತ ಅಯೋಧ್ಯಾಚೆ ಶ್ರೀ ರಾಮಮಹಾಲ, ವೈದೇಹಿ ಭವನ ಹಾಂಗಾ ಚಲ್ಲೆ.
ಹೇ ವೇಳ್ಯಾರಿ ಜಮೀಲೆ ಹಜಾರಬಽರಿ ಶಿಷ್ಯಕೋಟಿಕ ಆಶೀರ್ವಚನ ಕರತಾ ಪೂಜ್ಯ ಶ್ರೀಮದ್ ಸಂಯಮೀಂದ್ರ ತೀರ್ಥ ಸ್ವಾಮ್ಯಾನಿ ಅಯೋಧ್ಯಯಾಚೆ ಗುಣಗಾನ ಕೆಲ್ಲಿ. ಆಜಿ ಆಮ್ಮಿ ಅತ್ಯಂತ ಪುಣ್ಯ ಕ್ಷೇತ್ರಾಂತು ಆಸ್ಸಾತಿ. ಅಯೋಧ್ಯಾ ಹೇ ಕ್ಷೇತ್ರ ಮನೂನ ನಿರ್ಮಾಣ ಕೆಲೀಲೆ. ಸೂರ್ಯವಂಶ ರಾಯಾಲೆ ನಗರಿ. ಸೂರ್ಯಾವರಿ ಭಾರತ ದೇಶಾಕ ಪ್ರಕಾಶ ದಿಲೀಲೊ ರಾಯಾಲೆ ಗಾಂವ ಹೇ. ಜಗತ್ತ್ಯಾಕ ಮಸ್ತ ಬರೇಪಣ ಕಲೇಲೆ ರಾಯಾಲೆ ಗಾಂವು ಹೋ. ಕಿತಲಕಿ ಅಶ್ವಮೇಧ ಯಾಗ ಕೆಲೀಲೆ ಗಾಂವ. ತ್ಯಾ ಖಾತ್ತಿರಿಚಿ ಶ್ರೀ ರಾಮಚಂದ್ರ ಪರಮಾತ್ಮಾನಿ ಹಾಂಗಾ ಅವತಾರ ಘೆತ್ಲೆ. ಸಪ್ತ ನಗರಿಂತು ಅಯೋಧ್ಯಾ ವರೇನ ಆಸ್ಸಾ. ತಸ್ಸಾಲೆ ಪರಮ ಪವಿತ್ರ ಗಾವಾಂತು ಆಜಿ ಆಮ್ಮಿ ಆಸ್ಸಾತಿ. ದೇವಾಲೆ ದಯಾ ಜಾಲ್ಯಾರಿ ಖಂಚೇಯಿ ದೋಷ ಆಸಲೇರಿಚಿ ನಿವಾರಣ ಜಾತ್ತಾ. ಸಂಸ್ಕೃತ ಶಿಕಲಾರಿ ಸಂಸ್ಕಾರ ಯತ್ತಾ ವ್ಹಹಿ, ಸಂಸ್ಕೃತ ವೈಜ್ಞಾನಿಕ ಭಾಸ ಜಾವ್ನಾಸ್ಸುಕ ಪುರೊ. ಜಾಲಯಾರಿ ತಾಜ್ಜೆ ಪಶಿ ಪಯಲೆ ಆಮ್ಮಿ ಮಾತೃಭಾಸ ಕೊಂಕಣಿ ಶಿಕ್ಕಾ. ಆಜಿ ಆಮ್ಮಿ ಆಮ್ಗೆಲೆ ಮಾತೃಭಾಷೆಕ ಭಾಷೆಕ ಅವಮರ್ಯಾದ ಕರತಾ ಆಸ್ಸಾತಿ. ಸುರವೇಕ ಆಮ್ಮಿ ಆಮ್ಗೆಲೆ ಭಾಸ ಶಿಕ್ಕಾ ಮ್ಹೊಣು ತಾನ್ನಿ ಅಪೋವ್ನಿ ದಿಲ್ಲೆ. ತಾನ್ನಿ ದೇಡ ಹಜಾರ ಶಿಷ್ಯಕೋಟಿ ಸಮಾಜ ಬಾಂಧವಾಂಕ ಘೇವ್ನು ಅಯೋಧ್ಯಾಂತು ಶ್ರೀ ಬಾಲರಾಮಾಲೆ ದರ್ಶನ ಘೇವ್ನು ಯವ್ನು ಆಶೀರ್ವಚನ ದಿತ್ತಾ ಆಶ್ಶಿಲೆ. ಹಜಾರ ಬಽರಿ ಸಮಾಜ ಬಾಂದವ ಹೇ ಸಂದರ್ಭಾರಿ ಉಪಸ್ಥಿತ ಆಶ್ಶಿಲೆ.ಶ್ರೀ ರಾಮಾಯಣ ಆಯ್ಕಲೀಲೆ ನಿಮಿತ್ತ್ಯಾನ ಮನ ಶುದ್ಧಿ ಜಾತ್ತಾ, ಶ್ರವಣ ಶುದ್ಧಿ ಜಾತ್ತಾ. ರಾಮಾನ ಕೆಲ್ಲೇಲೆ ಕೊರಕಾ ಕಂಯಿ, ಕೃಷ್ಣಾನ ಸಾಂಗಿಲೆ ಕೊರಕಾ ಕಂಯಿ ಕಿತಯಾಕ ಮ್ಹಳಯಾರಿ ಕೃಷ್ಣಾನ ಕೆಲೀಲೆ ಆಮಚಾನ ಕೊರುಕ ಜಾಯ್ನಾ ಜಾಲಯಾರಿ ರಾಮಾನ ಕೆಲೀಲೆ ಆಮಚಾನ ಕೊರುಕ ಜಾತ್ತಾ. ತ್ಯಾ ಖಾತ್ತಿರಿ ಶ್ರೀ ರಾಮು ಆದರ್ಶಪುರುಷ ಜಾವ್ನು ದೆಕ್ಕು ಪಡ್ತಾ. ಆನಾಮ್ಮಾಕ ಪಳಯಕಾ, ಆನಮ್ಮಾಕ ಮರ್ಯಾದ ದಿವ್ಕಾ ಮ್ಹೊಣು ತಾಣೆ ದಾಕೋನು ದಿಲ್ಲೆ. ಮ್ಹೊಣು ತಾನ್ನಿ ಯುವಕಾರಾಂಕ ಜೀವನಾಂತು ಕಶ್ಶಿ ಚಮಕೂಕಾ ಮ್ಹೊಣು ಮಾರ್ಗದರ್ಶನ ದಿಲ್ಲಿ. ಥಂಚಾನ ಸ್ವಾಮೆ ದೆಹಲಿಚೆ ಗೌಡಸಾರಸ್ವತ ಸಮಾಜಾಚೆ ಸಾರಸ್ವತ ಸಂಸ್ಕೃತಿ ಭವನಾಕ ಘೆಲ್ಲೆ. ಥಂಯಿ ಜುಲೈ ೪ ತಾರೀಖೆ ಪರ್‍ಯಂತ ಮೊಕ್ಕಾಂ ಉರ್ನು ಮಾಗಿರಿ ಹರಿದ್ವಾರಾಚೆ ವಾಸಾಶ್ರಮಾಕ ವತ್ತಾತಿ.