ಸಗಳೆ ವರಸಾಂತು ಖಂಚೇಯಿ ಮಾಸ ಕಾಡಾ. ಜಾಲಯಾರಿ ಸಗಳೆ ಮಾಸಾ ಸರ್ವ ದಿವಸು ಏಕ ನ್ಹಂಹಿ ಏಕ ನಮೂನ್ಯಾನಿ ವಿಶೇಷ ಜಾವ್ನು ಆಸ್ಸುಚೆ ಮ್ಹಹಿನೋ ಮ್ಹಳಯಾರಿ ತ್ಯಾ ಶ್ರಾವಣ ಮಾಸು. ಶ್ರಾವಣಾಂತು ಸೋಮಾರು ಈಶ್ವರಾಲೆ ಪೂಜನ ಕರತಾತಿ, ಮಂಗಳವಾರ ದೇವಿಕ, ಶುಕ್ರವಾರ ಅಂತೂ ಲಕ್ಷ್ಮೀ, ಸರಸ್ವತಿಕ ವಿಸರಚೆ ತಶ್ಶಿ ನಾ, ಆಮ್ಚಗೇಲೆ ಬಾಯ್ಲಮನ್ಶೆಂಕ ಅಂತೂ ಶ್ರಾವಣ ಶುಕ್ರಾರ ಆನಿ ಆಯ್ತವಾರು ಚೂಡಿ ಸಂಭ್ರಮಾಚೆ ವಿಶೇಷ. ಶ್ರಾವಣ ಯವ್ಚೆ ಪಾವ್ಸಾಡಿಚೆ ಮಧೇಂತು. ತೆದ್ದನಾ ಜೀರ್ಣಕ್ರಿಯ ಮಂದ ಜಾವ್ನು ಆಸತಾ. ಪಯ್ಲೆ ಕಾಲಾಂತು ಖೇತ್ಕಿ ಇತ್ಯಾದಿ ಕಾಮ ಪೂರ್ತಿ ಜಾವನು ಲೋಕ ಆರಾಮ ಘೆತ್ತಾ ಉರತಾತಾಶ್ಶಿಲೆ. ಸಕ್ಕಡೆ ನಾನಾ ನಮೂನ್ಯಾಚೆ ಕ್ರೀಮಿ-ಕೀಟ ಜನ್ಮುನು ಆಸತಾತಿ. ನಾನಾ ನಮೂನ್ಯಾಚೆ ದೋಷ ಶರೀರ ಭಿತ್ತರಿ ರಿಗಚೆ ಸಾಧ್ಯತಾಂಯಿ ಆಸ್ಸಾ. ಹೇ ಸಂದರ್ಭಾರಿ ರೋಗನಿರೋಧಕ ಶಕ್ತಿ ಕಮ್ಮಿ ಜಾಲಯಾರಿ ಮನುಷ್ಯಾಕ ನಾನಾ ನಮೂನ್ಯಾಚೆ ರೋಗ ಯತ್ತಾ. ತ್ಯಾ ಖಾತ್ತಿರಿ ಮನುಷ್ಯಾನಿ ತಾಗೆಲೆ ಕಾರ್ಯಚಟುವಟಿಕಾ ಚ್ಹಡ ಕೊರನು ಘೆವ್ಕಾ. ಖೇತ್ಗಿ ಕಾಮ ಜಾಲ್ಲೆ ಆನಿ ಪುರುಸೊತ್ತಿ ಮ್ಹೊಣು ಘರಾ ಭಿತ್ತರೀಚಿ ಅಂಟೂನು ಭೊಸಚಾಕ ನಜ್ಜ. ತ್ಯಾ ಖಾತ್ತಿರಿ ತಾಂಕಾ ಭಾಯರ ಹಾಡಯಚಾಕ ಏಕ್ಕೇಕ ಬಗಲೇನ ಏಕ್ಕೇಕ ನಮೂನ್ಯಾಚೆ ಪರಭ ಆಚರಣೆಕ ಆಯಲೆ. ಶ್ರಾವಣಾಂತು ಕೊಂಕಣಿ ಬಾಯ್ಲಮನೀಷಿ ಶುಕ್ರಾರು, ಆಯ್ತವಾರು ಗೆದ್ದೆ ಅಂಚಕಿ, ಘರಾ ಭಾಯ್ರಿ ವಚ್ಚುನು ಜಾಲೀಲೆ ನಾನಾ ನಮೂನ್ಯಾಚೆ ಪತ್ರಿ, ಫೂಲ ಹಾಡ್ನು ತುಳಸಿಕ ಚೂಡಿ ಕೊರನು ದವರೂನು ಪೂಜಾ ಕರತಾ, ಉತ್ತರ ಕರ್ನಾಟಕಾಂತು ಪ್ರತಿ ದಿವಸು ಬಾಯ್ಲಮನೀಷಿ ಬೆಗ್ಗಿ ಉಟಾನು ನಾವ್ನು ಸಕ್ಕಾಣಪೂಡೆ ಬನ್ನಿರುಕ್ಕಾಕ ಪ್ರದಕ್ಷಿಣ ಕಾಡ್ನು ಯತ್ತಾತಿ. ಮ್ಹಳಯಾರಿ ಶರೀರಾಚೆ ಕಾರ್ಯಚಟುವಟಿಕಾ ಚ್ಹಡ ಚ್ಹಡ ಕೊರನು ಜೀರ್ಣಶಕ್ತಿ ವೃದ್ಧಿ ಕೊರನು ಘೆವಚಾಕ, ಹಳಶೀಲೆ, ಮಾಕಸಿ ದಿವಸು ಕೆಲೀಲೆ ಆಹಾರ ಖಾವ್ನು ಶರೀರಾಂತು ದೋಷ ಚ್ಹಡ ಕೊರನು ಘೆವಚಾಕ ನಜ್ಜ ಮ್ಹಣಚೆ ಖಾತ್ತಿರಿ ಧಾರ್ಮಿಕ ಆಚರಣೆಚೆ ಪರಭೆಚೆ ಪರಂಪರಾ ಚೋಲ್ನು ಯವ್ನಾಸ್ಸುಕ ಪುರೊ. ತೆದ್ನಾ ಮನೀಷು ದೇವಾ ವಯ್ಲೆ ಭಯ್ಯಾನಿ ಪೂಣಿ ತಾಜಾ, ಸಸ್ಯಾಹಾರಿ ರಾಂದಪ ಕೊರನು ಜವತಾಲೊ ಮ್ಹಣಚೆ ಸದುದ್ದೇಶ ಆಸ್ಸುಚಾಕ ಪುರೊ. ಉಪಾಸ ಕೊರನು ದೇಹ ದಂಡನ ಆನಿ ಶರೀರಾಕ ರಕ್ಷಣಾಯಿ ಹಾಜೇನ ಮೆಳ್ತಾ. ಒಟ್ಟಾರೆ ಆಮ್ಗೆಲೆ ದೈಹಿಕ ಆನಿ ಮಾನಸಿಕ ಆರೋಗ್ಯ ರಕ್ಷಣೇಚಿ ಪರಭೆ ಆಚರಣೇಚೆ ಮಾಕಸಿ ಆಸ್ಸುಚೆ ಮುಖೇಲ ಉದ್ದೇಶು.
ಭೀಮನ ಅಮಾಸ : ಆಷಾಢಾಚೆ ಅಖೇರಿಕ ಬೀಮನ ಅಮಾಸ ಯತ್ತಾ, ಸುವಾಸಿನಿ ಬಾಯ್ಲಮನೀಷಿ ಬಾಮ್ಣಾಲೆ ಪೂಜಾ ಕರತಾತಿ. ತಾಂಕಾ ಚಾಂಗ ಆಯುಷ್ಯ, ಆರೋಗ್ಯ ದೀ ಮ್ಹೊಣು ದೇವಾಲೆಂ ಮಾಗತಾತಿ. ಭೀಮನ ಅಮಾಸ ವಿಶೇಷ ಜಾವನು ದಕ್ಷಿಣ ಭಾರತಾಚೆ ಕರ್ನಾಟಕ, ಆಂಧ್ರ ಪ್ರದೇಶ ಆನಿ ತಮಿಳುನಾಡಾಂತು ಆಚರಣ ಕರತಾತಿ. ಹೇ ವೇಳ್ಯಾರಿ ಲಗ್ನ ಜಾಲೀಲೆ ಸುವಾಸಿನಿ ಬಾಯ್ಲಮನಶೆಂ ಆಪಣೇಲೆ ಬಾಮಣಾಕ ದೀರ್ಘಾಯುಷ್ಯ ಆನಿ ಯಶ ದೀ ಮ್ಹೊಣು ಮಾಗ್ಗೂನು ಉಪಾಸ ಕರತಾತಿ. ಬೈಣಿ ಬಾಂವಾಲೆ ಆಯುಷ್ಯ ಆನಿ ಆರೋಗ್ಯ ವಾಡ್ಡೂನು ತಾಕ್ಕಾ ಬರೇಪಣ ಜಾಂವೊ ಮ್ಹೊಣು ಉಪಾಸ ಕರತಾ. ಹೇಂಚಿ ದಿವಸು ಶಿವ-ಪಾರ್ವತಿಲೆ ಲಗ್ನ ಜಾಲೀಲೆ ದಿವಸು ಮ್ಹೊಣು ಈಶ್ವರ ಆನಿ ಪಾರ್ವತಿಕ ಪಾಯ್ಸು ಆನಿ ಗೊಡ್ಡಾಚೆ ನೆವ್ರಿ ನೈವೇದ್ಯ ಕೊರನು ಪೂಜ್ಜಿತಾತಿ. ಹಾಕ್ಕಾ ಪತಿ ಸಂಜೀವಿನಿ ವ್ರತ ಮ್ಹೊಣೂ ಆಪಯತಾತಿ.
ನಾಗರ ಪಂಚಮಿ : ಭೀಮನ ಅಮಾಸ ಜಾವನು ಪಾಂಚಾ ದಿವಸಾಂತು ನಾಗರ ಪಂಚಮಿ ಎತ್ತಾ. ಸರೋಪು ಮ್ಹಳಯಾರಿ ಖೇತ್ಗಾರಾಲೆ ಸ್ನೇಹಿತ. ತಾಣೆ ಖೇತಿ ಕೆಲೀಲ ತೆದ್ನಾ ಸಬಾರ ಕ್ರೀಮಿ-ಕೀಟ ಯವ್ನು ಮ್ಹೋವಾಳ ಆಸ್ಸುಚೆ ಅಂಕ್ರಿ, ಪಾನ ಕಾತ್ತಾತಿ. ಜಾಲಯಾರಿ ದಿವೋಡು ತೆದ್ನಾ ಭಾಯ್ರಿ ಯವ್ನು ತ್ಯಾ ಕ್ರೀಮಿ-ಕೀಟಾಕ ಖಾವ್ನು ಖೇತ್ಗಾರಾಂಕ ಉಪಕಾರ ಕರತಾತಿ. ಮಾತ್ರ ನ್ಹಂಹಿ ಪರಶುರಾಮ ದೇವಾನಿ ಸಮುದ್ರಾಚಾನ ನವೀನ ಭೂಭಾಗ ಘೆತ್ತಿಲೆ ತೆದ್ನಾ ಥಂಯಿ ಕೇವಲ ರೇವ ಭೊರನು ಆಶ್ಶಿಲ ಕಂಯಿ. ತ್ಯಾ ರೇವ ಮಾತ್ತಿ ಜಾವಚೆ ವರಿ ಕೆಲೀಲೆ ನಾಗಕುಲಾಚಾನ ಮ್ಹಣತಾತಿ. ತ್ಯಾ ಖಾತ್ತಿರಿ ಕರಾವಳಿ ಭಾಗಾಂತು ಆಜಿಕಂಯಿ ನಾಗಾಕ ಅಪಾರ ಶೃದ್ಧಾ-ಭಕ್ತಿ ದಾಖಯತಾತಿ. ನಾಗದೋಷ ಆಯಲೇರಿ ಚರಡುಂವ ಜಾಯ್ನಾತಿ ಮ್ಹಣ್ಚೆ ನಂಬಿಗಾ ಆಸ್ಸಾ. ಪ್ರತಿಯೇಕ ಕುಟುಂಭಾಕ ಏಕ್ಕೇಕ ಪ್ರತ್ಯೇಕ ನಾಗಬನ ಆಸ್ತಾ. ತಾಗೇಲೆ ಕೃಪೆ ಖಾತ್ತಿರಿ ನಾಗರ ಪಂಚಮಿ ದಿವಸು ಮಾತ್ರ ನ್ಹಂಹಿ ವ್ಹರಲೀಲೆ ದಿವಸು ವಿಶೇಷ ಪೂಜಾ, ಆಶ್ಲೇಷ ಬಲಿ, ನಾಗಮಂಡಲ ಆದಿ ಸೇವಾ ಚಲಾಯಿಸಿತಾತಿ. ಜನಮೇಜಯಾನಿ ನಾಗಕುಲಾಚೆ ನಾಶಾಕ ಆರಂಭ ಕೆಲೀಲೆ ಸರ್ಪಯಜ್ಞ ರಾಬಯಿಲೆ ದಿವಸು ಶ್ರಾವಣ ಮ್ಹಹಿನ್ಯಾಚೆ ಪಂಚಮಿ ದಿವಸು ಕಂಯಿ. ತಾಜ್ಜೆ ಉಡಗಾಸಾಕ ನಾಗರಪಂಚಮಿ ಆಚರಣ ಕರತಾತಿ ಮ್ಹೊಣೂ ಸಾಂಗತಾತಿ. ಉತ್ತರ ಕರ್ನಾಟಕಾಂತು ನಾಗರ ಪಂಚಮಿ ವಿಶೇಷ ದಿವಸು. ಹಾಂಗಾಚೆ ಖೇಡೆ ಗಾಂವಾಂತು ಚಾರಿ ದಿವಸು ಹೇ ಪರಬ ಆಚರಣ ಕರತಾತಿ. ಪಯ್ಲೆ ದಿವಸು ರೊಟ್ಟಿ ಪಂಚಮಿ, ತ್ಯಾ ನವೀನ ಜಾವ್ನು ಲಗ್ನ ಜಾಲೀಲೆ ಚೆಲ್ಲಿಯೋ ಪರಸ್ಪರ ಮೇಳ್ನು ತಾಂಗತಾಂಗೆಲೆ ಬಾಮ್ಣಾ ಘರ್‍ಚೆ ವಿಷಯು ಉಲೋನು ರೊಟ್ಟಿ ಜವಣ ಕರತಾತಿ. ನಾಗರ ಪಂಚಮಿಕ ಉತ್ತರ ಕರ್ನಾಟಕ ಭಾಗಾಂತು ಮಸ್ತ ನಮೂನ್ಯಾಚೆ ಉಂಡೊ ಬಾಂದಿತಾತಿ. ನಾಗಚೌತಿ ದಿವಸು ಸಕ್ಕಾಣಿ ಬೆಗ್ಗೀ ಉಟಾನು ನಾವ್ನು ಲಾಯ್ಯಾಪಿಟ್ಟಿಚೆ ಉಂಡೊ, ಉಸುಳಿ ಕೊರನು ನಾಗಾಕ ದೂದ್ದಾ ಅಭಿಷೇಕ ಕರತಾತಿ. ತೆದ್ನಾ ದೇವಾಲೆ ವಾಂಟೊ, ದಿಂಡಾಲೆ ವಾಂಟೊ, ಆನ್ನಾ(ಬಾಪ್ಪಾ)ಲೆ ವಾಂಟೊ, ಆಮ್ಮಾಲಿಂ ವಾಂಟೊ, ಆಕ್ಕಲಿಂ ವಾಂಟೊ ಅಭಿಷೇಕ ಕರತಾನಾ ಸಾಂಗತಾತಿ. ತೀಸರೆ ದಿವಸು ನಾಗರಪಂಚಮಿ. ನಾಗಬನಾಕ, ದೇವಳಾಕ ವಚ್ಚುನು ಅಭಿಷೇಕ ಕರತಾತಿ. ತ್ಯಾ ದಿವಸು ಖೊಬ್ರಿ ಅಡಚೂನು ಮೋಡ್ನು ಹುಂತ ಮೊಡಚೆ ಸಂಪ್ರದಾಯ ಕರತಾತಿ. ಅಮಾಸೆ ದಿವಸು ಕೆಲೀಲೆ ಮಾಥಿಯಾಚೆ ನಾಗಮೂರ್ತಿಕ ಗೆದ್ದೆಕ ವ್ಹರ್ನು ತಾಗೆಲೆ ಎದರಾಕ ಖಂಚತರಿ ನವೀನ ಕಾಮ ಕೊರಚೆ ಸಂಪ್ರದಾಯ ಚಲಯಸಿತಾತಿ. ಹಾಕ್ಕಾಅಂಬಲಿ ಚರಗ ಚೆಲ್ಲುವುದು ಮ್ಹಣತಾತಿ. ಲೋಕವೇದಾಂತು ವರೇನ ಹಾಕ್ಕಾ ಸಂಬಂಧ ಪಾವ್ವಿಲೆ ಕಾಣಿ ಮೆಳ್ತಾ.
ನಾಗಪಂಚಮಿ ದಿವಸು ಜೋಕಾಲಿ ಬಾಂದೂನು ಘೇವ್ನು ಲಾಂಬತಾತಿ(ಖೇಳತಾತಿ). ಕೆಲೀಲೆ ಉಂಡೊ, ಖೊಬ್ರಿ ವಾಳೆ ರುಕ್ಕಾಕ ಬಾಂದೂನು ಊಡಿ ಮಾರನು ತೊಂಡಾನಿ ಚಾಬ್ಬುನು ಹಾಡಚೆ, ಲಿಂಬಿಯೋ ಘೇವ್ನು ಕಿತ್ಲೆ ದೂರ ಉಡ್ಡಯಚಾಕ ಜಾತ್ತಕಿ ತಿತ್ಲೆ ದೂರ ಉಡ್ಡಯಚೆ ಅಶ್ಶಿ ನಾನಾ ನಮೂನ್ಯಾಚೆ ಸ್ಪರ್ಧಾ ಖೇಳು ಚಲ್ತಾ. ಪಾವ್ಸಾಡಿಂತು ಶರೀರಾಕ ತೀಳು, ಶೇಂಗಾ ಆದಿ ಪದಾರ್ಥಾಂತು ಆಸ್ಸುಚೆ ತೆಲ್ಲಾ ಅಂಶ ವಚ್ಕಾ ಮ್ಹೊಣು ತಾಜೇನ ಉಂಡೊ ಕೊರನು ಪರಸ್ಪರ ವಾಂಟೂನು ಘೆತ್ತಾತಿ. ಪಯಲೆ ದಿವಸಾಂತು ಕೆಲವ ವ್ಹಡ ವ್ಹಡ ಕುಟುಂಬಾಚೆ ಘರಾಣಿಂತು ಹಜಾರಗಟ್ಲೆ ಉಂಡೊ ಕೊರನು ವಾಂಟಿತಾಶ್ಶಿಲೆ ಕಂಯಿ. ಆತ್ತ ಜಾಲಯಾರೀಚಿ ವೆಗವೆಗಳೆ ನಮೂನ್ಯಾಚೆ ಉಂಡೊ, ನೆವ್ರಿ, ಚಕ್ಕುಲಿ ಇತ್ಯಾದಿ ಕೊರನು ಧಾ-ಪಂದ್ರ ದಿವಸು ದವರೂನು ಖಾವ್ನು ಶರೀರಾಕ ತೆಲ್ಲಾ ಅಂಶ ಚ್ಹಡ ಮೆಳ್ಚೆ ವರಿ ಕರತಾತಿ. ಕರಾವಳಿ ಭಾಗಾಂತು ವೈಷ್ಣವ ಲೋಕ ಶ್ರೀ ಕೃಷ್ಣ ಜನ್ಮಾಷ್ಟಮಿಕ ನಾನಾ ನಮೂನ್ಯಾಚೆ ಉಂಡೊ ಕೊರನು ಶ್ರೀ ಕೃಷ್ಣ ಪರಮತ್ಮಾಕ ಅರ್ಪಣ ಕೊರನು ಆಠ್ವಡೆಗಟ್ಲೆ ದವರೂನು ಕಾತ್ತಾತಿ. ಆಚರಣ ವೆಗವೆಗಳೆ ಜಾಲಯಾರಿಚಿ ದೊನ್ನೀ ಕಡೇಚೆ ಉದ್ದೇಶ ಮಾತ್ರ ಏಕ್ಕಽಚಿ, ಆರೋಗ್ಯ ರಕ್ಷಣ. ಉದ್ದೇಶ ಏಕ್ಕಽಚಿ ಮ್ಹಣಚೆ ನಜರಾಂತು ದವರೂನು ಘೆವ್ಕಾ.
ಶ್ರಾವಣ ಸೋಮಾರ : ಭಜಕ ಶ್ರಾವಣ ಸೋಮಾರ ಉಪಾಸ ವ್ಹರ್ನು ಶೈವ ಈಶ್ವರಾಕ ವಿಶೇಷ ಪೂಜಾ, ಮಾಗಣಿ ಕರತಾತಿ. ಲಗ್ನ ಜಾಯನಾತ್ತಿಲೆ ಚಾಂಗ ಸಂಗಾತಿ ಮೆಳೊ ಮ್ಹೊಣು ಮಾಗಲೇರಿ, ಲಗ್ನ ಜಾಲೀಲೆ ಸಂಸಾರಾಂತು ಅನ್ಯೋನ್ಯತಾ ಆಸ್ಸೊ, ಸಂತೋಷ ಆಸ್ಸೊ, ಭವಿಷ್ಯಾಂತು ಆಮ್ಕಾ ಚಾಂಗ ಜಾವೋ ಮ್ಹೊಣು ಮಾಗತಾತಿ. ತ್ಯಾ ದಿವಸು ದೂದ, ಫಳ ಮಾತ್ರ ಘೇವ್ನು ಉಪಾಸಿ ವ್ಹರ್ನು ಓಂ ನಮಃ ಶಿವಾಯ ಮ್ಹಣ್ಚೆ ಜಪ ಕರತಾ ವ್ಹರತಾತಿ. ಈಶ್ವರಾಲೆ ದೇವಳಾಕ ವಚ್ಚುನು ಅಭಿಷೇಕ ಕರತಾತಿ, ಬಿಲ್ವಪತ್ರಾ ಸಮರ್ಪಣ ಕರತಾತಿ. ರುದ್ರಾಭಿಷೇಕ ವರೇನ ಕರತಾತಿ. ಪ್ರದೋಷ ಪೂಜಾ ಕರತಾತಿ. ಈಶ್ವರಾಕ ೧೦೮ ಬಿಲ್ಪತ್ರೆನಿಓಂ ನಮಃ ಶಿವಾಯ ಬಿಲ್ವಾರ್ಚನ ಕರತಾತಿ. ಉತ್ತರ ಕರ್ನಾಟಕಾಚೆ ಭಾಗಾಂತು ಶ್ರಾವಣ ಸೋಮಾರ ಅಲ್ಲೀಕೇರಿ ಮ್ಹಣಚೆ ಕಾರ್ಯಕ್ರಮ ಚಲ್ತಾ. ಶ್ರೀ ಸಂಸ್ಥಾನ ಕವಳೇ ಮಠಾಧೀಶ ತ್ಯಾ ದಿವಸು ಸರ್ವ ಶ್ರಾವಣ ಸೋಮಾರ ಸಾಂಜವಾಳಾ ಪ್ರದೋಷ ಪೂಜಾ ಕರತಾತಿ. ಶ್ರಾವಣ ಮಂಗಳ್ವಾರು : ಶ್ರಾವಣ ಮಂಗಳ್ವಾರು ಸುವಾಸಿನಿ ಬಾಯ್ಲಮನೀಷಿ ತಾಂಗತಾಂಗೆಲೆ ಕೂಳಾರಾಕ ಯವ್ನು ಚಾರ ಮಂಗಳ್ವಾರ ಉಪಾಸಿ ಉರ್ನು ಮಂಗಳಗೌರಿ ವ್ರತಾಚರಣ ಕರತಾತಿ. ಪಾರ್ವತಿ ದೇವಿಲೆ ಕೃಪೆ ಖಾತ್ತಿರಿ ೧೬ ನಮೂನ್ಯಾಚೆ ಸುಗಂಧಭರಿತ ಪದಾರ್ಥ ದೇವಿಕ ಸಮರ್ಪಣ ಕರತಾತಿ. ವೆಗಳೆ ಸುವಾಸಿನಿಂಕ ಆಪೋನು ಹೂಂಟಿ ಭರತಾತಿ. ಅನ್ಕೂಲ ಆಶ್ಶಿಲೆ ಶ್ರಾವಣಾಚೆ ಅಖೇರಿಚೆ ಮಂಗಳ್ವಾರ ಸುವಾಸಿನಿ ಬಾಯ್ಲಮನ್ಶೆಂಕ, ಬಂಧುಮಿತ್ರಾಂಕ ಆಪೋನು ಭೂರಿಭೋಜನ ಕರಯಸಿತಾತಿ. ಮಂಗಲಗೌರಿ ಪಾರ್ವತಿಲೆ ಮಂಗಲಕರ ರೂಪ ಮ್ಹೊಣು ಸಮಜಿತಾತಿ ಆನಿ ತೀ ಮಾಗ್ಗಿಲೆ ಸಕ್ಕಡ ದಿತ್ತಾ ಮ್ಹೊಣು ನಂಬ್ಗೂನು ಉಪಾಸಿ ವ್ಹರ್ನು ಪೂಜ್ಜಿತಾತಿ.
ಚೂಡಿ ಪೂಜನಾ : ಕೊಂಕಣಿಚೆ ಸುಮಾಸಿನಿ ಬಾಯ್ಲಮನೀಷಿ ನಾನಾ ನಮೂನ್ಯಾಚೆ ಪಾನ, ಫೂಲ ಹಾಡ್ನು ಚೂಡಿಚೆ ಗಾಂಟಿ ಬಾಂದೂನು ತುಳಸಿ ಮುಖಾರಿ ಫೂಲ, ಚೂಡಿ, ಪಂಚ್ಕಾದಾಯಿ ದವರೂನು ಶುಕ್ರಾರ ಆನಿ ಆಯ್ತವಾರು ಚೂಡಿ ಪೂಜನ ಕರತಾತಿ. ನವೀನ ಜಾವ್ನು ಲಗ್ನ ಜಾಲೀಲೆ ಚೆಲಿಯೇಕ ಕೂಳಾರ ಆಪೋನು ವಿಶೇಷ ಚೂಡಿ ಪೂಜನ ಕೊರನು ದೇವಳಾಕ ಆಪೋನು ವ್ಹರನು ಯತ್ತಾತಿ. ಕುಟುಂಬಚಾಂಕ, ಸಮಾಜ ಬಾಂಧವಾಂಕ ಆಪೋನು ನಾಂವೆ ಮ್ಹಾಲ್ಗಡ್ಯಾಲೆ ಘರ್‍ಕಡೆ ವಚ್ಚುನು ಚೂಡಿ ದಿವನು ಮ್ಹಾಲ್ಗಡೆ ಸುವಾಸಿನಿ ಬಾಯ್ಲಮನ್ಶೆಲೆ ಆಶೀರ್ವಾದು ಮಾಗ್ಗುನು ಘೇವ್ನು ಎತ್ತಾತಿ. ಆತ್ತತ್ತ ಸಮಾಜ ಮಂದಿರ, ದೇವಳಾಂತು ಸಾರ್ವಜನಿಕ ಚೂಡಿ ಪೂಜನ, ಹಳ್ದಿ-ಕುಂಕುಮು, ಪರಸ್ಪರ ಚೂಡಿ ವಿನಿಮಯ ಆದಿ ಕಾರ್ಯಕ್ರಮ ಚಲ್ತಾ. ಕೆಲವ ಕಡೇನ ಚಾಂಗ ಸಂತಾನ ಆನಿ ದೀರ್ಘಾಯುಷ್ಯ ಖಾತ್ತಿರಿ ಶುಕ್ರಗೌರಿ ವ್ರತಾಚರಣ ವರೇನ ಕರತಾತಿ.
ವರಮಹಾಲಕ್ಷ್ಮೀ ವ್ರತ : ಬಹುಶಃ ಶ್ರಾವಣ ದೈವಿಕ ಜಾವನು ಪವಿತ್ರ ಮ್ಹಹಿನೋ ಮ್ಹೊಣು ಸಮಜೂನು ಹರ್‍ಯೇಕ ದೇವಾಕ ಏಕ ನ್ಹಂಹಿ ಏಕ ನಮೂನ್ಯಾನಿ ಪೂಜ್ಜಿತಾತಿ. ಪುನವೆ ಲಾಗ್ಗಿಽಚೆ ಶುಕ್ರಾರ ಯವಚೆ ವರಮಹಾಲಕ್ಷ್ಮೀ ವ್ರತಾ ಖಾತ್ತಿರಿ ಚ್ಹಡ ವಿಷಯು ಸಾಂಕಾ ಮ್ಹೊಣು ನಾ, ಸಕಡಾಂಕ ಗೊತ್ತ ಆಸ್ಸಾ. ಸಾನಗಾಂವಾಂತು ವರೇನ ಜಾತಿಚೆ ಬೇಧ ನಾಶಿ ಸಕ್ಕಡ ಶ್ರೀ ಲಕ್ಷ್ಮೀದೇವಿಲೆ ಕೃಪೆ ಖಾತ್ತಿರಿ ವರಮಹಾಲಕ್ಷ್ಮೀ ವ್ರತಾಚರಣ ಕರತಾತಿ. ಕಲಿಯುಗಾಂತು ಲಕ್ಷ್ಮೀ ಕೃಪಾ ಆಶ್ಶಿಲೋಚಿ ಮಾರಾಯು, ಪುಣ್ಯವಂತು. ಹಾತ್ತಾಂತು ಶ್ರೀ ಲಕ್ಷ್ಮೀ ವರದಾಯಕ ದುಡ್ಡು ಏಕ ಆಸಲೇರಿ ಮನಾಂತು ಯವಜಿಲೀಲೆ ಸಕ್ಕಡ ಘಡೇಭಿತ್ತರಿ ಘೆವಚಾಕ ಜಾತ್ತಾ. ಶ್ರೀ ಲಕ್ಷ್ಮೀನಿ ಕೃಪಾ ಕೆಲಯಾರಿ ಕಾರಾರು ಭೋಂವಯೇತ, ರಾವಳಾರ ತಸ್ಸಾಲೆ ಘರಾಂತು ವ್ಹರಯೇತ. ತ್ಯಾ ಕಾರಣಾನಿ ಶ್ರೀ ಮಹಾಲಕ್ಷ್ಮೀ ದೇವಿಲೆ ಕೃಪಾ ಪಾವಚಾಕ ಸಕ್ಕಡವರಮಹಾಲಕ್ಷ್ಮೀ ವ್ರತಾಚರಣ ಕರತಾತಿ. ಹೇ ದಿವಸು ತಾಜ್ಜೆ ದ್ಯೋತಕ ಜಾವನು ಹಾತ್ತಾಕ ಪವಿತ್ರ ದಾರ ಬಾಂದೂನು ಘೆತ್ತಾತಿ.
ಶ್ರಾವಣ ಶನ್ವಾರು : ಶನ್ವಾರು ಮ್ಹಳ್ಳಸತ್ತಾ ಆಮಕಾ ಶ್ರೀ ಶನಿ ಮಹಾತ್ಮಾಲೆ ಉಡಗಾಸು ಯತ್ತಾ. ತಾಜ್ಜ ಬರಶಿ ಶನ್ವಾರು ಶ್ರೀ ವೆಂಕಟೇಶಾಲೆ ವಾರು ವರೇನ ಜಾವ್ನಾಸ್ಸ. ಮಾತ್ರ ನ್ಹಂಹಿ ಶ್ರೀ ವೆಂಕಟೇಶು, ಕಲಿಯುಗಾಚೆ ಕಾಮಧೇನು ಶ್ರೀ ಮಹಾವಿಷ್ಣುಚಿ ಜಾವ್ನಾಸ್ಸಾ ಮ್ಹಣಚೆ ಸಕ್ಕಡಾಂಕ ಗೊತ್ತಾಸ್ಸಾ. ತ್ಯಾ ಕಾರಣಾನಿ ಶ್ರಾವಣ ಶನ್ವಾರು ವ್ರತಾಚರಣ ಕೊರನು ಬಂಧು-ಮಿತ್ರಾಂಕ ಆಪೋನು ಸಂತರ್ಪಣ ಕರತಾತಿ. ಶ್ರಾವಣ ಶನ್ವಾರಾಚೆ ಆಚರಣೇನಿ ಗೃಹವ್ಯಾಜ್ಯ ಪರಿಹಾರ ಜಾತ್ತ ಕಂಯಿ, ಶತ್ರು ತಾಕೂನು ರಕ್ಷಣ ಮೆಳ್ತ ಕಂಯಿ, ದುಡವಾ ತ್ರಾಸು ಆಸಲೇರಿ ಶ್ರೀ ವೆಂಕಟೇಶ ಸ್ವಾಮಿ ನಾಶಿ ಕರತ ಕಂಯಿ. ಕೆಲವ ಕಡೇನ ಸಾನ ಚರಡುಂವ ತ್ಯಾ ದಿವಸು ಶ್ರೀ ವೆಂಕಟರಮಣ ಗೋವಿಂದ ಮ್ಹಣತಾ ಭಿಕ್ಷಾ ನಿಮಗೂಚಾಕ ವತ್ತಾತಿ. ಶ್ರಾವಣ ಶನ್ವಾರು ಗೌರಿ ಪೂಜಾ, ಹನುಮಂತ, ಶನೀಶ್ವರಾಲೆ ಪೂಜಾ ವರೇನ ಕೊರನು ಕೃತಾರ್ಥ ಜಾತ್ತಾತಿ.
ಸುತ್ತಾಫುನ್ನವ : ವರ್ಷಾಕ ಏಕ್ಪಟಿ ಪೊರನೆ ಲ್ಯಾಕ ಚುಕ್ತಾ ಕೊರನು ನವೀನ ಲ್ಯಾಕ ಸೂರು ಕೊರಚೆ ಏಕ ಪರಂಪರಾ. ವ್ಯಾಪಾರಸ್ಥ ತೆದ್ನಾ ನವೀನ ಲೆಕ್ಕಾಚೆ ಪುಸ್ತಕ(ಖಾತೆ-ಕೀರ್ದಿ) ಘೆತ್ತಾತಿ. ತಶೀಚಿ ಬ್ರಹ್ಮೋಪದೇಶ, ಮೂಂಜಿ ಇತ್ಯಾದಿ ಜಾವನು ಯಜ್ಞೋಪವೀತ ಆಶ್ಶಿಲ್ಯಾನಿ ತ್ಯಾ ಬದಲ ಕೊರಚೆ ಪರಬಚಿ ಜಾನ್ನುವೆ ಪರಬ ಜಾಂವೊ ಉಪಾಕರ್ಮ. ಸುತ್ತಾಫುನ್ನವ ಮ್ಹೊಣು ಸಾಂಗತಾತಿ. ಶ್ರೀ ಮಹಾವಿಷ್ಣುನಿ ಜನ್ಮಿಲೆ ಶ್ರವಣ ನಕ್ಷತ್ರ ಆಯ್ಯಿಲೆ ದಿವಸು ಹೇ ವ್ರತಾಚರಣ ಕರತಾತಿ. ಹೇ ವರೇನ ಶ್ರಾವಣ ಮ್ಹಹಿನ್ಯಾಂತೂ ಯತ್ತಾ. ಋಗುಪಾಕರ್ಮ ಹೋಮಾ ಚಲೋನು ಜಾನ್ನುವೆ ಬದಲ ಕೊರನು ಪೋರು ವರ್ಷ ಕೆಲೀಲೆ ಪಶಿ ಚ್ಹಡ ಆಧ್ಯಾತ್ಮಿಕ ಸಾಧನಾ ಮುಖಾವಯಲೆ ವರಸಾಂತು ಕರತಾ ಮ್ಹಣಚೆ ಶಪಥ ಹೇ ದಿವಸು ಘೆತ್ತಾತಿ.. ದೇವು, ಋಷಿ, ಮ್ಹಾಲ್ಗಡೆ, ಸರಲೀಲೆ ಸಕಡಾಂಕ ತರ್ಪಣ ವರೇನ ದಿತ್ತಾತಿ. ಬ್ರಾಹ್ಮಣ, ವೈಶ್ಯ, ದೇವಾಂಗ, ವಿಶ್ವಕರ್ಮ, ಜೈನಾಂತು ಜಾನ್ನುವೆ ಪರಬ ಚಲಾಯಿಸಿತಾತಿ. ಕೆಲವ ಕಡೇನ ಸಮುದ್ರಾಕ ಜಾನ್ನುವೆ, ಭಾಂಗರ ಸಮರ್ಪಣ ಕೊರಚೆ ಪರಂಪರಾ ವರೇನ ಆಸ್ಸಾ.
ರಕ್ಷಾಬಂಧನ : `ರಕ್ಷಾಬಂಧನ ಜಾಂವೊ ಬಾಂವ-ಬೈಣಿಲೆ ಪರಬ ವರೇನ ಶ್ರಾವಣಾಚೆ ಪುನ್ವೆ ದಿವಸು ಎತ್ತಾ. ಹಾಕ್ಕಾ ರಾಖಿ ಪರಬ ಮ್ಹೊಣೂ ಆಪಯತಾತಿ. ಬೈಣಿ ಬಾಂವಾಕ ತಿಲಕ ದವರೂನು ಹಾತ್ತಾಕ ರಾಖಿ ಬಾಂದೂನು, ಗೊಡಶೆ ಕಾವಯತಾ, ಬಾಂವು ಬೈಣಿಕ ಉಡ್ಗಿರೆ ದಿತ್ತಾ. ಉತ್ತರ ಭಾರತಾಂತು ಹೇ ಮಸ್ತ ಸಂಭ್ರಮಾರಿ ಆಚರಣ ಕರತಾತಿ. ಆಪಣೇಲೆ ಮಾನ-ಪ್ರಾಣ ರಾಕಚಾಕ ಬಾಂವಾಂಕ ಪ್ರಚೋದನ ಕೊರಚೆ ಹೇ ಪರಭೆಚೆ ಉದ್ದೇಶ. ಪಯಲೇ ಕಾಲಾಂತು ಸಾನ ಸಾನ ರಾಜ್ಯ ಆಶ್ಶಿಲೆ. ಕೆದನಾಂಯಿ ಸೆಜ್ಜರ ರಾಜ್ಯಾ ಬರಶಿ (ಆತ್ತ ಸೆಜ್ಜರ ಘರ್‍ವಾಲೆ ಬರಶಿ ಜಾವ್ಚೆ ವರಿ) ಲಡಾಯಿ, ಜಗಡಿ, ಯುದ್ಧ ಘಡ್ತಾ ಆಸ್ತಾಶ್ಶಿಲೆ. ತ್ಯಾ ಯುದ್ಧಾಂತು ವಾಂಟೊ ಘೆವಚಾಕ ಭಾಯ್ರಿಸೊರಚೆ ಬಾಂವಾಲೆ ಹಾತ್ತಾಕ ಸುತ್ತಾಚೆ ರಕ್ಷಾ ಬಂಧನ ಬಾಂದೂನು ಬೈಣಿ ಹೇ ರಾಜ್ಯ ರಾಕಚಾಕ ವಸ. ರಾಜ್ಯ ರಾಕಲೇರಿ ಮಾಕ್ಕ ವರೇನ ರಾಕಿಲೆ ವರಿ ಜಾತ್ತಾ ಮ್ಹಣಚೆ ಭಾವನಾ ಜಾಗೃತಿ ಜಾವಚೆ ಖಾತೇರಿ ಹೇ ರಕ್ಷಾಬಂಧನ ಪರಭೆಚೆ ಆಚರಣ ಆರಂಭ ಜಾಲ್ಲಿಶಿ ದಿಸ್ತಾ.
ಶ್ರೀ ರಾಘವೇಂದ್ರಾಲೆ ಆರಾಧನೋತ್ಸವು : ಶ್ರಾವಣ ಮ್ಹಹಿನ್ಯಾಚೆ ಕೃಷ್ಣಪಕ್ಷಾಚೆಬಿದಿಗೆ ದಿವಸು ಗುರುಸಾರ್ವಭೌಮ, ಕಲಿಯುಗಾಚೆ ಕಲ್ಪವೃಕ್ಷ ಶ್ರೀ ರಾಘವೇಂದ್ರ ಸ್ವಾಮ್ಯಾಂಗೆಲೆ ಆರಾಧನಾ ತೀನಿ ದಿವಸು ಚಲ್ತಾ. ಮಂತ್ರಾಲಯಾಂತು ಮಾತ್ರ ನ್ಹಂಹಿ ಶ್ರೀ ರಾಘವೇಂದ್ರ ಸ್ವಾಮ್ಯಾಂಗೆಲೆ ಬೃಂದಾವನ ಆಸ್ಸುಚೆ ಸಕ್ಕಡೆ ಆರಾಧನೋತ್ಸವು ಭಕ್ತಿ-ಶೃದ್ಧೇರಿ ಚಲ್ತಾ. ತಿನ್ನೀ ದಿವಸು ಅನ್ನ ಸಂತರ್ಪಣೆ ವರೇನ ಚಲ್ತಾ. ಮಂತ್ರಾಯಲಾಂತು ಹೇ ಉತ್ಸವು ಮಸ್ತ ವ್ಹಡ ಪ್ರಮಾಣಾರಿ ಚಲತಾ.ತಶೀಚಿ ಭಾರತಾಕ ಸ್ವಾತಂತ್ರ್ಯ ಮೆಳೀಲೆ ವರೇನ ಶ್ರಾವಣಾಂತು ಮ್ಹಣಚೆ ವಿಷಯು ವಿಸರಚೆ ತಶ್ಶಿ ನಾ.
ಶ್ರೀ ಕೃಷ್ಣ ಜನ್ಮಾಷ್ಟಮಿ : ಶ್ರಾವಣ ಬಹುಳ ಅಷ್ಟಮಿ ದಿವಸು ಶ್ರೀ ಕೃಷ್ಣ ಜನ್ಮಾಷ್ಟಮಿ ಪರಬ ಆಚರಣ ಕರತಾತಿ. ವೈಷ್ಣವ ಬ್ರಾಹ್ಮಣ ಹೇ ದಿವಸು ಬರೀ ಉಪಾಸ ಉರ್ನು ರಾತ್ತಿಕ ಶ್ರೀ ಕೃಷ್ಣಾಕ ಸಹಸ್ರನಾಮ ಪಾರಾಯಣ ಬರಶಿ ಏಕ ಹಜಾರ ತುಳಸಿದಳ ಅರ್ಪಣ ಕರತಾತಿ. ನಾನಾ ನಮೂನ್ಯಾಚೆ ಉಂಡೊ, ಪಂಚ್ಕಾದಾಯಿ ಕೊರನು ಶ್ರೀ ಕೃಷ್ಣಾಕ ಅರ್ಪಣ ಕರತಾತಿ. ಉಡುಪಿಚೆ ಶ್ರೀ ದೇವಳಾಂತು ಆನಿ ದೇಶಾದ್ಯಂತ ಶ್ರೀ ಕೃಷ್ಣಾಲೆ ದೇವಳಾಂತು ಉತ್ಸವು, ವಿಶೇಷ ಆಚರಣ ಆಸ್ತಾ. ಬಾಲಕೃಷ್ಣು ಆಮ್ಗೆಲೆ ಘರಾಕ ಯತ್ತಾ ಮ್ಹಣ್ಚೆ ಭರ್‍ವಸೇನ ಘರ್‍ಚೆ ಪೂಜಾಮಾಂಟ್ವೆಚಾನ ಘರ್‍ಚೆ ಬಾಗ್ಲಾ ಪರ್ಯಂತ ಹೆಜ್ಜೆ ಗುರ್ತು ಕರತಾತಿ. ಹೇ ಶ್ರೀ ಕೃಷ್ಣಾನಿ ಘರಾಕ ಯವ್ಚೆ ಸೂಚನಾ.
ತಶೀಚಿ ಶ್ರಾವಣಾಂತು ಅಂಗಾರಕ ಜಯಂತಿ, ಗಾಯತ್ರಿ ಆರಾಧನಾ, ಸಿರಿಯಾಳ ಷಷ್ಠಿ ಅಶ್ಶಿ ಪರಭೆಚೆ ಮಾಕಸಿ ತ್ಯಾ ತ್ಯಾ ಕಾಲಾಚೆ ಪ್ರಭಾವು ಪೋಡ್ನು ಆಸತಾ. ಆಮ್ಗೆಲೆ ದೈಹಿಕ ಆನಿ ಮಾನಸಿಕ ರಾಕವಣಾಂಚೆ ತತ್ತ್ವ ತಾಂತು ಗೂಸ್ಸುನು ಆಸ್ತಾ. ಹೇ ಸಕ್ಕಡ ಕಳೀತಾಕ ಹಾಡ್ನು ಘೇನಾಶಿ ಚಂದಾಸ್ಸುಚೆ ಚೆಲಿಯೇಲೆ ಮಾಥಿಯಾ ಕೇಸ ಮಾತ್ರ ಪೊಳೋನು ತೀ ಇಂಗಾಳೆ ವರಿ ಕಾಳಿ ಮ್ಹೊಣು ಸಾಂಗಿಲ ವರಿ ಕೋಣಕಿ ಸಾಂಗಚೆ ಕಾಗಕ್ಕ-ಗುಬ್ಬಕ್ಕಾ ಕಾಣಿ ಆಯಕೂನು ಸಂಸ್ಕೃತಿ, ಸಂಸ್ಕಾರಾಚೆ ಅವಹೇಳನ, ಸಸಾರ ಕರ್ತಾ ಆಮ್ಮಿ ಅನಾರೋಗ್ಯಾಚೆ ಅಗ್ನಿ ಕುಂಡಾಕ ಪಡತಾ ಆಸ್ಸಾತಿ. ವೈಕಿ? ನ್ಹಂಹಿ? ತುಮ್ಮೀ ವಿಚಾರ ಕೊರನು ಮುಂಜಾಗ್ರತ ಘೆಯ್ಯಾತಿ.
– ಆರಗೋಡು ಸುರೇಶ ಶೆಣೈ