ದೋನಿ ಮ್ಹಹಿನ್ಯಾ ಮಾಕಸಿ ದಿನಾಂಕ. ೨೭-೦೭-೨೦೨೪ಕ ಬೆಂಗಳೂರ್‍ಚೆ ದ್ವಾರಕಾನಾಥ ಭವನಾಂತು ಕ್ರೋಧಿ ನಾಮ ಸಂವತ್ಸರಾಚೆ ಚಾತುರ್ಮಾಸ ವೃತ ಸ್ವೀಕಾರ ಕೆಲೀಲೆ ಶ್ರೀ ಗೋಕರ್ಣ ಪರ್ತಗಾಳಿ ಜೀವೋತ್ತಮ ಮಠಾಧೀಶ ಶ್ರೀಮದ್ ವಿದ್ಯಾಧೀಶ ತೀರ್ಥ ಸ್ವಾಮ್ಯಾಂಗೆಲೆ ಚಾತುರ್ಮಾಸು ಸಪ್ಟಂಬರ್ ೧೮ ತಾರೀಖೆಕ ಮೃತ್ತಿಕಾ ವಿಸರ್ಜನ ಆನಿ ಸೀಮೋಲ್ಲಂಘನ ಪೂರ್ವಕ ಸಮಾಪ್ತ ಜಾಲ್ಲೆ. ಪೂಜ್ಯಾಂಗೆಲೆ ಚಾತುರ್ಮಾಸ ಸಂದರ್ಭಾರಿ ದ್ವಾರಕಾನಾಥ ಭವನಾಂತು ನಿತ್ಯ ಮಹಾ‌ಉತ್ಸವಾಚೆ ವಾತಾವರಣ ಆಶ್ಶಿಲೆ. ರಾಜ್ಯಾಚೆ, ದೇಶಾಚೆ ಮೂಲ್ಲ ಮೂಲ್ಲೆಚಾನ ಶ್ರೀಮಠಾಚೆ ಅಪಾರ ಶಿಷ್ಯಕೋಟಿ ಯವ್ನು ಪೂಜ್ಯಾಂಗೆಲೆ ಭೀಕ್ಷಾಂತು ವಾಂಟೊ ಘೇವನು, ಪಾದಪೂಜಾ ಕೊರನು, ಫಲಮಂತ್ರಾಕ್ಷತ ಘೇವನು ಪುನೀತ ಜಾಲ್ಲೆ.

ತಾಂಗೆಲೆ ಚಾತುರ್ಮಾಸ ವೇಳ್ಯಾರಿ ಪ್ರತಿ ದಿವಸು ತ್ರಿಕಾಲ ಪೂಜಾ, ಭೀಕ್ಷಾ, ಸಂತರ್ಪಣ, ಪಾದಪೂಜಾ, ಏಕಾದಶಿಕ ತಪ್ತಮುದ್ರಾಧಾರಣ, ವಿಜೃಂಭಣೆರಿ ಸರ್ವ ಪರಭೆಚೆ ಆಚರಣ, ಅಗಸ್ಟ್ ೧೭ಕ ಶ್ರೀನಿವಾಸ ಕಲ್ಯಾಣೋತ್ಸವು, ಅಗಸ್ಟ ೧೮ಕ ಲಕ್ಷ್ಮೀನಾರಾಯಣ ಹೃದಯ ಹವನ, ಅಗಸ್ಟ್ ೨೫ಕ ಧನ್ವಂತರಿ ಹವನ, ವಿಶೇಷ ಸಂದರ್ಭಾರಿ ಆರ್ಶೀಚನ ಆದಿ ಧಾರ್ಮಿಕ ಕಾರ್ಯಕ್ರಮ ಬರಶಿ ಗೊಂಬೆಖೇಲು, ಭಜನ, ಭಕ್ತಿಸಂಗೀತ ಆದಿ ಸಾಂಸ್ಕೃತಿಕ ಕಾರ್ಯಾವಳಿ ಚಲ್ಲೆ.
ತಾಕ್ಕ ಪೂರಾ ಮುಕುಟಪ್ರಾಯ ಜಾವನು ಚಾತುರ್ಮಾಸ ವ್ರತಾಚೆ ಅಖೇರಿಚೆ ಕಾರ್ಯಕ್ರಮ ದಿಗ್ವಿಜಯೋತ್ಸವು ದಿನಾಂಕ. ೨೯-೦೯-೨೦೨೪ ದಿವಸು ಚಲ್ಲೆ. ಸಕ್ಕಾಣಿ ೦೮-೩೦ ತಾಕೂನು ೧೨-೩೦ ಪರ್ಯಂತ ಆರೋಗ್ಯ ತಪಾಸಣಾ ಶಿಬಿರ, ರಕ್ತದಾನ ಶಿಬಿರ ಚಲ್ಲೆ. ಉಪರಾಂತ ಧೋಂಪಾರಾ ಪೂಜಾ ಚೋಲ್ನು ಮಹಾಸಂತರ್ಪಣ ಚಲ್ಲೆ. ಸಾಂಜವಾಳಾ ೬-೦೦ ಘಂಟ್ಯಾಕ ಹಜಾರಗಟ್ಲೆ ಭಕ್ತಾಂಗೆಲೆ ಉಪಸ್ಥಿತೀರಿ ದ್ವಾರಕಾನಾಥ ಭವನಾಚಾನ ಆರಂಭ ಜಾಲೀಲೆ ದಿಗ್ವಿಜಯೋತ್ಸವು ನ್ಯಾಶನಲ್ ಕಾಲೇಜ್ ಸಿಗ್ನಲ್ ಮೂಖಾಂತರ ಘೂವ್ನು, ರಾಮಕೃಷ್ಣ ಆಶ್ರಮ ಸರ್ಕಲ್ಲಾಕ ಆಯಲೆ. ಥಂಚಾನ ಗಾಂಧಿ ಬಝಾರ, ಠ್ಯಾಗೂರ ಸರ್ಕಲ್, ಬಸವನಗುಡಿ ಪೊಲೀಸ್ ಸ್ಟೇಶನ್, ನೆಟ್ಟ ಕಲ್ಲಪ್ಪಾ ಸರ್ಕಲ್ ಮುಖಾಂತರ ತೀನ ಕಿಲೋಮೀಟರ ಚೋಲ್ನು ಪರತ ದ್ವಾರಕಾನಾಥ ಭವನಾಕ ಪರತೂನು ಯವ್ನು ಪಾವಲೆ.

ತಾಜ್ಜ ಫುಳ್ದೀಸು ಸೆಪ್ಟಂಬರ್ ೨೮ಕ ಸಕ್ಕಾನಿ ತಪ್ತ ಮುದ್ರಾಧಾರಣ ಚೋಲ್ನು, ಶ್ರೀ ರಾಮಮಂಟಪಾಂತು ಸಕ್ಕಾಣಿ ೧೦-೪೫ ತಾಕೂನು ಧೋಂಪಾರಾ ೧೨.೫೫ ಪರಿಯಂತ ಅಖಂಡ ರಾಮನಾಮ ತಾರಕ ಜಪ ಚಲ್ಲೆ. ಮಾಗಿರಿ ಶ್ರೀ ರಾಮಕಥಾ ಪ್ರದರ್ಶನ ಚಲ್ಲೆ, ಆಧ್ಯಾತ್ಮಿಕ ಚರ್ಚಾ, ಪೂಜ್ಯ ಸ್ವಾಮ್ಯಾಂಗೆಲೆ ತಾಕೂನು ಆಶೀರ್ವಚನ ಆದಿ ಕಾರ್ಯಕ್ರಮ ಚಲ್ಲೆ.

ಸರಸ್ವತಿ ಪ್ರಭಾ ಕೊಂಕಣಿ ಮ್ಹಹಿನ್ಯಾಳ್ಯಾಚೆ ಬೆಂಗಳೂರು ಪ್ರತಿನಿಧಿ ಶ್ರೀ ಜಗದೀಶ ಪೈ ಹಾನ್ನಿ ಆರತ ಪೂಜ್ಯ ಸ್ವಾಮ್ಯಾಂಕ ಭೆಟ್ಟುನು ಆಶೀರ್ವಾದ ಘೆತ್ಲಿಂತಿ.
ಪೋಟೋ : ಜಗದೀಶ ಪೈ, ಬೆಂಗಳೂರು