ಶ್ರೀ ಸಂಸ್ಥಾನ ಕಾಶೀ ಮಠಾಚೆ ಆದಲೆ ಮ್ಹಾಲ್ಗಡೆ ಯತಿವರ್ಯ ಶ್ರೀಮದ್ ಸುಧೀಂದ್ರ ತೀರ್ಥಸ್ವಾಮ್ಯಾಂಗೆಲೊ ಜನ್ಮ ನಕ್ಷತ್ರ ದಿವಸಾಚೆ ಜನ್ಮಶತಮಾನೋತ್ಸವ ಆಚರಣ ಏ.೮ ತಾಕೂನು ೧೪ ಪರಿಯಂತ ಹರಿದ್ವಾರಾಚೆ ವ್ಯಾಸಾಶ್ರಮಾಂತು ವಿಜೃಂಭಣೆರಿ ಶ್ರೀಮದ್ ಸಂಯಮೀಂದ್ರ ತೀರ್ಥ ಸ್ವಾಮ್ಯಾಂಗೆಲೆ ದಿವ್ಯ ಸಾನಿಧ್ಯಾರಿ ಚಲ್ಲೆ.
ಎ.೧೪ಕ ಸಕ್ಕಾಣಿ ೧೦೦೮ ವಿಶೇಷ ಪವಮಾನಾಭಿಷೇಕ ಸೇವಾ, ಹಿಂದೂಸ್ಥಾನಾಚೆ ಸಕ್ಕಡ ದಿಕ್ಕಾಚೆ ಪವಿತ್ರ ನಂಯ್ಚಾನಿ ಸಂಗ್ರಹ ಕೊರನು ಆಯಲೀಲೆ ಪವಿತ್ರ ತೀರ್ಥಾನಿ ಪೂಜ್ಯ ಸ್ವಾಮ್ಯಾಲೆಂ ವೃಂದಾವನಾಚೆ ಅಭಿಷೇಕ, ಸೇವಾದಾರಾಂಕ ಪ್ರಸಾದ ರೂಪಾಂತು ೧೦೦೮ ರುಪ್ಯಾ ಪಾವಲಿ ವಾಂಟುಚೆ ಆದಿ ಕಾರ್ಯಕ್ರಮ ಸುರವೇಕ ಚಲ್ಲೆ. ಮಾಗಿರಿ ಸ್ವರ್ಣ ಪುಷ್ಪಾರ್ಚನಾ ಕಾರ್ಯಕ್ರಮ ಪೂಜ್ಯ ಶ್ರೀಮದ್ ಸಂಯಮೀಂದ್ರ ತೀರ್ಥ ಸ್ವಾಮ್ಯಾಂಗೆಲೆ ದಿವ್ಯ ಕರಕಮಲಾನಿ ಚಲೋನು ದಿಲ್ಲಿ. ಪಯಲೇಕ ಶ್ರೀಮದ್ ಸುಧೀಂದ್ರ ತೀರ್ಥ ಸ್ವಾಮ್ಯಾಂಗೆಲೆ ವೃಂದಾವನಾಂತು ಆಸ್ಸುಚೆ ಹನುಮಂತ ದೇವಾಲೆ ಪಾದಾರವಿಂದಾಕ ಸ್ವರ್ಣ ಪುಷ್ಪಾರ್ಚನ ಚಲಯಿಲೆ. ಮಾಗಿರಿ ಗುರುಪಾದುಕೇಕ ಸ್ವರ್ಣ ಪುಷ್ಪಾರ್ಚನ ಚಲಯಿಲೆ. ಮಾಗಿರಿ ತ್ಯಾ ಸ್ವರ್ಣ ಪುಷ್ಪಾಂಕ ಪ್ರಸಾದ ರೂಪಾಂತು ಭಕ್ತಾಂಕ ವಾಂಟಿಲೆ. ಹೇ ಮಹೋತ್ಸವಾಕ ಆಯ್ಯಿಲೆ ಸಕ್ಕಡ ಭಕ್ತಾಂಕ ಶ್ರೀಮದ್ ಸಂಯಮೀಂದ್ರ ತೀರ್ಥ ಸ್ವಾಮ್ಯಾನಿ ಗಂಧ ಪ್ರಸಾದ ವಾಂಟಿಲೆ.
ತಿರುಪತಿ ಉಂಡೊ, ಫಲವಸ್ತು, ಬಾಯ್ಲಮನ್ಶೆಂಕ ಕಾಪ್ಪಡ, ದಾರಲ್ಯಾಂಕ ಪಂಜಿ, ಚೆಲ್ಲಿಯಾ ಚರಡುವಾಂಕ ಆನಿ ಚಾಲ್ಲೆ ಚರಡುವಾಂಕ ಆಂವ್ಗಲೆ ವಾಂಟಿಲೆ. ಸುಧೀಂದ್ರ ವೇದಿಕೆರಿ ವಿಷ್ಣು ಸಹಸ್ರನಾಮ ಪಠಣ, ಸಾಮೂಹಿಕ ಕುಂಕುಮಾರ್ಚನ, ಸಾಮೂಹಿಕ ದುರ್ಗಾ ನಮಸ್ಕಾರ, ಸಹಸ್ರ ಚಂಡಿಕಾಯಾಗ, ಋತ್ಮಿಕಾ ಯಾಗ, ಗುರು ಗುಣಗಾನ, ಭಜನಾ ಕಾರ್ಯಕ್ರಮ ಚಲ್ಲೆ. ಸಾಂಜವಾಳಾ ಶ್ರೀಮದ್ ಸಂಯಮೀಂದ್ರ ತೀರ್ಥ ಸ್ವಾಮ್ಯಾನಿ ಆರ್ಶೀವಚನ ದಿತ್ತಾ “ಆಮ್ಗೆಲೆ ಸಮಾಜ ಮ್ಹಳಯಾರಿ ಏಕ ಕುಟುಂಬ ಆಶ್ಶಿಲೆ ವರಿ. ದೇವು ಮ್ಹಳಯಾರಿ ಸಂತೋಷು, ದೇವಳಾಕ ಘೆಲಯಾರಿ ಸಂತೋಷು ಮೆಳ್ತಾ ಮ್ಹೊಣು ಆಮ್ಗೆಲೆ ಸ್ವಾಮ್ಯಾನಿ ದಾಖೋನು ದಿಲ್ಲ್ಯಾ. ಹಾಂಗಾಕ ಮ್ಹಳಯಾರಿ ಹರಿದ್ವಾರಾಕ ಆಯಲೇರಿ ಸಂತೋಷ ಮೆಳ್ತಾ, ಪರಪರತೂನು ಯವ್ಕಾ ಮ್ಹೊಣು ದಿಸ್ತಾ. ಕಿತಯಾಕ ಮ್ಹಳಯಾರಿ ಹೇ ಆಮ್ಗೆಲೆ ಸ್ವಾಮ್ಯಾಲೆ ಕುಳಾರ. ತಾನ್ನಿ ಕೆದ್ನಾಯಿ ಹರಿದ್ವಾರಾಕ ಘೆಲಯಾರಿ ಕೂಳಾರಾಕ ಘೆಲೀಲ್ವರಿ ಮ್ಹಣ್ತಾಲೆ. ಮ್ಹಳಯಾರಿ ಹರಿದ್ವಾರಾಕ ಆಯಲೇರಿ ತಾಂಕಾ ತಿತ್ಲೋ ಸಂತೋಷ ಜಾತ್ತಾಲೆ. ಮಾಕ್ಕಾ ಹರಿದ್ವಾರಾಂತು ಆಶ್ಶಿಲ ತೆದ್ನಾ ಆಮ್ಗೆಲೆ ಸ್ವಾಮ್ಯಾಂಗೆಲೆ ಒಟ್ಟು ಆಶ್ಶಿಲೆ ಅನುಭವ ಜಾತ್ತಾ. ಆಮ್ಗೆಲೆ ಸ್ವಾಮ್ಯಾನಿ ಸಮಾಜಾಕ ಪ್ರೀತಿ ದೀವ್ನು ಪ್ರೀತಿ ಘೆತ್ಲ್ಯಾ. ತುಮ್ಮಿ ಸಕ್ಕಡಾನಿ ಕೈ ಕೈಕಿ ತಾಕೂನು ಆಯಲೇಚಿ ತಾಕ್ಕಾ ಸಾಕ್ಷಿ ಮ್ಹಳ್ಳೆ. ದೇಶ, ವಿದೇಶಾಚಾನ ಸಾಡಿ ಚಾರ ಹಜಾರಾ ಪಶಿ ಚ್ಹಡ ಶಿಷ್ಯಕೋಟಿ ಹರಿದ್ವಾರಾಕ ಯವ್ನು ಹೇ ಪುಣ್ಯಕಾರ್ಯಾಂತು ವಾಂಟೊ ಘೆತ್ಲೆ. ಮಂಗಳೂರ್‍ಚಾನ ಏಕ ವಿಶೇಷ ಟ್ರೇನಾಂತು ಭಕ್ತಲೋಕ ಹೇ ಮಹೋತ್ಸವಾ ಖಾತೇರಿಚಿ ಘೆಲೀಲೆ.
ಮುಂಬೈಚೆ ಜಿ‌ಎಸ್ ಬಿ ಸೇವಾ ಮಂಡಲ, ಸುಕೃತೀಂದ್ರ ಸ್ವಾಮಿ ಸೇವಾ ಪ್ರತಿಷ್ಠಾನ, ದೆಹಲಿ ಸಮಾಜ, ಬೆಂಗಳೂರು ಸಮಾಜ ಸಹಿತ ಸಕ್ಕಡೆಚೆ ಗೌಡ ಸಾರಸ್ವತ ಬ್ರಾಹ್ಮಣ ಸಮಾಜಾಚೆ ಮುಖೇಲ, ವೈದಿಕ, ಕಾರ್ಯಕರ್ತಾನಿ ಹೇ ಮಹೋತ್ಸವ ವೈಭವಾರಿ ಘಡಚಾಕ ಅಪಾರ ಶ್ರಮ ಘಾಲೀಲೆ. ಪೂಜ್ಯ ಸಂಯಮೀಂದ್ರ ತೀರ್ಥ ಸ್ವಾಮ್ಯಾಂಗೆಲೆ ಅವುಂದು ವರ್ಷಾಚೆ ವಸಂತ ಮಾಸು ಹಾಂಗಾಚಿ ಚಲ್ತಾ ಆಸ್ಸಾ. ಮೇ ಮ್ಹಹಿನ್ಯಾ ಪರ್ಯಂತ ಚಲ್ತಾ. ತ್ಯಾ ಕಾರಣಾನಿ ಹೇ ಮಹೋತ್ಸಾಚೆ ಉಪರಾಂತ ವರೇನ ಶಿಷ್ಯಕೋಟಿನ ಯವ್ನು ಶ್ರೀಮದ್ ಸುಧೀಂದ್ರ ತೀರ್ಥ ಸ್ವಾಮ್ಯಾಂಗೆಲೆ ವೃಂದಾವನಾಕ ನಮನ ಕೊರನು, ಶ್ರೀ ವ್ಯಾಸರಘುಪತಿ ಆನಿ ಶ್ರೀಮದ ಸಂಯಮೀಂದ್ರ ತೀರ್ಥ ಸ್ವಾಮ್ಯಾಂಗೆಲೆ ಕೃಪಾಶೀರ್ವಾದ ಘೇವ್ನು ವಚ್ಚೆಕ ಅವಕಾಶ ಆಸ್ಸಾ.