ಶ್ರೀ ಕಾಶೀ ಮಠ ಸಂಸ್ಥಾನಾಚೆ ಆದಲೆ ಮಠಾಧಿಪತಿ ಶ್ರೀಮದ್ ಸುಧೀಂದ್ರ ತೀರ್ಥ ಸ್ವಾಮೀಜಿ ತಾನ್ನಿ ಶ್ರೀ ಕಾಶೀಮಠಾಚೆ ಗುರುಪರಂಪರೆಂತು ೨೦ವೇಂ ಯತಿವರ್ಯ ಜಾವ್ನಾಶ್ಶಿಲೆ. ತಾಂಕಾ ಭಕ್ತವೃಂದ ಆನಿ ಸಮಾಜಾಚೆ ಲೋಕ ಚಮಕುಚೆ ದೇವುಉಲಯಚೆಂ ದೇವು ಮ್ಹಣ್ತಾಲೆ. ಕೆದ್ನಾಯಿ ತೊಂಡಾರಿ ನೀವ್ನಾತ್ತಿಲೆ ಹಾಸ್ಮುಖಿ ತೋಂಡ, ಆಪಣಾಲೆಂ ಯವಚೆ ಭಕ್ತ ವೃಂದ ಲಾಗ್ಗಿ ಅಂತಃಕರಣ ಪೂರ್ವಕ ಜಾವ್ನು ಉಲೋನು ತಾಂಗೆಲೆ ಕಷ್ಟ ಕೋಳ್ನು ಘೇವ್ನು ಮನ ಪೂರ್ವಕ ಜಾವ್ನು ದೇವು ಚಾಂಗ ಕರ್ತರೇ ಮ್ಹೊಣು ಧೈರ್ಯ ಸಾಂಗೂನು ಮಂತ್ರಾಕ್ಷತ ದಿಲಯಾರಿ ಶಿಷ್ಯಕೋಟಿಕ ತ್ಯಾಂಚಿ ವ್ಹಡ ಆಶೀರ್ವಾದು ಜಾವ್ನಾಶ್ಶಿಲೆ. ಜನ್ಮು ಸಾರ್ಥಕ ಜಾಲೀಲೆ ಭಾವನಾ ಯತ್ತಾಲೆ. ಶ್ರೀಮದ್ ಸುಧೀಂದ್ರ ತೀರ್ಥ ಸ್ವಾಮ್ಯಾಂಗೆಲೆ ಉತ್ರಾಂತು ಆಸ್ಸುಚೆ ಮ್ಹೋವಾಳಪಣಽಚಿ ಕಿತ್ಲೆಕಿ ಭಕ್ತಾಂಕ ಜೀವನೋತ್ಸವಾಚೆ ಭರ್‍ವಸ ದಿತ್ತಾಶ್ಶಿಲೆ. ತಾನ್ನಿ ಶೃದ್ಧಾ-ಭಕ್ತಿನಿ ಕೊರಚೆ ದೇವಪೂಜಾ ಭಕ್ತವೃಂದಾಕ ನವೀನ ಆಧ್ಯಾತ್ಮಿಕ ಜಗಾಕ ಆಪೋನು ವ್ಹರತಾಲೆ. ಪೂರ್ವಾಶ್ರಮಾಂತು ಹಾಂಗೆಲೆ ನಾಂವ ಶ್ರೀ ಸದಾಶಿವ ಶೆಣೈ, ಬಾಪಯಿ ಎರ್ನಾಕುಲಂಚೆ ಶ್ರೀ ವೆಂಕಟರಮಣ ದೇವಳಾಚೆ ಟ್ರಸ್ಟಿ ಜಾವ್ನಾಶ್ಶಿಲೆ ಶ್ರೀ ರಾಮದಾಸ್ ಶೆಣೈ. ಮಾರ್ಚ್ ೩೧, ೧೯೨೬ಕ ಎರ್ನಾಕುಲಂತು ಹಾಂಗೆಲೆ ಶುಭ ಜಲ್ಮು ಜಾಲ್ಲೆ. ಶಿಕ್ಷಣ ವರೇನ ಎರ್ನಾಕುಲಂತು ಜಾಲ್ಲೆ. ಶ್ರೀ ಸದಾಶಿವ ಶೆಣೈಕ ಸಾನ್ಪಣಾ ತಾಕುನೂಯಿ ಧಾರ್ಮಿಕ ಜೀವನ ಬಗಲೇನ ಆಸಕ್ತಿ ಆಶ್ಶಿಲೆ. ಹಿಂದೂ ಧರ್ಮಾ ವಯ್ರಿ ವಿಶೇಷ ಮ್ಹೋಗು ಆನಿ ಗೌರವು ತಾನ್ನಿ ವಾಡ್ಡೊನು ಘೆತ್ತಿಲೆ. ಶ್ರೀ ಕಾಶೀಮಠ ಸಂಸ್ಥಾನಾಚೆ ತೆದನಾಂಚೆ ಸ್ವಾಮೀಜಿ ಶ್ರೀಮದ್ ಸುಕೃತೀಂದ್ರ ತೀರ್ಥ ಸ್ವಾಮ್ಯಾನಿಂ ಎರ್ನಾಕುಲಂತು ವಾಸ್ತವ್ಯ ಕೊರನು ಆಶ್ಶಿಲ ತೆದ್ನಾ ಹೇ ಚರಕೋ ತಾಂಗೆಲೆ ನಜರಾಕ ಪಡಲೊ. ತ್ಯಾ ವೇಳ್ಯಾರಿ ತಾನ್ನಿ ವರೇನ ಮಠಾಕ ಉತ್ತರಾಧಿಕಾರಿ ವೆಂಚಿತಾ ಆಶ್ಶಿಲೆ. ಪೂಜ್ಯ ಶ್ರೀಮದ್ ಸುಕೃತೀಂದ್ರ ತೀರ್ಥ ಸ್ವಾಮ್ಯಾನಿಂ ಶ್ರೀ ಸದಾಶಿವ ಶೆಣೈಲೆ ಜಾತಕ ಹಾಡೋನು ಪಳಯಿಲ ತೆದ್ದನಾ ತಾಂಕಾ ಆಪಣೇಲೆ ಉತ್ತರಾಧಿಕಾರಿ ಜಾವಚೆ ಸರ್ವ ಲಕ್ಷಣ ಆನಿ ಸಾಮರ್ಥ್ಯ ಆಸ್ಸಾ ಮ್ಹೊಣು ಕಳ್ಳೆ. ಶ್ರೀ ಸದಾಶಿವ ಶೆಣೈಂಗೆಲೆ ಅವಯಿ-ಬಾಪಯ್ಕ ಒಪ್ಸುನು ತಾನ್ನಿ ಶಿಷ್ಯ ಸ್ವೀಕಾರಾಕ ತಯಾರಿ ಕೆಲ್ಲಿ. ಮುಲ್ಕಿ ಗಾಂವ ಗೌಡ ಸಾರಸ್ವತ ಬ್ರಾಹ್ಮಣಾಂಕ ಸರ್ವಾಂಕ ಅತೀ ಪವಿತ್ರ ಕ್ಷೇತ್ರ. ನಾಮಾಧಿಕ ಶ್ರೀ ವೆಂಕಟರಮಣ, ಶ್ರೀ ಉಗ್ರ ನರಸಿಂಹ ಆನಿ ಶ್ರೀ ಬಿಂದು ಮಾಧವ ಹಾಂಗೆಲೆ ದಿವ್ಯ ಸನ್ನಿಧಿ. ಕಲಿಯುಗಾಚೆ ಭೂವೈಕುಂಠ ಮ್ಹಣಯೇತ ಕಿತ್ಕಿ. ಹಾಂಗಾ ಬುಧ್ವಾರು, ೨೪ ಮೇ ೧೯೪೪ ದಿವಸು ಕರ್ಕ ಲಗ್ನಾಂತು ಶ್ರೀ ಸುಧಾಕರ ಶೆಣೈಕ ಸನ್ಯಾಸ ದೀಕ್ಷಾ ದೀವ್ನು ಶ್ರೀಮದ್ ಸುಧೀಂದ್ರ ತೀರ್ಥ ಮ್ಹಣಚೆ ನಾಮಾಭಿದಾನ ದಿಲ್ಲೆ. ಶ್ರೀಮದ್ ಸುಧೀಂದ್ರ ತೀರ್ಥಾಂಕ ಸಂಸ್ಕೃತ ಆನಿ ಧರ್ಮಶಾಸ್ತ್ರಾಚೆ ಜ್ಞಾನ ಮೆಳ್ಚ ಖಾತ್ತಿರಿ ಆಧ್ಯಾತ್ಮಿಕ ಶಿಕ್ಷಣ ಘೆವಚಾಕ ಲಾಗಲೆ. ಕಾರ್ಕಳಾಚೆ ಭುವನೇಂದ್ರ ಸಂಸ್ಕೃತ ಕಾಲೇಜಾಂತು ಸಂಸ್ಕೃತಾಂತು ಪಾಂಡಿತ್ಯ ಘೆತಲೆ. ಧರ್ಮ ಶಾಸ್ತ್ರಾಂತು ಅಗತ್ಯ ಶಿಕ್ಷಣ ದಿವಚಾಕ ಕಾಲೇಜಾಚೆ ವಿದ್ವಾಂಸಾಂಕ ನೇಮಣೂಕಿ ಕೆಲ್ಲೆ. ಕಾಲೇಜಾಚೆ ಆವಾರಾಂತು ಆಸ್ಸುಚೆ ಶ್ರೀನಿವಾಸ ಆಶ್ರಮಾಂತು ವಾಸ್ತವ್ಯ ವ್ಹರಲೆ.
ಪೂಜ್ಯ ಶ್ರೀಮದ್ ಸುಧೀಂದ್ರ ತೀರ್ಥ ಸ್ವಾಮ್ಯಾಂಕ ಅತ್ಯುತ್ತಮ ಗ್ರಹಣ ಶಕ್ತಿ, ಅದ್ಭುತ ಸ್ಮರಣ ಶಕ್ತಿ ಆನಿ ಅಪಾರ ಶಾಣ್ಯಾಪಣ ಆಶ್ಶಿಲೆ. ದೇವಾಲೆಂ ಅನುಗ್ರಹ, ಗುರು ಆಶೀರ್ವಾದ ವರೇನ ಆಸ್ಸುನು ಆಪಣೇಲೆ ಅಧ್ಯಯನ ತಾನ್ನ್ತಿ ಮಸ್ತ ಊಣೆ ಕಾಲಾಂತು ಪೂರ್ತಿ ಕೆಲ್ಲೆ. ಬ್ರಹ್ಮ ಸೂತ್ರ, ಭಗವದ್ಗೀತೆ ಆನಿ ಉಪನಿಷತ್ತ (ಪ್ರಸ್ಥಾನ ತ್ರಯ) ಬರಶಿ ವೆಗಳೆ ಧಾರ್ಮಿಕ ಕೃತಿಂಕ ವಿವರ ಜಾವ್ನು ಅಧ್ಯಯನ ಕೆಲ್ಲೆ. ಶ್ರೀ ಮಧ್ವಾಚಾರ್ಯಾನಿ ಪ್ರತಿಪಾದನ ಕೆಲೀಲ್ವರಿ ತಾನ್ನಿ ದ್ವೈತ ತತ್ತ್ವಶಾಸ್ತ್ರಾಂತು ಶ್ರೇಷ್ಠ ವಿದ್ವಾಂಸ ಜಾಲ್ಲೆ. ಆಗಮ ಶಾಸ್ತ್ರಾ ಪ್ರಮಾಣೆ ದೇವ ಪೂಜಾ ಕೊರಚೆ ರೀತಿ-ರಿವಾಜ ಶಿಕ್ಲೆ. ಗುರು ಶ್ರೀಮದ್ ಸುಕೃತೀಂದ್ರ ತೀರ್ಥ ಬರಶಿ ವೆಗವೆಗಳೆ ಕಡೇನ ಪರ್ಯಟನ ಕೆಲ್ಲೆ. ತಾಜೇನ ಶ್ರೀ ಕಾಶೀಮಠ ಸಂಸ್ಥಾನಾಚೆ ರಿವಾಜ ಆನಿ ಶಾಖಾ ಮಠಾಚೆ ಒಳಕ ಕೊರನು ಘೆತ್ಲೆ. ೧೯೪೯ ಇಸ್ವೆಂತು ಗುರು ಶ್ರೀಮಠ ಸುಕ್ರತೀಂದ್ರ ತೀರ್ಥ ಸ್ವಾಮ್ಯಾನಿ ಮುಕ್ತಿ ಪಾವ್ಲೆ ಉಪರಾಂತ ಶ್ರೀಮದ್ ಸುಧೀಂದ್ರ ತೀರ್ಥ ಸ್ವಾಮೆಂನಿ ಸಂಸ್ಥಾನಾಚೆ ಅಧಿಕಾರ ಘೇವ್ನು ಅಖಂಡ ೬೭ ವರ್ಷ ಕಾಳ ಶ್ರೀ ಸಂಸ್ಥಾನ ಕಾಶೀಮಠ ಮ್ಹಣಚೆ ತೇರು ಚಲೋನು ಘೇವ್ನು ಆಯ್ಲೆ. ಸನ್ಯಾಸಿನಿ ಏಕ್ಕಽಚಿ ಜಾಗೆಂತು ವ್ಹರಚಾಕ ನಜ್ಜ ಮ್ಹಣಚೆ ರಿವಾಜ ಆಸ್ಸಾ. ತ್ಯಾ ಪ್ರಮಾಣೆ ಶ್ರೀಮದ್ ಸುಧೀಂದ್ರ ತೀರ್ಥ ಸ್ವಾಮೆಂ ಕನ್ಯಾಕುಮಾರಿಚಾನ ಬದರಿನಾಥ ಪರ್ಯಂತ ಖಂಯಿ ಖಂಯಿ ಮಠಾಚೆ ಶಿಷ್ಯ, ಗೌಡ ಸಾರಸ್ವತ ಸಮಾಜ ಬಾಂಧವ ಆಸತಾತಿಕಿ ಥಂಯಿ ಥಂಯಿ ಸಬಾರ ಪಂತಾ ಪ್ರಯಾಣ ಕೊರನು ಶಿಷ್ಯಕೋಟಿಕ ಭೆಟ್ಟುನು ನೈತಿಕಪಣಾಣಿ ಆನಿ ಧರ್ಮ ಪ್ರಮಾಣೆ ಜೀವನ ಚಲಯಚಾಕ ಉತ್ತೇಜನ ದಿಲ್ಲೆ. ಮಾತ್ರ ನ್ಹಂಹಿ ರಾಷ್ಟ್ರಾಚೆ ನಾಮಾಧಿಕ ಪುಣ್ಯಕ್ಷೇತ್ರ ಜಾಲೀಲೆ ನಾಸಿಕ್, ಉಜ್ಜಯಿನಿ, ಕುರುಕ್ಷೇತ್ರ, ಮಥುರಾ, ಅಯೋಧ್ಯೆ, ಪ್ರಯಾಗ, ಕಾಶಿ, ಹರಿದ್ವಾರ, ಋಷಿಕೇಶ, ಬದರಿ, ತಿರುಪತಿ, ಶ್ರೀರಂಗಂ, ಮಧುರೈ, ಪಳನಿ, ಕುಂಭಕೋಣಂ, ರಾಮೇಶ್ವರಂ ಆನಿ ಕನ್ಯಾಕುಮಾರಿ ಸಹಿತ ಸರ್ವ ಯಾತ್ರಾ ಕ್ಷೇತ್ರಾಕ ಭೆಟ್ಟಿಲೆ. ಸಮಾಜ ಆನಿ ಸಮಾಜ ಬಾಂದವಾಲೊ ಬರೇಪಣ ಖಾತ್ತಿರಿ ಶ್ರೀ ವ್ಯಾಸ-ರಘುಪತಿಕ ಅಪರಿಮಿತ ಭಕ್ತಿ- ಶೃದ್ಧೇನಿ ಪೂಜ್ಜಿಲೆ.
ಸಮಾಜಾಚೆ ಲೋಕಾ ತಾಕೂನು ಧರ್ಮ ಕಾರ್ಯ ಚಲಯಚಾಂತೂ ತಾನ್ನಿ ಮುಖಾರ ಆಶ್ಶಿಲೆ. ೧೯೫೯ಚೆ ಮೇ,೨೦ಕ ಕುಂದಾಪುರದ ಶ್ರೀ ವೆಂಕಟರಮಣ ದೇವಳಾಚೆ ತೀಸರೇಚೆ ಜೀರ್ಣೋದ್ಧಾರ/ ಪುನರ್ ಪ್ರತಿಷ್ಠಾಪನಾ ಕಾರ್ಯ ಚಲಾಯಿಸಿಲೆ. ೧೯೬೦ಚೆ ಏಪ್ರಿಲ್ ೪ಕ ಹೊಸದುರ್ಗಾಚೆ ಶ್ರೀ ಲಕ್ಷ್ಮೀ ವೆಂಕಟೇಶ ದೇವಳಾಂತು ಪುನರ್ ಪ್ರತಿಷ್ಠಾ ಕಾರ್ಯ ಚಲಾಯಿಸಿಲೆ. ತಶೀಚಿ ಮುಂಬೈಚೆ ಕುರ್ಲಾ ಬಾಲಾಜಿ ಮಂದಿರಾಂತು ಶ್ರೀ ವೆಂಕಟರಮಣಾಲೆ ಮೂರ್ತಿಚೆ ಪ್ರತಿಷ್ಠಾಪನಾ (ಮಾರ್ಚ್ ೨೦, ೧೯೭೩), ಶ್ರೀ ವೆಂಕಟರಮಣ ದೇವಸ್ಥಾನ, ಕಾಸರಗೋಡು, ಶ್ರೀ ವರದರಾಜ ವೆಂಕಟರಮಣ ದೇವಸ್ಥಾನ, ಗುರುಪುರ, ಶ್ರೀ ವೆಂಕಟರಮಣ ದೇವಸ್ಥಾನ, ಮಂಗಳೂರು, ಶ್ರೀ ಕೃಷ್ಣ ಮಂದಿರ, ಮಂಗಳೂರು, ಕೊಂಚಾಡಿ ಶ್ರೀ ಕಾಶಿ ಮಠಾಂತುಲೀಂ ಶ್ರೀ ವೆಂಕಟರಮಣ ಆನಿ ಮಹಾಲಸ ದೇವಳ, ಕೋಟಾಂತು ಶ್ರೀ ಮುರಳೀಧರ ಕೃಷ್ಣ, ಶ್ರೀ ರಾಮಾಂಜನೇಯ ದೇವಳಾಂತು ಶ್ರೀ ನರಸಿಂಹ, ವಿಲೇಪಾರ್ಲೆ (ಮುಂಬೈ), ಶ್ರೀ ವೆಂಕಟರಮಣ ದೇವಳ, ಉಪ್ಪಿನಂಗಡಿ ಆನಿ ಶ್ರೀ ಲಕ್ಷ್ಮೀ ವೆಂಕಟೇಶ ದೇವಳ, ಶ್ರೀ ರಾಮಾಂಜನೇಯ ದೇವಳಾಂತು ಶ್ರೀ ನರಸಿಂಹ ಸಹಿತ ವೆಗವೆಗಳೆ ದೇವಳಾಂತು ದೇವಾಲೆ ಮೂರ್ತಿ ಪ್ರತಿಷ್ಠಾಪನ, ಪುನರ್ ಪ್ರತಿಷ್ಠಾ ಕರಯಸಿಲೆ. ಕಾಸರಗೋಡು ಶ್ರೀ ಲಕ್ಷ್ಮೀ ವೆಂಕಟೇಶ ದೇವಳಾಂತು ೫೨ ಕೋಟಿ ರಾಮನಾಮ ಜಪಯಜ್ಞ ಚಲಾಯಿಸಿಲೆ. ಗೌಡ ಸಾರಸ್ವತ ಬ್ರಾಹ್ಮಣ ಸಮಾಜಾಚೆ ಇತಿಹಾಸಾಂತು ದಾಖಲ ಜಾವ್ನು ವ್ಹರಚೆ ತಸ್ಸಾಲೆ ಸ್ವಾಮ್ಯಾಂಗೆಲೆ ಆನ್ನೇಕ ಸಾಧನಾ ಮ್ಹಳಯಾರಿ ೧೯೬೩ ಇಸ್ವೆಂತು ಕಾರ್ಕಳಾಂತು ಜಿ.ಎಸ.ಬಿ. ಸಮಾಜಾಚೆ ತಿನ್ನೀ ಮಠಾಚೆ ಸ್ವಾಮ್ಯಾನಿ ಏಕ್ಕಡೆಚಿ ಚಾತುರ್ಮಾಸ ವ್ರತ ಆಚರಣ ಕೊರಚೆ ವರಿ ಕೆಲೀಲೆ. ತಾಜ್ಜೆ ಪಯ್ಲೆ ಅಸ್ಸಾಲೆ ಘಟನಾ ಕೆದನಾಂಯಿ ಚೇಲ್ನಿ ಆಶ್ಶಿಲೆ. ತಾನ್ನಿ ೧೯೬೯ಚೆ ಮಾರ್ಚಾಂತು ಕಾರ್ಕಳಾಚೆ ಶ್ರೀ ವೆಂಕಟರಮಣ ದೇವಳಾಂತು ತಶೀಚಿ ೧೯೭೧ ಇಸ್ವೆಚೆ ಮೇಂತು ಉಡುಪಿಚೆ ಶ್ರೀ ಲಕ್ಷ್ಮೀ ವೆಂಕಟೇಶ ದೇವಳಾಂತು ಸಹಸ್ರ ಕುಂಭಾಭಿಷೇಕ ಚಲಾಯಿಸಿಲೆ. ತಾಜ್ಜ ಬರಶಿ ತಾನ್ನಿ ೧೯೬೦ ಇಸ್ವೆಂತು ಭಾಗಮಂಡಲಾಂತು ಆನಿ ಗೊಂಯ್ಚೆ ಬಂಡೋರಾಂತು (೧೯೭೨), ಹುಬ್ಬಳ್ಳಿಂತು ಶಾಖಾಮಠ ಸ್ಥಾಪನ ಕೆಲ್ಲಿ. ಶ್ರೀ ಭುವನೇಂದ್ರ ಬಾಲಕಾಶ್ರಮ(೧೯೬೫), ೧೯೫೬ಂತು ಉಡುಪಿಂತು ಶ್ರೀ ಕಾಶಿಮಠ ವೆಲ್‌ಫೇರ್ ಫಂಡ್ (೧೯೫೯ ಇಸ್ವೆಂತು ಹೇ ನೋಂದ ಕೆಲ್ಲಿ), ಭಾರತೀಯ ಸಾಂಸ್ಕೃತಿಕ ಪ್ರಕಟನಾಲಯ, ಮುಂಬೈ ಆದಿ ಅಪಾರ ಜನೋಪಕಾರಿ ಸಂಸ್ಥೊ ಆರಂಭ ಕೊರನು ತಾಜೇನ ಸಮಾಜ ಬಾಂಧವಾಲೊ ಉದರ್ಗತಿ ಖಾತ್ತಿರಿ ನಿರಂತರ ಯೋಜನಾ ಘಾಲ್ನು ಘೆವಚಾಕ ಚಾಲನ ದಿಲ್ಲಿ. ಶ್ರೀಮದ್ ಸುಧೀಂದ್ರ ತೀರ್ಥ ಸ್ವಾಮ್ಯಾಂಕ ಮೈಸೂರು ಸರ್ಕಾರಾನಿ ೧೯೫೩ಂತು ಸನದ್ ದಿಲ್ಲೆ. ತಾಜ್ಜ ಪಯಲೇಚಿ ಶ್ರೀ ಮಠಾಚೆ ಸ್ವಾಮ್ಯಾಂಕ ಪಾಲಂಖೀ, ನಗಾರಿ, ಪಟಗಾರು ಆನಿ ತಾಳ, ಶ್ವೇತಛತ್ರಿ, ಉಭಯಾಸನ ಆನಿ ತಳಗಲು ಗೌರವ ಸರಕಾರಾನಿ ಮಂಜೂರಿ ಕೆಲೀಲೆ. ಶ್ರೀಮದ್ ಸುಧೀಂದ್ರ ತೀರ್ಥ ಸ್ವಾಮ್ಯಾಂಕ ಅತಿರಿಕ್ತ ಜಾವ್ನು ಹಗಲು ದೀವಟಿಗೆ, ಉಭಯ ಚಾಮರ, ಮಕರ ತೋರಣ, ಕವಿ ನಿಶಾನಿ, ಧವಳ ಶಂಖ, ಸುರೇಪಾನ್ ಗೌರವ ಮಂಜೂರ ಕೆಲ್ಲೆ. ಶ್ರೀಮದ್ ಸುಧೀಂದ್ರ ತೀರ್ಥ ಸ್ವಾಮ್ಯಾನಿಂ ಶ್ರೀ ಕಾಶೀಮಠ ಸಂಸ್ಥಾನಾಚೆ ಅಧಿಕಾರ ಚಲಯಿಲೆ ಕಾಲ ಜಿ.ಎಸ್.ಬಿ. ಸಮಾಜಾಚೆ ಇತಿಹಾಸಾಂತು ಸ್ವರ್ಣಾಕ್ಷರಾಂತು ಬರೋನು ದವರಕಾ ಜಾಲೀಲೆ ತಸ್ಸಾಲೆ ಮ್ಹಣಯೇತ.
ತಾಂಗೆಲೆ ಸಾಧನೆಂತು ಶ್ರೀ ಅಷ್ಟ ಕುಲದೇವತಾ. ಕೇರಳಾಚೆ ಅಂಬಲಮೇಡು ದೇವಳ ಆನಿ ಶ್ರೀ ಹರಿದ್ವಾರಾಚೆ ವ್ಯಾಸ ಮಂದಿರ ಪ್ರತಿಷ್ಠಾ ಉಟಾನು ದಿಸ್ತಾ. ತಾನ್ನಿ ಸೂರು ಕೆಲೀಲೆ ಕಾಶಿ ಮಠಾಚೆ ಕಲ್ಯಾಣ ನಿಧಿ, ಶ್ರೀ ವೇದವ್ಯಾಸ ಚಾರಿಟೇಬಲ್ ಟ್ರಸ್ಟ್ ಸಹಿತ ಆಧ್ಯಾತ್ಮಿಕ, ಶೈಕ್ಷಣಿಕ ಆನಿ ಆರೋಗ್ಯ ಕ್ಷೇತ್ರಾಂತು ಸಮಾಜಾಕ ಅಮೋಘ ಸೇವಾ ಪಾವಯಿಲೆ ಆಮ್ಮಿ ಪಳೋವೇತ. ಬಸ್ರೂರ್‍ಚೆ ಭುವನೇಂದ್ರ ಬಾಲಕಾಶ್ರಮ, ಅರ್ನಬಳಮೇಡುಚೆ ಶ್ರೀ ವರದೇಂದ್ರ ಬಾಲಕಾಶ್ರಮ ಆನಿ ಕಾರ್ಕಳಾಚೆ ಶ್ರೀ ಸುಕೃತೀಂದ್ರ ಬಾಲಕಾಶ್ರಮ ಮೂಖಾಂತರ ದುರ್ಬಲ ವಿದ್ಯಾರ್ಥಿಂಕ ಉಚಿತ ಆಹಾರ, ವಸತಿ, ಶಿಕ್ಷಣ, ವೈದ್ಯಕೀಯ ಮದದ್ ದಿವಚೆ ಸಂಸ್ಥೊ ಜಾವ್ನಾಸ್ಸತಿ. ಅಂಬಲಮೇಡುಚೆ ಶ್ರೀ ಭುವನೇಂದ್ರ ವ್ರದಾಶ್ರಮ ವಯೋವೃದ್ಧಾಂಕ ಪಾಲನ ಕರ್ತಾ. ೧೯೭೧ ಂತು ಎಮಕುಲಂತು ಶ್ರೀ ಸುಧೀಂದ್ರ ಮೆಡಿಕಲ್ ಮಿಷನ್ ಆಸ್ಪತ್ರೆ ಆಜಿ ಪ್ರತಿಷ್ಠಿತ ಆನಿ ಬೃಹತ್ ಆಸ್ಪತ್ರ ಜಾವ್ನು ವಾಡಲಾ. ವ್ಯಾಸಾಶ್ರಮಾಚೆ ಹರಿದ್ವಾರಾ ಲಾಗ್ಗಿ ಮೋಡೆಮ್ ಆಸ್ಪತ್ರೆ, ಡಾ. ಪಡಿಯಾರ್ ಸ್ಮಾರಕ ಹೋಮಿಯೋಪತಿ ಕಾಲೇಜು, ಚೊಟ್ಟಾನಿಕರ ಆನಿ ಸುಕೃತೀಂದ್ರ ಓರಿಯಂಟಲ್ ರಿಸರ್ಚ್ ಇನ್ಸ್ಟಿಟ್ಯೂಟ್ ವರೇನ ಸೇವಾ ಕ್ಷೇತ್ರಾಂತು ವ್ಹಡ ನಾಂವ ಕಮಯಲಾ. ದೇವಭಾಸ ಸಂಸ್ಕೃತಾಚೆ ಪ್ರಚಾರ ಆನಿ ಆಧ್ಯಾತ್ಮಿಕ ಶಿಕ್ಷಣ ಖಾತ್ತಿರಿ 'ಸದ್ಗುರು ಸಂಸ್ಕೃತ ವಿದ್ಯಾಲಯಮ್', ಪೂಜಾ ಕೈಂಕರ್ಯ ಶಿಖಯಚೆ ವೇದ ಪಾಠಶಾಳಾ ವರೇನ ಪೂಜ್ಯ ಸ್ವಾಮ್ಯಾನಿ ಆರಂಭ ಕೊರನು ಮಠಾಚೆ ಕೀರ್ತಿ ದಶದಿಕ್ಕಾಂತು ಪಸರಚೆ ವರಿ ಕೆಲ್ಲ್ಯಾ. ಶ್ರೀಮದ್ ಸುಧೀಂದ್ರ ತೀರ್ಥ ಸ್ವಾಮ್ಯಾಂಗೆಲೆ ಸಾಧನೆ ಅಪಾರ. ಬರಯತಾ ಘೆಲಯಾರಿ ಏಕ ಬೃಹತ್ ಗ್ರಂಥ ಜಾತ್ತಾಲೆ. ಹಿಂದೂಲೋಕಾನಿ ನಂಬ್ಗೂಚೆ ಪ್ರಕಾರ ಕೃಷ್ಣದ್ವೈಪಾಯನಾನಿ ಪ್ರಾಚೀನ ಕಾಲಾಚೆ ಏಕ ವೇದ ಚಾರಿ ವೇದ ಜಾವ್ನು ವಿಂಗಡಣ ಕೆಲ್ಲೆ. ಮ್ಹೊಣೂ ಹಾಂಕಾ ವೇದವ್ಯಾಸ ಮ್ಹಣ್ಚೆ ನಾಂವ ಆಯ್ಲೆ ಕಂಯಿ. ವಿಷ್ಣು ಪುರಾಣ ಪ್ರಕಾರ ಒಟ್ಟು ಆಸ್ಸುಚೆ ಚಾರ ಯುಗಾಂತು ಪ್ರತಿ ತೀಸರೆಚೆ (ದ್ವಾರಪ) ಯುಹಾಂತು ಶ್ರೀ ಮಹಾವಿಷ್ಣು ವ್ಯಾಸಾಂಗೆಲೆ ರೂಪಾಂತು ಯವ್ನು ಮನುಷ್ಯ ಕುಲಾಚೆ ಉದರ್ಗತಿ ಖಾತ್ತಿರಿ ವೇದಕ ವಿಂಗಡಣ ಕರ್ತ ಕಂಯಿ. ಆಜಿ ಪರ್ಯಂತ ವೇದ ೨೮ ಪಂತಾ ವೈವಸ್ವತ ಮನ್ವಂತರಾಚೆ ಮಹರ್ಷಿ ತಾಕೂನು ವಿಂಗಡಣ ಕೆಲ್ಲ್ಯಾ. ಮ್ಹಳಯಾರಿ ಆಜಿ ಪರ್ಯಂತ ೨೮ ವ್ಯಾಸ ಯವ್ನು ಘೆಲ್ಲಿಂತಿ. ಪಯಲೇಚೆ ಜಾವ್ನು ವೇದ ವಿಂಗಡಣ ಕೆಲೀಲೊ ಸ್ವಯಂಭೂ (ಬ್ರಹ್ಮ); ತಾಗೆಲೆ ಉಪರಾಂತ ವೇದ ವಿಂಗಡಣ ಕೆಲೀಲೊ ಪ್ರಜಾಪತಿ... (ಅಶ್ಶಿ ೨೮ ಪಂತಾ) ಮಹಾಭಾರತ ಕಾಲಾಂತು ವೇದವ್ಯಾಸಾಲೆ ಜಲ್ನು ಉತ್ತರ ಪ್ರದೇಶಾಚೆ ಜಲುವಾ ಜಿಲ್ಲೆಚೆಕಲ್ಪಿ ಮ್ಹಣ್ಚೆ ಗಾಂವಾಂತು ಜಾಲ್ಲೆ ಕಂಯಿ. ಗೌಡ ಸಾರಸ್ವತ ಬ್ರಾಹ್ಮಣ ಸಮಾಜಾಚೆ ಪ್ರತಿಷ್ಠಿತ ಕಾಶೀಮಠ ಸಂಸ್ಥಾನಾಚೆ ದ್ವಿತೀಯ ಯತಿವರ್ಯ ಜಾಲೀಲೆ ವೃಂದಾವನಸ್ಥ ಶ್ರೀಮದ್ ಕೇಶವೇಂದ್ರ ತೀರ್ಥ ಸ್ವಾಮ್ಯಾಂಕ ಏಕ್ಪಟಿ ಗಂಗಾನಂಯಿಂತು ನಾತ್ತಾನಾ ಶ್ರೀ ವ್ಯಾಸಾಲೆಂ ಸುಂದರ ಸಾನ ಚಿನ್ಮಯಮೂರ್ತಿ ಮೆಳ್ಳೆ ಕಂಯಿ. ಮುಖಾರಿ ಹೇಂಚಿ ಶ್ರೀ ಮಠಾಚೆ ಆರಾಧ್ಯ ದೇವಮೂರ್ತಿಂತು ಏಕ ಜಾಲ್ಲೆ.
ಶ್ರೀ ಮಠಾಚೆ ಆರಾಧ್ಯ ದೇವು ಶ್ರೀ ವ್ಯಾಸಾಲೆ ನಾಂವಾಂತು ಏಕ ವೈಶಿಷ್ಠ್ಯಪೂರ್ಣ ಮಂದಿರ ಬಾಂದಕಾ ಮ್ಹಣಚೆ ಪ್ರೇರಣೇನಿ ೧೯೮೩ ಂತು, ಶ್ರೀ ಕಾಶಿಮಠ ಸಂಸ್ಥಾನಾಚೆ ಮ್ಹಾಲ್ಗಡೆ ಸ್ವಾಮೀಜಿ ಶ್ರೀಮದ್ ಸುಧೀಂದ್ರ ತೀರ್ಥ ಸ್ವಾಮ್ಯಾನಿಂ ಶ್ರೀ ಕಾಶೀಮಠಾಚೆ ಆರಾಧ್ಯ ದೇವು ಶ್ರೀ ವೇದವ್ಯಾಸ ದೇವಾಲೆ ಮಂದಿರ ನಿರ್ಮಾಣ ಕೊರಚಾಕ ಹರಿದ್ವಾರಾಂತು ಹರಿದ್ವಾರ-ಋಷಿಕೇಶ ರಸ್ತ್ಯಾಂತು ಭೂಂಯಿ ಖರೀದಿ ಕೆಲೀಲೆ. ತಶೀಚಿ ಮುಖಾರಿ ೨೦೦೧ ಇಸ್ವೆಂತು ತಾನ್ನಿ ಕಲ್ಪಿಂತು ವರೇನ ಶ್ರೀ ಬಾಲವ್ಯಾಸ ಮಂದಿರ ಬಾಂದಿಸಿಲೆ. ಹರಿದ್ವಾರಾಚೆ ಶ್ರೀ ವ್ಯಾಶಾಶ್ರಮ ಜಾಗೋ ಬಸ್‌ಸ್ಟ್ಯಾಂಡ್ ಆನಿ ರೇಲ್ವೇಸ್ಟೇಶನ್ನಾಚಾನ ೬ ಕಿ.ಮೀ. ದೂರ ಆಸ್ಸಾ. ಹೇ ದೇವಳ ಅಷ್ಟಭುಜಾಕೃತಿಂತು (ಅಷ್ಟಕೋನ ಆಕಾರಾಂತು) ಆಸ್ಸುನು ಮಂದಿರಾಚೆ ಪ್ರಧಾನ ದೇವು. ಭಗವಾನ್ ವೇದವ್ಯಾಸ, ಭಗವಾನ್ ರಘುಪತಿ ಆನಿ ಭಗವಾನ್ ನರಸಿಂಹ ಹಾಕ್ಕಾ ಶ್ರೀ ವ್ಯಾಸ ರಘುಪತಿ ನರಸಿಂಹ ಮ್ಹೊಣು ಆಪಯತಾತಿ. ಸಕ್ಕಡ ದೇವಾಂಕ ತ್ರಿಕಾಲ ಪೂಜಾ ಚಲ್ತಾ. ದೇವಳಾಚೆ ಆವಾರಾಂತು ನವಗ್ರಹ ಮಂದಿರ ವರೇನ ಆಸ್ಸಾ. ಹಾಕ್ಕಾ ವ್ಯಾಸಾಶ್ರಮ ಮ್ಹೊಣೂ ಆಪಯತಾತಿ. ಕಿತಯಾಕ ಮ್ಹಳಯಾರಿ ವ್ಯಾಸ ಮಂದಿರಾಚೆ ಸುತ್ಲೂ ಉದ್ಯಾನವನ, ರೂಕ ಆಸ್ಸಾ. ಮಸ್ತ ಪೊರನೆ ರುದ್ರಾಕ್ಷಿ ರೂಕು ವರೇನ ಆಸ್ಸಾ. ಶ್ರೀಮದ್ ಸುಧೀಂದ್ರ ತೀರ್ಥ ಸ್ವಾಮ್ಯಾಂಗೆಲೆ ವೃಂದಾವನ ವರೇನ ಹಾಂಗಾಚಿ ಆಸ್ಸಾ. ವ್ಯಾಸ ಮಂದಿರಾಂತು ಜವಣ, ಖಾಣ ಆನಿ ರಾಬಚಾಕ ವರೇನ ವ್ಯವಸ್ಥಾ ಆಸ್ಸಾ. ಸಾಂಜವಾಳಾ ಗಂಗಾರತಿ ವರೇನ ಚಲ್ತಾ. ಹೇ ವೈಶಿಷ್ಠ್ಯಪೂರ್ಣ, ಮಂದಿರಾಂತು ಶುಕ ಮಹರ್ಷಿ, ಬ್ರಹ್ಮ, ವಿಷ್ಣು ಆನಿ ಮಹೇಶ್ವರಾಲೆ ಮೂರ್ತಿ ವರೇನ ಆಸ್ಸಾ. ೧೯೮೬ ಇಸ್ವೆಂತು ಹಾಜ್ಜೆ ಪ್ರತಿಷ್ಟಾಪನ ಜಾಲ್ಲೆ.
ಜಾಲಯಾರಿ ಹೇ ಹರಿದ್ವಾರ ಮ್ಯಾಸಾಶ್ರಮ(ಮಂದಿರ) ಬಾಂಚೆ ಮಾಕಸಿ ವ್ಹಡ ಕಾಣಿ ಆಸ್ಸ. ಸಮಾಜ ದ್ರೋಹಿ ಲೋಕಾಂಗೆಲೆ ಬಂದೂಕಾಚೆ ಎದ್ರು ರಾಬ್ಬುನು ಹೇ ಬಾಂದಿಲೆ ರೋಚಕ ಕಾಣಿ ಆಯಕತನಾ ಖರೇಚಿ ಆಶ್ಚರ್ಯ ಜಾತ್ತಾ ಮಾತ್ರ ನ್ಹಂಹಿ ಪೂಜ್ಯ ಸ್ವಾಮ್ಯಾಂಗೆಲೆ ತಪೋಶಕ್ತಿಚೆ ಆನಿ ವೇದವ್ಯಾಸಾಲೆ ದೈವಶಕ್ತಿಚೆ ತಾಕತ್ ಆಮ್ಗೆಲೆ ಕಳೀತಾಕ ಯಾನಾಶಿ ಉರ್ನಾ. ತಾಜ್ಜೆ ಮಾಹಿತಿ ವಿಸ್ತಾರ ಜಾವ್ನು ಹೇ ಮಠಾಚೆ ಬಾಂಧಕಾಮಾಚೆ ನೇತೃತ್ವ ಘೆತ್ತಿಲೆ ಮೈಸೂರ್‍ಚೆ ಶ್ರೀ ಜನಾರ್ಧನ ಭಟ್ಮಾಮು ಸಾಂಗತಾತಿ ತಾಂಗೆಲೆ ಉತ್ರಾಂತೂ ಆಯ್ಕಯಾ.
ಹರಿದ್ವಾರ ಶ್ರೀ ವೇದವ್ಯಾಸ ಮಂದಿರ
- ಶ್ರೀಮತ್ ಸುಧೀಂದ್ರ ತೀರ್ಥ ಸ್ವಾಮ್ಯಾಂಗೆಲೆ ಅಪೂರ್ವ ಅನುಗ್ರಹ
ತೆದ್ನಾ ಹಾಂವು ಹರಿದಾರಾಚೆ ಸಿಂಡಿಕೇಟ್ ಬ್ಯಾಂಕಾಂತು ಮೆನೇಜರ್ ಜಾವ್ನಾಶ್ಶಿಲೊ. ೧೯೮೩ ಇಸ್ವೆಚೆ ಮೇ ಮ್ಹಹಿನ್ಯಾಂತು ಮಾಕ್ಕಾ ಗಾಜಿಯಾಬಾದ್ ಸಿಂಡಿಕೇಟ್ ಬ್ಯಾಂಕಾಕ ವರ್ಗ ಜಾವ್ಚೆ ಆಶ್ಶಿಲೆ. ಜಾಲಯಾರಿ ದೇವಾಲೆ ಇಚ್ಛಾಕಿ ಗೊತ್ನಾ ಹರಿದ್ವಾರಾಕ ವರ್ಗ ಜಾಲ್ಲೆ. ಶ್ರೀಮತ್ ಸುಧೀಂದ್ರ ತೀರ್ಥ ಸ್ವಾಮ್ಯಾಂಗೆಲೆಂ ಮಹಾತ್ವಾಕಾಂಕ್ಷೆಚೆ ವೇದವ್ಯಾಸ ಮಂದಿರ ಸ್ಥಾಪನ ಕೊರ್‍ಚೆ ಖಾತ್ತಿರಿ ಮಿಗೆಲೆ ವರ್ಗ ಜಾಲ್ಲೆ. ಹಾಂವೆ ತೈಕ ಘೆಲೀಲೆ ವೇಳ್ಯಾರಿ ಮಂದಿರಾಚೆ ಕಾಮ ರಾಬಯಚೆ ಖಾತ್ತಿರಿ ಗಾಂವ್ಚೆ ೩೦-೪೦ ಲೋಕಾನಿ ಬಂದೂಕು ಸಮೇತ ಯವ್ನು ಬಿಷ್ಟಾನು ಕಾಮ ರಾಬಯಿಲೆ. ತಾಜ್ಜೆ ಫಳ್ಳೆ ಬಿ‌ಎಚ್‌ಇ‌ಎಲ್ ಡೆಪುಟಿ ಜನರಲ್ ಮೆನೇಜರಾನಿ ಶ್ರೀ ಕೆ.ವಿ. ಶೆಣೈ ಮಾಮ್ಮಾನಿ ಪೂಜ್ಯ ಸ್ವಾಮ್ಯಾಂಕ ಹೆಂ ಪ್ರೊಜೆಕ್ಟ್ ಸೊಡ್ಚೆ ಚಾಂಗ ಮ್ಹೊಣು ಳಕಿತ ಮುಖಾಂತರ ಕಳಿತ ಹಾಲ್ಲೆ. ಹೆಂ ವಿಷಯು ಪೂಜ್ಯ ಸ್ವಾಮೇನಿ ಮಾಕ್ಕಾ ಆಳಪುಳ ದೇವಳಾಂತು ಸಾಂಗ್ಲೆ. ಹಾಂವೆಂ ಕಾರ್ಯ ಪರತೂನು ಆರಂಭ ಜಾಲೇಲೆ ವಿಷಯು ಸ್ವಾಮ್ಯಾಂಗೆಲೆ ನಜರಾಕ ಹಾಡಲೆ. ಜಾಲಯಾರಿ ಕಶ್ಶಿ ಪುನಃ ಪ್ರಾರಂಭ ಕೆಲ್ಲೆ ಮ್ಹೋಣು ಉದ್ದೇಶ ಪೂರ್ವಕ ಸಾಂಗನಿ. ಪೋರು ೨೦೨೩ ಇಸ್ವೆಂತು ಶ್ರೀಮದ್ ಸಂಯಮೀಂದ್ರ ತೀರ್ಥ ಸ್ವಾಮ್ಯಾಂಕ ಸಾಂಗ್ಲೆ. ತಾಂಕಾ ಆಯಕತಾನ ಭಯಮಿಶ್ರಿತ ಸಂತೋಷ ಜಾಲ್ಲೆ. ಹೇ ವಿಷಯು ಕೋಣಾಕ ಸಾಂಗಾನಿ, ತೇ ಸಮಯಾರಿ ಥಂಯಿ ಆಶ್ಶಿಲೆ ಆಮ್ಗೆಲೆ ಬ್ಯಾಂಕ್ ಸಿಬ್ಬಂದಿಕ ಗೊತ್ತು. ಆನಿ ಶ್ರೀ ಮಂಜೇಶ್ವರ ಮುಕುಂದ ಭಟ್ ಮಾಮ್ಮಾಕ ಕಳ್ಳೆ. ತೊ ಕಟ್ಟಡ ರಚನೆಕ ನಿಯುಕ್ತ ಆಶ್ಶಿಲೊ.
- ಹಾಂವು ಮಿಗೆಲೆ ಧರ್ಮಪತ್ನಿ, ದೊಗ್ಗ ಚಾಲ್ಲ್ಯಾ ಚರಡುವಾಂಕ (೪ವರ್ಷ ಆನಿ ೨ ವರ್ಷ) ಘೇವ್ನು ಹರಿದ್ವಾರಾಕ ವಚ್ಚುನು ಪಾವ್ಲೊ. ಮಾಕ್ಕಾ ಕಾಮ ರಾಬ್ಬಯಿಲೆ ವಿಷಯು ತೆದ್ನಾ ಕಳ್ಳೆ. ಶ್ರೀ ರಾಮಕೃಷ್ಣ ಆಶ್ರಮಾಂಚೆ ಅಧ್ಯಕ್ಷ ಶ್ರೀ ವರೇಶಾನಂದಜೀ ಮಹಾರಾಜಾನಿ ಸಾಂಗ್ಲೆ. ತಾನ್ನಿ ಹರಿದ್ವಾರಾಚೆ ಆಶ್ರಮಾಂಚೆ ಹೋಡು ಭಕ್ತ ಆನಿ ವ್ಯವಹಾರ ಆಶ್ಶಿಲೊ ಪರಿಚಯಕೆಲ್ಲೆ. ತಾಣೆಂ ಹರಿದ್ವಾರಾಚೆ ಹೋಡು ಸಕರಾರಿ ಕಂಟ್ರಾಕ್ಟರಾಲೆ ಪರಿಚಯ ಕೆಲ್ಲೊ. ತಾಗೆಲೆ ನಾಂವ ಶ್ರೀ ಜಯಪ್ರಕಾಶ ದುಬೆ ಮ್ಹೊಣು. ತಾಣೆ ತಾಗೆಲೆ ನಿಕಟ ದೋಸ್ತ ಬಿಷಮ್ ಪಾಂಡೆಲೆ ಆಮ್ಕಾ ಆಪೋನು ವ್ಹರಲೆ. ಬಿಷಮ ಪಾಂಡೆ ಮ್ಹಳೇರಿ ಲೋಕ ಕಡಕಡ್ತಾಲೆ. ತೆದನಾ ಜಸಪಾಲ್ ಸಿಂಗ್ ರಾಣಾಲೆ ಗ್ಯಾಂಗ್‌ಸ್ಟರ್ ಸಹರಾನ್‌ಪುರದ ಮ್ಯಾಜಿಸ್ಟ್ರೇಟ್ ಕೋರ್ಟಾಚೆ ಸಾಕ್ಷಿ ಪಂಜರ ತಾಕೂನು ತೆದನಾಚೆ ಕೃಷಿ ಸಚಿವ ಶ್ರೀ ಜಸ್ಪಾಲ್ ಸಿಂಗ್ ರಾಣಾ ತಾಗೆಲೆ ನಿಕಟ ಸಂಬಂಧಿಕ ಅಪಹರಣ ಕೋರ್‍ನು ೧೦ ಕಿ.ಮೀ. ದೂರ ವ್ಹರ್ನು ರುಂಡ ಕಾತ್ತೋರ್ನು ಮಾರ್ನು ಕಡ್ನು ಉಡ್ಡೊನು ಘೆಲೀಲೆ.. ಉತ್ತರ ಪ್ರದೇಶಾಚೆ ನಂ.೧ಕಿ ೨ಚೆ ಗ್ಯಾಂಗಸ್ಟಾರ ಆಸ್ಸಿಲೊ. ಶ್ರೀ ಜೆ.ಪಿ. ದುಬೆ ಹಾಣೆ ಬಿಷಮ ಪಾಂಡೆ ಆನಿ ಆಮ್ಮಿ ಚಾರಿ ಜನ ಮಠಾಚೆ ಆಂಗಣಾಕ ಪಾವ್ಲೆ. ತಾಕ್ಕಾ ಪಳೆಯಿಲೆ ಕೂಡ್ಲೆ ಗೂಂಡಾ ಲೋಕು ಯೇವ್ನು ತಾಗೆಲೆ ಪಾಯ್ಯಾರಿ ಪಳ್ಳೆ. ಆನಿ ಮಾಕ್ಕಾ ಸಾಂಗಲೆ “ಆಪ್ ಕಾಮ ಸೂರು ಕೀಜಿಯೇ!ಕೋ‌ಈ ತಕಲೀಪ ಕರೆಗಾ ಹಮ್ ಉನಕೇ ಗೋಲಿಸೆ ಉಡಾಯಂಗ| ಪಾಂಚ ಮಿನಿಟಾ ಭಿತ್ತೇರಿ ವಿಘ್ನ ನಿವಾರಣ ಜಾಲ್ಲೆ. ಹಾಂವೇ ಸ್ವಾಮೆಂ ಭಿತ್ತಾಲೆ ಮ್ಹೊಣು ಸಾಂಗ್ನಿ. ತೆದನಾ ಉತ್ತರ ಪ್ರದೇಶಾಂತು ಕಾಯ್ದೇ ವ್ಯವಸ್ಥಾ ಮಸ್ತ ವಾಯಟ ಜಾವ್ನು ಘೆಲೀಲೆ. ಏಕ ಉದಾಹರಣ ಏಕಳೆ ಎಸ್.ಪಿ ಆಮಿ ಡಿ.ಎಮ್. ಹಾನ್ನಿ ಏಕ ಯವತಿಲೆರೇಪ ಕೆಲ್ಲೆ. ೩ ದಿವಸು ಹರಿದ್ವಾರ ಬಂದ್ ಜಾಲೀಲೆ.ಮಾತ್ರ ನ್ಹಂಹಿ ಹರಿದ್ವಾರಾಂತು ಸಾಂಜವಾಳಾ ೫ ಘಂಟ್ಯಾ ಉಪರಾಂತ ಭಾಯ್ರಿ ಘೂವ್ಚೆ ತಶ್ಶಿ ನಾಶ್ಶಿಲೆ. ಜಾಲಯಾರೀಚಿ ಹರಿದ್ವಾರಾಚೆ ಹೇ ಶ್ರೀ ವ್ಯಾಸ ಮಂದಿರ ಪೂರ್ಣ ಜಾಲ್ಲಾ ಮ್ಹಳಯಾರಿ ಖಂಡಿತ ತ್ಯಾ ದೈವ ಆನಿ ಗುರು ಪ್ರೇರಣಾ ಮ್ಹೊಣೂ ಸಾಂಕಾ. ಹಾಂಗಾ ವೆಗವೆಗಳೆ ಗೊರವಾಂಲೆ ತಳಿ ಆಸ್ಸುಚೆ ವಿಶಾಲ ಗೋಶಾಳಾ ವರೇನ ಆಸ್ತಾ ಮ್ಹಣ್ಚೆ ಶ್ರೀ ಜನಾಧ್ನ ಭಟ್ಮಾಮ್ಮಾಲೆ ವಿನಮ್ರ ಉತ್ರ.
ಪೂಜ್ಯ ಸುಧೀಂದ್ರ ತೀರ್ಥ ಸ್ವಾಮ್ಯಾಂನಿ ದೇಶಾದ್ಯಂತ ವೆಗವೆಗಳೆ ಶಹರಾಂತು ಶಾಖಾ ಮಠ ಬಾಂದಿಲಾ. ಜಾಲಯಾರಿ ತಾಂಕಾ ಶ್ರೀ ವೇದವ್ಯಾಸಾಲೆ ಜನ್ಮಸ್ಥಳ ಕಲ್ಪಿಂತು ಬಾಲವ್ಯಾಸಾಲೆ ಏಕ ವ್ಯಾಸ ಮಂದಿರ ಬಾಂದಕಾ ಮ್ಹಣಚೆ ಇಚ್ಛಾ ಮಸ್ತ ಕಾಲಾಚಾನ ಆಶ್ಶಿಲೆ. ೨೦೦೧ ಇಸ್ವೆಚೆ ಜೂನ್ ೨೯ ತಾರೀಖೆಕ ಸ್ವಾಮ್ಯಾಂಗೆಲೆ ಹೇ ಸಪನ ಸಾಕಾರ ಜಾಲ್ಲೆ. ಹಾಂಗಾ ಬಾಲ ವ್ಯಾಸ ಆಪಣೇಲೆ ಆವಯಿ-ಬಾಪಯಿ ಬರಶಿ ಆಸ್ಸುಚೆ ಚಿತ್ರಣ ಮಸ್ತ ಅಪರೂಪ. ಶ್ರೀಮದ್ ಸುಧೀಂದ್ರ ತೀರ್ಥ ಸ್ವಾಮ್ಯಾಂಗೆಲೆ ಹೇ ಊಹನಾಕ ವೇದವ್ಯಾಸಾಂಗೆಲೆ ಪ್ರೇರಣೆಚಿ ಕಾರಣ ಮ್ಹಳಯಾರಿ ಚ್ಹೂಖ ಜಾಯಸನಾ. ಹಾಜ್ಜೆ ಉಜವೆ ಬಗಲೇನ ವ್ಯಾಸಾಂಗೆಲೆ ಬಾಪಯಿ ಪರಾಶರ ಮೂರ್ತಿ ಆಸ್ಸಾ. ಗರ್ಭಗೃಹಾಂತುಲೆ ಹೇ ದೃಶ್ಯ ಪಳೆಯಿಲೆ ಹರ್‍ಯೇಕ್ಲ್ಯಾಲೆ ಮನಾಂತೂ ಆಪಣೇಲೆ ಆವಯಿ-ಬಾಪಯಿಲೆ ಯಾದ ಜಾಯನಾಶಿ ಆಸ್ಸನಾ. ತಾಂಗೆಲೆ ಖಾತ್ತಿರಿ ವಾಯಟ ಜಾವ್ನು ಚಮ್ಕಿಲೀಲೆ ಆಸಲೇರಿ ಪಶ್ಚಾತ್ತಾಪ ಪಾವ್ನೂ ಯವಚಾಕ ಪುರೊಂತಿ. ಹೇ ಬಾಲವ್ಯಾಸ ಮಂದಿರಾಚೆ ಸುತ್ಲೂ ಶ್ರೀಕೃಷ್ಣ, ವೆಂಕಟೇಶ, ನರಸಿಂಹ, ವಾಮನ, ಪರಶುರಾಮ, ಲಕ್ಷ್ಮೀ, ಮಧ್ವಾಚಾರ್ಯ, ಮಠಾಚೆ ವೃಂದಾವನಸ್ಥ ಯತಿವರ್ಯ ಜಾಲೀಲೆ ಶ್ರೀಮದ್ ಭುವನೇಂದ್ರ ತೀರ್ಥ, ಶ್ರೀಮದ್ ವರದೇಂದ್ರ ತೀರ್ಥ ಆನಿ ಶ್ರೀಮದ್ ಸುಕೃತೀಂದ್ರ ತೀರ್ಥ ಯತಿವರ್ಯಾಂಗೆಲೆ ಮೂರ್ತಿ ಆಸ್ಸಾತಿ. ಬಾಯಚೆ ಸುತ್ತಾಚೆ ಪಾಗರಾಂತು ಕೇಶವ, ನಾರಾಯಣ, ಮಾಧವ, ಗೋವಿಂದ ಆದಿ ದೇವಾಂಗೆಲೆ ಸುಂದರ ಮೂರ್ತಿಂಕ ಪೊಳೋವೇತ. ಹೇ ದೊನ್ನೀಯಿ ಪ್ರೇಕ್ಷಣಿಯ ಜಾಗೋ ಮಾತ್ರ ನ್ಹಂಹಿ ವ್ಯಾಸ ಮಹರ್ಷಿಲೆ ಅಮೋಘ ಸೇವೆಕ ಶ್ರೀ ಸಂಸ್ಥಾನ ಕಾಶೀಮಠ ಆನಿ ಸಮಾಜ ಬಾಂಧವಾನಿ ದಾಖಯಿಲೆ ಕೃತಜ್ಞತಾ ಮ್ಹಳಯಾರಿ ಚ್ಹೂಖ ಜಾಯಸನಾ. ತ್ಯಾ ಕಾಮ ಪರಮಾತ್ಮಾನಿ ಶ್ರೀಮತ್ ಸುಧೀಂದ್ರ ತೀರ್ಥ ಸ್ವಾಮ್ಯಾಮಗೆಲೆ ನಿಮಿತ್ತ್ಯಾನಿ ಚಲಾಸೂನು ಘೆತ್ಲೆ.
೨೦೨೫ ಆನಿ ೨೦೨೬ ಇಸ್ವೆಂತು ಶ್ರೀಮದ್ ಸುಧೀಂದ್ರ ತೀರ್ಥ ಸ್ವಾಮ್ಯಾಂಗೆಲೆ ಜನ್ಮಶತಾಬ್ಧಿ ಪ್ರಯುಕ್ತ ಹರ್‍ಯೇಕ ಗಾಂವ್ಚೆ ಜಿ.ಎಸ್.ಬಿ. ಲೋಕಾಂಗೆಲೆ ಘರ್‍ಕಡೆ ಘರ್ ಘರ್ ಭಜನ ಆನಿ ಪೂಜ್ಯ ಸ್ವಾಮ್ಯಾಂಗೆಲೆ ಪಾದುಕಾ ರಥಯಾತ್ರಾ ದೇಶ ಬಽರಿ ಘೂವ್ನು ಪರತ ಹರಿದ್ವಾರಾಕ ಯವ್ನು ಪಾವ್ಲಾ. ತತ್ಸಂಬಂಧ ವಿಶೇಷ ಕಾರ್ಯಕ್ರಮು ಶ್ರೀಮದ್ ಸಂಯಮೀಂದ್ರ ತೀರ್ಥ ಸ್ವಾಮ್ಯಾಂಗೆಲೆ ದಿವ್ಯ ಉಪಸ್ಥಿತಿ ಆನಿ ಮಾರ್ಗದರ್ಶನಾರಿ ಎಪ್ರಿಲ್ ೧೪ಕ ಹರಿದ್ವಾರಾಚೆ ವ್ಯಾಸಾಶ್ರಮಾಂತು ಚಲ್ತಾ. ಹೇ ಶುಭಾವಸರಾರಿ ಪೂಜ್ಯಾಂಗೆಲೆ ಕೃಪಾ ಸಗಳೇ ಸಮಾಜಾ ವಯ್ರಿ ಆಸ್ಸುಚೆ ವರಿ ಜಾವೋಂ ಮ್ಹೊಣು ಸರಸ್ವತಿ ಪ್ರಭಾ ಆಶಯ್ತಾ. – ಆರಗೋಡು ಸುರೇಶ ಶೆಣೈ