ಮೂಡುಬಿದಿರೆಚೆ ಮೂಡುವೇಣುಪುರ ಶ್ರೀ ವೆಂಕಟರಮಣ ದೇವಳಾಂತು ಶ್ರೀ ವೆಂಕಟರಮಣ ದೇವಾಲೆಂ ಪ್ರತಿಷ್ಠಾ ವರ್ಧಂತಿ ಸಂಭ್ರಮು ದಿ. ೨೫-೦೫-೨೦೨೪ ದಿವಸು ವಿಜೃಂಭಣೆರಿ ಚಲ್ಲೆ. ಶತಕಲಶಾಭಿಷೇಕ, ಧೋಂಪಾರಾ ವಿಶೇಷ ಮಹಾಪೂಜಾ ಮಾಗಿರಿ ಸಮಾರಾಧನ ಚಲ್ಲೆ. ಸಾಂಜವಾಳಾ ಪೇಟೆ ಸವಾರಿ ಉತ್ಸವಾಂತು ಶೃಂಗಾರ ಕೆಲೀಲೆ ರುಪ್ಯಾ ಪಾಲ್ಕಿಂತು ಪಟ್ಟಾಚೆ ದೇವಾಲೆ ಆನಿ ಉತ್ಸವ ಶ್ರೀ ಗೋಪಾಲಕೃಷ್ಣ ದೇವಾಲೆ ಬಿಂಬಾಂಚೆ ಪೇಟೆ ಸವಾರಿ ಚಲ್ಲೆ. ಛತ್ರ, ಚಾಮರ, ದಂಡ, ಧ್ವಜ ದೀವಟಿಗೆ ವಾದ್ಯ ಮೇಳ ಸಹಿತ ಜಯ ಘೋಷ ಬರಶಿ ದೇವು ಪೇಟೆ ಸವಾರಿಕ ಭಾಯ್ರಿಸೊರನು ಶ್ರೀ ಹನುಮಂತ ದೇವಳ , ಪೊರನೆ ಪೊಲೀಸ್ ಠಾಣೆ, ಕಲ್ಸಂಕಾಕ ಪಾವಲೊ. ಥಂಚಾನ ಪರತೂನು ಪರತ ಪೊರನೆ ಪೋಲಿಸ್ ಠಾಣೆ ಜಂಕ್ಷನ್ ಮುಖಾಂತರ ಮುಖೇಲ ರಸ್ತ್ಯಾಂತು ಪೊರನೆ ಬಸ್ಸ್ಟ್ಯಾಂಡ್ ಜಂಕ್ಷನ್ ಥಂಚಾನ ಪರತೂನು ಶ್ರೀ ಹನುಮಂತ ದೇವಳಾ ಲಾಗ್ಗಿ ಘೂವ್ನು ದೇವಳಾಕ ಸವಾರಿ ಪರತಿಲೆ.
ಸಮಾಜ ಬಾಂಧವಾಲೆ ಘರಣಿಚಾನ ಆಪಣೇಲೆ ಘರಾಮುಖಾರಿ ಆಯ್ಯಿಲೆ ಧನಿಕ ಆರತಿ, ನಾರ್‍ಲುಕೇಳೆ, ಫೂಲ, ಕಾಣಿಕಾ ಸಮರ್ಪಣ ಕೊರನು ಪುನೀತ ಜಾಲ್ಲೆ. ರಾತ್ತಿಕ ವೇದ, ಅಷ್ಟಕ, ಸಂಕೀರ್ತನ, ವಾಜಪಾ ಸೇವಾ ಪ್ರದಕ್ಷಿಣೆ ಉಪರಾಂತ ವಸಂತ ಮಂಟಪಾಂತು ವಸಂತ ಪೂಜಾ ಚಲ್ಲೆ.
ದಿನಾಂಕ. ೨೬-೦೫-೨೦೨೪ ದಿವಸು ದೇವಾಲೆ ಪೇಟೆ ಉತ್ಸವಾಚೊ ಸಮಾರೋಪ ದಿವಷ ಜಾವ್ನಾಸ್ಸುನು ರಾತ್ತಿಕ ವಸಂತ ಪೂಜೆಚೆ ಉಪರಾಂತ ಉತ್ಸವ ಮೂರ್ತಿಕ ಪಾಲ್ಕಿಂತು ದೇವಳಾಚೆ ಒಳಾಂಗಣಾಂತು ಪ್ರದಕ್ಷಿಣೆಚೆ ಅಖೇರಿಕ ಸಮಾಜಾಚೆ ಹರ್‍ಯೇಕ ಘರಣೆಚಾನ ಕಾಣಿಕೆ ಬರಶಿ ದಿಲೀಲೆ ನಾರ್‍ಲು ದೇವರ ಬಿಂಬಾಕ ನಿವಾಳ್ಸುನು ಗಣೆ ಪಾತ್ರಾರಿ ಉಡ್ಡೊನು ಬೆತ್ತುಚೆ ಕಾಮ್ಮಾಂತು ಭಜಕ ಉಮೇದಾನ ವಾಂಟೊ ಘೆತ್ಲೆ. ದೇವು ಏಕ ವರ್ಷಾಚೆ ಪೇಟೆ ಉತ್ಸವಾದಿ ಪೂರ್ತಿ ಕೊರನು ಸಿಂಹಸಾನಾರೂಡ ಜಾವ್ನು ಪರತ ಉತ್ಥಾನ ಏಕಾದಶಿ ಪರ್ಯಂತ ವಿಶ್ರಾಂತಿಂತು ಆಸ್ಸುಚೆ ನಿಮಿತ್ತ್ಯಾನಿ ಮಂಗಲ ಪ್ರಾರ್ಥನೆ, ಪೂಜೆ ಕೊರನು ದೇವಾಲೆ ಗಡಿ ಪ್ರಸಾದ ಭಜಕಾಂಕ ವಾಂಟಿಲೆ.