“ದೇವಾನಿ ಆಮಕಾ ಕಸಲೆ ದಿವಕಾ ಮ್ಹಣ್ಚೆ ವಿಚಾರಾ ಪಶಿ ದೇವಾಲೆ ಸಂತೋಷ , ಮ್ಹೋಗೂಚಿ ಮುಖ್ಯ ಮ್ಹಣಚೆ ಸಮರ್ಪಣಾ ಭಕ್ತಿ ಭಾವಾನಿ, ಕೊರಚೆ ಕಾಮ್ಮಾನಿ ಸದಽ ಜೀಕ(ಯಶ) ಆಮ್ಗೆಲೆ ಜಾತ್ತಾ ಅಶ್ಶಿ ಮ್ಹೊಣು ಶ್ರೀ ಸಂಸ್ಥಾನ ಗೋಕರ್ಣ ಪರ್ತಗಾಳಿ ಜೀವೋತ್ತಮ ಮಠಾಧೀಶ ಶ್ರೀಮದ್ ವಿದ್ಯಾಧೀಶ ತೀರ್ಥ ಶ್ರೀಪಾದ ವಡೇರ್ ಸ್ವಾಮ್ಯಾನಿಂ ಸಾಂಗ್ಲೆ. ತಾನ್ನಿ ೨೮-೦೪-೨೦೨೪ ದಿವಸು ಸಾಂಜವಾಳಾ ಸ್ವರ್ಣಮಹೋತ್ಸವ ಸಂಭ್ರಮಾಂತು ಆಸ್ಸುಚೆ ಮಿತ್ತಬೈಲು ಶ್ರೀ ರಾಮ ಮಂದಿರಾಂತು ಆಪಣೇಲೆ ಪಯ್ಲೆ ಮೊಕ್ಕಾಂ ಖಾತ್ತಿರಿ ಪುರಪ್ರವೇಶ ಕೊರನು, ಪೂಜೆ ಉಪರಾಂತ ಆಶೀರ್ವಚನ ದಿತ್ತಾಶ್ಶಿಲೆ. ಹೇ ಶುಭ ವೇಳ್ಯಾರಿ ಪೂಜ್ಯ ಸ್ವಾಮ್ಯಾನಿ ಮಂದಿರಾಚೆ ನವೀಕೃತ ಸಭಾಗೃಹಾಕ ಲೋಕಾರ್ಪಣ ಕೆಲ್ಲೆ. ಆಡಳಿತ ಮಂಡಳಿ ತರಪೇನಿ ಅಧ್ಯಕ್ಷ ಗಿರಿಧರ್ ಪಿ. ನಾಯಕ್ ದಂಪತ್ಯಾನಿ ಸ್ವಾಮ್ಯಾಂಗೆಲೆ ಪಾದಪೂಜಾ ಕೆಲ್ಲೆ. ಮೂಡುಬಿದಿರೆ ಶಹರಾಚೆ ಶ್ರೀ ವೆಂಕಟರಮಣ ಆನಿ ಶ್ರೀ ಹನುಮಂತ ದೇವಳಾಚೆ ಆಡಳಿತ ಮೊಕ್ತೇಸರ ಜಿ. ಉಮೇಶ್ ಪೈ ಆನಿ ಮೊಕ್ತೇಸರಾಂಕ ಸ್ವಾಮ್ಯಾನಿ ಫಲಮಂತ್ರಾಕ್ಷತೆ ದಿಲ್ಲಿ. ನವೀಕೃತ ಸಭಾಗೃಹ ಸಹಿತ ಅಭಿವೃದ್ಧಿ ಕಾಮ್ಮಾಂತು ಮಸ್ತ ದೇಣಿಗಾ ದಿಲೀಲೆ ಗೋವರ್ಧನ ನಾಯಕ್ ಆನಿ ಪುಲ್ಕೇರಿ ಪಾಂಡುರಂಗ ಕಾಮತ್ ದಂಪತಿಂಕ ಸ್ವಾಮ್ಯಾಂಗೆಲೆ ಅಮೃತ ಹಾತ್ತಾನಿ ಗೌರವು ಕೆಲ್ಲೆ.

ವೈದಿಕ, ಮಂದಿರದ ಆಡಳಿತ ಮಂಡಳಿಚೆ ಕಾರ್ಯದರ್ಶಿ ನಿತ್ಯಾನಂದ ಕಾಮತ್, ಕೋಶಾಧಿಕಾರಿ ಗೋವಿಂದ ಪ್ರಭು, ಟ್ರಸ್ಟಿಜಾಲೀಲೆ ವಾಸುದೇವ ಪಿ. ನಾಯಕ್, ಶಶಿಧರ ಪಿ.ನಾಯಕ್, ನಾಗರಾಜ ಪ್ರಭು, ನರಸಿಂಹ ನಾಯಕ್, ಅನಂತ ಪ್ರಭು ನಿರ್ವಾಹಕ ವೆಂಕಟೇಶ್ ಪೈ ಉಪಸ್ಥಿತ ವ್ಹರಲೀಲೆ. ಟ್ರಸ್ಟಿ ರಮೇಶ್ ನಾಯಕ್ ತಾನ್ನಿ ಪ್ರಾಸ್ತಾವಿಕ ಜಾವ್ನು ಉಲಯಿಲೆ.
ಕುಮಟಾ ಮೊಕ್ಕಾಚಾನ ಮಿತ್ತಬೈಲು ಶಹರಾಕ ಆಯ್ಯಿಲೆ ಪೂಜ್ಯ ಸ್ವಾಮ್ಯಾಂಕ ಅಲಂಕೃತ ರಥಾಂತು ಬಸಕರೋನು ಗೌರವಾzರಾನಿ ಯೇವ್ಕಾರ ಕೆಲ್ಲೆ. ಪಾಲ್ಕಿಂತು ಸಂಸ್ಥಾನಾಚೆ ಪೂಜಾ ಬಿಂಬ, ಲಾಲ್ಕಿಂತು ಗುರು ವಿದ್ಯಾಧಿರಾಜ ತೀರ್ಥಾಂಗೆಲೆ ಭಾವ ಚಿತ್ರ, ವಾದ್ಯಮೇಳ ಸಹಿತ ಪೂರ್ಣ ಕುಂಭ ಯೇವ್ಕಾರ ದಿಲ್ಲೆ. ಪೆಂಟಾಚೆ ಸಮಾಜ ಭಾಂಧವಾಲೊ ಗೌರವ ಸ್ವೀಕಾರ ಕೆಲೀಲೆ ಸ್ವಾಮ್ಯಾನಿ ಫಲ ಮಂತ್ರಾಕ್ಷತಾ ವಾಂಟಿಲೆ.

ಮೇ ೧ಪರ್ಯಂತ ಪೂಜ್ಯ ಸ್ವಾಮೆಂ ಹಾಂಗಾಚಿ ಮೊಕ್ಕಾಂ ಆಶ್ಶಿಲೆ ಹೇ ವೇಳ್ಯಾರಿ ಎ೨೯ಕ ಶ್ರೀ ಲಕ್ಷ್ಮೀನಾರಾಯಣ ಹೃದಯ ಹವನ ಪೂರ್ಣಾಹುತಿ, ಸಾಂಜವಾಳಾ ಮಂದಿರಾಚೆ ಆವಾರಾಂತು ಚಂದ್ರಮಂಡಲ ( ಭಾಂಢೀ) ರಥೋತ್ಸವ, ರಥಾಚೆ ಕೂಡಾಚೆ ಉದ್ಘಾಟನ, ಎ ೩೦ ಕ ಚಂಡಿಕಾಹವನ, ಪೂಜ್ಯ ಸ್ವಾಮ್ಯಾಂಗೆಲೆ ತಾಕೂನು ಸುವರ್ಣ ಮಹೋತ್ಸವ ದೀಪ ಪ್ರಜ್ವಲನ , ಸೇವಾದಾರ, ದಾನಿಂಕ ಗೌರವ ಪ್ರಸಾದ, ಮೇ೧ ಕ ಶತಕಲಶಾಭಿಷೇಕ, ಮಹಾಸಭಾ, ಆಶೀರ್ವಚನ ಆದಿ ಕಾರ್ಯಕ್ರಮ ಚೋಲ್ನು ಪೂಜ್ಯ ಸ್ವಾಮೆಂ ಮುಖಾವಯಲೆ ಮೊಕ್ಕಾಮಾಕ ಭಾಯ್ರಿಸೊರನು ಘೆಲ್ಲೆ.