ಸಾಕೇತ ವೈದ್ಯಕೀಯ ಪ್ರಯೋಗಾಲಯ ಆನಿ ತಪಾಸಣಾ ಕೇಂದ್ರ (ನಿನಾದ ಚಾರಿಟೇಬಲ್ ಟ್ರಸ್ಟ್, ಗಂಗೊಳ್ಳಿ ಪ್ರವರ್ತಿತ) ಚೆ ಗಂಗೊಳ್ಳಿ ಶಾಖೆಚೆ ಪೂರ್ಣ ಪ್ರಮಾಣಾಚೆ ಸುಸಜ್ಜಿತ ವೈದ್ಯಕೀಯ ಪ್ರಯೋಗಾಲಯಾಚೆ ಉದ್ಘಾಟನಾ ಸಮಾರಂಭ ಆರತ ಗಂಗೊಳ್ಳಿಚೆ ವಾತ್ಸಲ್ಯ ಕಾಂಪ್ಲೆಕ್ಸ್ ಹಾಂಗಾ ಚಲ್ಲೆ. ಹೇ ವೇಳ್ಯಾರಿ ಶ್ರೀ ಯು. ಸದಾನಂದ ಪೈ (ದಾನಿ, ಬೆಂಗಳೂರು); ಡಾ| ಮಹೇಶ ಜಿ. (ಖ್ಯಾತ ವೈದ್ಯ); ಡಾ| ಯು. ಅನಿರುದ್ಧ ಪೈ (ವೈದ್ಯ, ಲಂಡನ್); ತಶೀಚಿ ಶ್ರೀ ಕೆ. ಮಧುಕರ ಭಟ್ (ದಾನಿ ತಶೀಚಿ ಸಾಕೇತ ವಿಶೇಷ ಸಮಿತಿಚೆ ಮುಖೇಳ ಉಡುಪಿ) ಹಾನ್ನಿ ಉಪಸ್ಥಿತ ವ್ಹರಲೀಲೆ. ಮುಖೇಲ ಸೊಯರೆ ಜಾವ್ನು ಆಯಲೀಲೆ ಡಾ| ಮಹೇಶ ಜಿ. ತಾನ್ನಿ ಉಲೋನು `ಖೇಡೆ ಗಾಂವ್ಚೆ ಲೋಕಾಂಕ ಮೂಲಭೂತ ವೈದ್ಯಕೀಯ ಸೌಲಭ್ಯ ಮೆಳ್ಚೆವರಿ ಕೊರಚೆ ನಿನಾದ ಸಂಸ್ಥೆಚೆ ಉದ್ದೇಶ ತಶೀಚಿ ತ್ಯಾ ಕಾರ್ಯರೂಪಾಕ ಹಾಡಚೆ ಖಾತೆರಿ ಸಂಸ್ಥ್ಯಾನಿ ಕರತಾ ಆಸ್ಸುಚೆ ವಾವರೋ ತಾಜ್ಜ ಖಾತೆರಿ ಪ್ರಶಂಸಾ ಪಾವಯಲೆ,
ಹೇ ವೇಳ್ಯಾರಿ ಟ್ರಸ್ಟ್ ಅಧ್ಯಕ್ಷ ಶ್ರೀ ಎಂ. ಮುಕುಂದ ಪೈ ಹಾನ್ನಿ ಪ್ರಾಸ್ತಾವಿಕ ಜಾವನು ಉಲಯಿಲೆ. ಸಂಸ್ಥೋ ಘೆಲೀಲೆ ೨೦ ವರ್ಷಾಚಾನ ಕೆಲೀಲೆ ಯೋಜನಾ, ಕಾರ್ಯಕ್ರಮಾಚೆ ವಿವರ ಸಾಂಗೂನು, ಅತಿಥಿ ಅಭ್ಯಾಗತಾಂಕ ಯೇವ್ಕಾರ ಕೆಲ್ಲಿ. ಟ್ರಸ್ಟ್ ಕಾರ್ಯದರ್ಶಿ ಶ್ರೀ ಜಿ. ಸುದರ್ಶನ ಆಚಾರ್ಯ ಹಾನ್ನಿ ಗಂಗಾಮೃತ ಯೋಜನೆ ಖಾತೇರಿ ಮಾಹಿತಿ ದೀವ್ನು ಆಬಾರ ಮಾನಲೆ. ವೇ. ಮೂ. ಜಿ. ವೇದವ್ಯಾಸ ಆಚಾರ್ಯ, ಗಂಗೊಳ್ಳಿ ಹಾಂಗೆಲೆ ನೇತೃತ್ವಾರಿ ಧಾರ್ಮಿಕ ಕಾರ್ಯ ಚಲ್ಲೆ. ಹೇ ವೇಳ್ಯಾರಿ ಸಾಕೇತ ಯೋಜನೆಚೆ ರೂವಾರಿ ಡಾ| ಯು. ಅಕ್ಷಯ ಪೈ, ಡೆನ್ಮಾರ್ಕ್; ಸಂಸ್ಥೆಚೆ ಪದಾಧಿಕಾರಿ ಲೋಕ ಉಪಸ್ಥಿತ ವ್ಹರಲೀಲೆ.
ನಿನಾದ ಸಂಸ್ಥೋ ಆಪಣೇಲೆ ಗಂಗಾಮೃತ ಆರೋಗ್ಯ ಸಂಬಂಧಿತ ಯೋಜನೆ (೨೦೧೭ ಂತು ಪ್ರಾರಂಭ) ಮುಖಾಂತರ ಘೆಲೀಲೆ ಸಾತ ವರ್ಷಾಂತು ಆರೋಗ್ಯ ತಪಾಸಣಾ ಶಿಬಿರ, ರಕ್ತದಾನ ಶಿಬಿರ, ಯೋಗಾಸನ ಶಿಬಿರ, ಕೊರೊನಾ ಮಹಾಮಾರಿ ವೇಳ್ಯಾರಿ ವೆಗವೆಗಳೆ ಕಾರ್ಯಕ್ರಮ, ಆಕಸ್ಮಿಕ ಜಾವ್ನು ಅನಾರೋಗ್ಯಾಕ ಶಿರಕತಲ್ಯಾಂಕ ಮದದ್ ದಿವಚೆ ಅಸ್ಸಾಲೆ ಶಂಬರಬಽರಿ ಕಾರ್ಯಕ್ರಮ ಚಲಾಯಿಸಿಲಾ. ತಾಂತೂಯಿ ಘೆಲೀಲೆ ವರ್ಷ ಖೇಡೆ ಗಾಂವ್ಚೆ ಲೋಕಾಂಕ ಊಣೆ ದುಡವಾಂತು ಉತ್ಕೃಷ್ಟ ಗುಣಮಟ್ಟಾಚೆ ವೈದ್ಯಕೀಯ ಸೌಲಭ್ಯ ದಿವಚೆ ಖಾತೇರಿ ಸಾಕೇತ ವೈದ್ಯಕೀಯ ಪ್ರಯೋಗಾಲಯ ತಶೀಚಿ ತಪಾಸಣಾ ಕೇಂದ್ರ ಆರಂಭ ಕೆಲ್ಲ್ಯಾ. ತ್ರಾಸಿ (ಮುಖ್ಯ ಕಛೇರಿ), ಹೆಮ್ಮಾಡಿ, ಗುಡ್ಡೆಯಂಗಡಿಂತು ಸಂಸ್ಥೆಚೆ ಕೇಂದ್ರ ಆಸ್ಸುನು, ಘೆಲೀಲೆ ೪ ವರ್ಷಾಂತು ಸುಮಾರ ೧೦೦೦೦ ಪಶಿ ಚ್ಹಡ ಲೋಕಾನಿ ಹಾಜ್ಜೆ ಮುನಾಪೋ ಘೆತಲ್ಯಾ. ಹೇ ಸಂತೋಷಾಚೆ ವಿಷಯು.