ಡಾ|| ವಿಶ್ವಾಸ ಡಿ. ಪೈ, ಹುಬ್ಬಳ್ಳಿ
`ಕ್ಯಾನ್ಸರ್ ಆಯ್ಲೆ ಮ್ಹಳಯಾರಿ ತೋಂ ಮನೀಷು ಕ್ಯಾನ್ಸಲ್ ಮ್ಹಣ್ಚೆ ಏಕ ಭಾವನಾ ಥೊಡೆ ಕಾಲಾ ಪಯಲೆ ಆಶ್ಶಿಲೆ. ಕ್ಯಾನ್ಸರ್, ಕುಷ್ಟ ರೋಗ ಆಯ್ಯಿಲೆ ರೋಗಿಂಕ ಘರಾಚಾನ ಭಾಯ್ರಿ ಧೂಂಗುಳ್ನು ಸೊಡ್ತಾಲೆ. ತ್ಯಾ ವಾಯ್ಟ ರೋಗ ಆಯ್ಯಿಲೆ ತಾಂಗೆಲೆ ಪ್ರಾರಬ್ಧ ಕರ್ಮಾನಿ, ತ್ಯಾ ಕರ್ಮಫಲ ತಾನ್ನೀಚಿ ಬೊಗ್ಗಕಾ ಮ್ಹೊಣು ಘರ್‍ಚಾನ ಭಾಯರ ಘಾಲತಾಲೆ. ಆಜಿ ವೈದ್ಯಕೀಯ ವಿಜ್ಞಾನ ಮಸ್ತ ಉದರ್ಗತಿ ಪಾವಲಾ. ಕ್ಯಾನ್ಸರ್ ಸಹಿತ ಖಂಚೇಯಿ ಕಾಯ್ಲೋ ಯವಚಾಕ ಪ್ರಾರಬ್ಧ ಕರ್ಮ ಜಾಂವೊ ಪಾಪಕಾರ್ಯ ಕಾರಣ ನ್ಹಂಹಿ. ವಾಂಚೆ ಪರಿಸರ, ಘೆವ್ಚೆ ಆಹಾರ, ಶ್ರಮರಹಿತ ಜೀವನಶೈಲಿ, ವಂಶಪಾರಂಪರ್‍ಯ,ಮನಾಚೆ ದಬಾವ ಇತ್ಯಾದಿ ಸಾಮಾನ್ಯ ಕಾರಣಾನಿ ಮಸ್ತ ಇತ್ಲೆ ರೋಗ ಎತ್ತಾತಿ ಮ್ಹಣ್ಚೆ ಆಧುನಿಕ ವೈದ್ಯವಿಜ್ಞಾನಾನಿ ಸೊದ್ದುನು ಕಾಡಲಾ. ಕ್ಯಾನ್ಸರ್ ವರೇನ ತ್ಯಾಂಚಿ ನಮೂನ್ಯಾನಿ ಯವಚೆ ಏಕ ಕಾಯ್ಲೊ. ಜಾಲಯಾರಿ ಕ್ಯಾನ್ಸರ್ ಮ್ಹಳಯಾರಿ ತ್ಯಾ ರೋಗ ಆಯ್ಯಿಲೆ ಮನುಷ್ಯಾಕ ಮಾತ್ರ ನ್ಹಂಹಿ ತಾಂಗೆಲೆ ಕುಟುಂಬಾಚಾಂಕ ವರೇನ ಮಸ್ತ ಭಯಿ, ಆತಂಕ, ಆಕಾಶೂಚಿ ಕಳಚೂನು ಮಾತ್ತೇರಿ ಪಡಲೀಲೆ ಅನುಭವು ಜಾವಚೆ ಪಟ್ಟಿಕ ನ್ಹಂಹಿ. ಆಮ್ಗೆಲೆ ದೋಸ್ತ, ಸೊಯರ್‍ಯಾಂಕ ಕ್ಯಾನ್ಸರ್ ಆಯಲ್ಯಾ ಮ್ಹಣಚೆ ಆಯ್ಕಲೆ ಕೂಡ್ಲೆ ಆಮಕಾ ತಾಂಗೆಲೆ ಖಾತೇರಿ ಪಾಪಶಿ(ಕನಿಕರ) ದಿಸ್ತಾ. ಜಾಲಯಾರಿ ಕ್ಯಾನ್ಸರಾ ಖಾತೇರಿ ಕೊಣೇಯಿ ಪೂರ್ತಿ ಜಾವ್ನು ಕೋಳ್ನು ಘೇನಾಶಿ ತೊಂಡಾಕ ಆಯ್ಯಿಲ ವರಿ ಸಾಂಗಿಲೆ ತೆದ್ನಾ ಭಯಿ, ಆತಂಕ ಚ್ಹಡ ಜಾತ್ತಾ ವತ್ತಾ. ಕ್ಯಾನ್ಸರ್ ರೋಗಿ ಬರಶಿ ಘರ್‍ಚೆ ವ್ಹರಲೀಲೆ ಸದಸ್ಯ ವರೇನ ರೋಗಿ ಜಾತ್ತಾತಿ. ಫೆಬ್ರವರಿಂತು ಕ್ಯಾನ್ಸರ್ ದಿವಸು ಮ್ಹೊಣು ಆಚರಣ ಕರತಾತಿ ತ್ಯಾ ಖಾತೆರಿ ಕ್ಯಾನ್ಸರಾ ವಿಷಯಾಂತು ಚಡ್ತೆ ಮಾಹಿತಿ ಆಮ್ಮಿ ಹೇ ಲೇಖನಾಂತು ಕೋಳ್ನು ಘೆವ್ಯಾ. ತುಮ್ಮಿ ಸಕಡಾನಿ ಆಯಕೂನು ಆಸ್ಸುಚಾಕ ಪುರೊಂತಿ.ಸಕಡಾಲೆ ಶರೀರ ಭಿತ್ತರಿ ಕ್ಯಾನ್ಸರ್ ಆಸತಾ ಮ್ಹಳಯಾರಿ ಕ್ಯಾನ್ಸರ್ ಜಾವನು ಬದಲ್ಚೆ ಜೀವಕೋಶ ಹರ್‍ಯೇಕ ಮನುಷ್ಯಾಲೆ ಶರೀರಾ ಭಿತ್ತರಿ ಆಸತಾ ಮ್ಹಣಚೆ. ಜಾಲಯಾರಿ ಹೇ ಪೂರ್ಣ ಸತ್ಯ ನ್ಹಂಹಿ. ಕಶ್ಶಿ ಸಾಂಗೇತ ಮ್ಹಳಯಾರಿ ಮನುಷ್ಯ ಲೋಕ ಸಕ್ಕಡೆ ಆಸತಾತಿ. ತಾಂಗೆಲೆ ಮಧೇಽಚಿ ಸಮಾಜ ದ್ರೋಹಿ, ಭಯೋತ್ಪಾದಕ ಲೋಕ ವರೇನ ಆಸತಾತಿ. ಒಟ್ಟು ಜನಾಂಕಡೆಚೆ ಕಿಂಚಿತ್ ವಾಂಟೆ ಲೋಕ ಭಯೋತ್ಪಾದಕ ಜಾವ್ನಾಸ್ತತಿ. ತಾನ್ನಿ ಆಮ್ಗೆಲೆ ಮಧೇಚಿ ಆಸತಾತಿ. ಸೂಕ್ತ ವೇಳು ಮೆಳೀಲೆ ತೆದ್ನಾ ಉಟಯತಾತಿ. ಧ್ವಂಸ ಕೊರಚಾಕ ದೇಂವ್ತಾತಿ. ಜಾಲಯಾರಿ ತಾನ್ನಿ ದುಸ್ರೆ ಲೋಕಾಚಾನ ಆಯ್ಯಿಲೆ ಲೋಕವೇ? ನ್ಹಂಹಿ ಆಮ್ಗೆಲೆ ಮಧೇಽಚಿ ಆಶ್ಶಿಲೆ ಲೋಕ. ಮಾತ್ರ ನ್ಹಂಹಿ ಆಮ್ಗೆಲೆ ಬರಶಿ ಆಶ್ಶಿಲೆ ಸಕ್ಕಡ ಲೋಕ ಭಯೋತ್ಪಾದಕ ಮ್ಹೊಣು ಸಾಂಗಚಾಕ ವರೇನ ಜಾಯ್ನಾ.
ಸಾಮಾನ್ಯ ಲೋಕಾಂತು ಖಂಚಕಿ ಕಾರಣಾನಿ ಮಾನಸಿಕ ವ್ಯತ್ಯಯ ಜಾಲೀಲೆ ತೆದ್ನಾ ತಾನ್ನಿ ಭಯೋತ್ಪಾದಕ, ನೆಕ್ಸಲೈಟ್ ಜಾವನು ಬದಲ್ತಾತಿ. ತಶೀಚಿ ಆಮ್ಗೆಲೆ ಶರೀರಾ ಭಿತ್ತರಿ ಆಸ್ಸುಚೆ ಸಾಮಾನ್ಯ ಜೀವಕೋಶ ಅಸಹಜ ಪ್ರಕ್ರಿಯಾಕ ಶಿರಕಲೀಲೆ ತೆದ್ದನಾ ತ್ಯಾ ಲ್ಯಾನ್ಸರ್ ಜಾವ್ನು ಬದಲ್ತಾ. ವ್ಹಯಿ! ಸಕಡಾಲೆ ಶರೀರಾಂತು ಕ್ಯಾನ್ಸರ್ ಆಸ್ಸನಾ. ಶರೀರಾಚೆ ಖಂಚತರಿ ಸಕಾಲಾಕ ಮರಣ ಪಾವ್ನಾತ್ತಿಲೆ ಜೀವಕೋಶ ಕ್ಯಾನ್ಸರ್ ಸೆಲ್ಸ್ ಜಾವ್ನು ಬದಲ್ತಾ ಆನಿ ವಾಡಚಾಕ ಲಾಗ್ತಾ, ಆಪಣಾ ತಸ್ಸಲೇಚಿ ಆನಿ ಇತ್ಲೆ ಜೀವಕೋಶಾಕ ಸೃಷ್ಠಿ ಕೊರಚಾಕ ಲಾಗತಾ. ಆನ್ನಿಕೆ ಸರಳ ಜಾವ್ನು ಸಾಂಕಾ ಮ್ಹಳಯಾರಿ ಹೇ ಭೂಂಯ್ಚೆ ವಯ್ರಿ ಜನ್ಮಿಲೆ ಪ್ರತಿಯೇಕ ಜೀವಿಕ ಏಕೇಕ ಆಯುಷ್ಯ ಆಸ್ಸುಚೆ ವರಿ ಆಮ್ಗೆಲೆ ಶರೀರಾ ಭಿತ್ತವೈಲೆ ಹರ್‍ಯೇಕ ಜೀವಕೋಶಾಕ ವರೇನ ಇತ್ಲೆ ಮ್ಹೊಣು ಆಯುಷ್ಯ ಆಸ್ತಾ. ಕೆಲವ ಜೀವಕೋಶ ಏಕ ದಿವಸು ಮಾತ್ರ ವಾಂಚಲೇರಿ, ಆನಿ ಕೆಲವ ಜೀವಕೋಶಾಕ ಏಕ ಆಠ್ವಡೆ, ಏಕ ಮ್ಹಹಿನೋ ಆಯುಷ್ಯ ಆಸ್ಸುಚಾಕ ಪುರೊ. ಸಾಮಾನ್ಯ ಇತಿಹಾಸ ಕಶ್ಶಿ ಆಸ್ತಕಿ, ತ್ಯಾ ಜೀವಕೋಶ ತಾಜ್ಜೆ ಆಯುಷ್ಯ ಸಂಪ್ಲೆ ಕೂಡ್ಲೆ ಮರಣ ಪಾವ್ತಾ. ಆನಿ ನವೀನ ಜೀವಕೋಶ ಜನ್ಮುನು ತಾಜ್ಜೆ ಕಾರ್‍ಯಮುಖಾರ್‍ಸುನು ವ್ಹರತಾ.
ಜಾಲಯಾರಿ ಶರೀರಾಂತು ಖಂಚತರಿ ಕಾರಣಾನಿ ಆಕಸ್ಮಿಕ ಬದಲಾವಣ ಘಡ್ನು ತ್ಯಾ ಜೀವಕೋಶ ಮರಣ ಪಾವ್ನಾ. ತಶೀಚಿ ಜೀವಂತ ವ್ಹರತಾ. ಆನಿ ವೃದ್ಧಿ ಪಾವಚಾಕ ಲಾಗತಾ. ಕೆದ್ನಾ ಥಂಯಿ ಆಕಸ್ಮಿಕ ಘಡಲಾ, ತಾಜ್ಜೆ ವಾಡಪಣ(ಗ್ರೋಥ್ ) ನಿಯಂತ್ರಣ ಕೊರಚೆ ನಮೂನೋ ಶರೀರಾಕ ಗೊತ್ನಾ, ತ್ಯಾ ನಿಮಿತ್ತ್ಯಾನ ನಿಯಂತ್ರಣ ಕೊರಚಾಕ ಶರೀರ್‍ಚೆ ರೋಗನಿರೋಧಕ ಶಕ್ತಿಕ ಜಾಯ್ನಾ. ಶರೀರಾಚೆ ರಕ್ಷಕ, ರೋಗನಿಯಂತ್ರಕ ಮ್ಹಳಯಾರಿ ರೋಗನಿರೋಧಕ ಶಕ್ತಿ, ತ್ಯಾಂಚಿ ವಿಫಲ ಜಾಲ್ಲಮಾಗಿರಿ ತ್ಯಾ ಕ್ಯಾನ್ಸರ್ ಜೀವಕೋಶ ರಕ್ತಬೀಜಾಸುರ ವರಿ ಅನಿಯಂತ್ರಿತ ಜಾವ್ನು ವೃದ್ಧಿ ಪಾವಚಾಕ ಲಾಗತಾ. ಮುಖಾರಿ ಕ್ಯಾನ್ಸರ್ ಜಾವ್ನು ಬದಲ್ತಾ. ತಶ್ಶಿ ಜಾವ್ನು ಕ್ಯಾನ್ಸರ್ ಮ್ಹಳಯಾರಿ ದುಸರೇ ಖಂಯ್ಕಿ ತಾಕೂನು ಯವ್ಚೆ ನ್ಹಂಹಿ. ಆಮ್ಗೆಲೆ ಶರೀರಾಚೆ ಜೀವಕೋಶಽಚಿ, ಶರೀರಾಚೆ ನಿರೋಧಕ ಶಕ್ತಿ ತಾಜ್ಜೆ ವೈಚೆ ನಿಯಂತ್ರಣ ದವರಚಾಕ ವಿಫಲ ಜಾವ್ಚೆ. ತೆದ್ನಾ ಆಮ್ಮಿ ತಾಕ್ಕಾ ಕ್ಯಾನ್ಸರ್ ಮ್ಹೊಣು ಆಪಯತಾತಿ. ಸಂಕ್ಷಿಪ್ತ ಜಾವನು ಸಾಂಕಾ ಮ್ಹಳಯಾರಿ ಡಿ.ಎನ್.ಎ.ಂತು ಆಸ್ಸುಚೆ `ಜೀನ್ ಹ್ಯಾ ರೂಪಾಂತರ ಪಾವಚೆ ಕ್ರಿಯಾ `ಕ್ಯಾನ್ಸರ್ ಯವಚಾಕ ಕಾರಣ ಜಾವಚೆ ಫಾವ್ ಆಸ್ಸಾ. (ಮುಖಾರಸಿತಾ)
Dr. M . No. : 9482182472, 6364690194)