“ಸಕ್ಕಡ ದೇವಾಲೆಂ ಸೃಷ್ಟಿಚಿ ಜಾವ್ನಾಶ್ಶಿಲೆ ತೆದ್ದನಾ ದೇವಾಕ ಆಮ್ಮಿ ದಿಲ್ಲೆ ಮ್ಹಣಚೆ ಅಹಂಭಾವಾಕ ಅರ್ಥ ನಾ. ಭಾವಗ್ರಾಹಿ ಜಾವ್ನಾಸ್ಸುಚೆ ಭಗವಂತಾಕ ಆಮ್ಗೆಲೇಚಿ ಮ್ಹಣಚೆ ವರಿ ದೇವಾಕ ಆಮ್ಮಿ ದಿವಚಾಕ ಸಾಧ್ಯ ಜಾವಚೆ ತಸ್ಸಾಲೆ ಭಕ್ತಿ ಮಾತ್ರ ಮ್ಹೊಣು ಶ್ರೀ ಸಂಸ್ಥಾನ ಗೋಕರ್ಣ ಪರ್ತಗಾಳಿ ಜೀವೋತ್ತಮ ಮಠಾಧೀಶ ಶ್ರೀಮದ್ ವಿದ್ಯಾಧೀಶ ತೀರ್ಥ ಸ್ವಾಮೀಜಿ ತಾನ್ನಿ ಸಾಂಗ್ಲೆ. ತಾನ್ನಿ ಆರತ ಮೂಡುವೇಣುಪುರ ಶ್ರೀ ವೆಂಕಟರಮಣ ಆನಿ ಶ್ರೀ ಹನುಮಂತ ದೇವಳಾಕ ಆಪಣೇಲೆ ಪಯಲೇಚೆ ಅನುಗ್ರಹ ಭೆಟ್ಟಿ ದಿವನು ಆಶೀರ್ವಚನ ದಿತ್ತಾ ಆಶ್ಶಿಲೆ.
ಶ್ರೀ ಸಂಸ್ಥಾನದ ೫೫೦ವೇಂ ವರ್ಷಾಚರಣೆ ಪ್ರಯುಕ್ತ ಚಲ್ತಾ ಆಸ್ಸುಚೆ ೫೫೦ ದಿವಸಾಚೆ ೫೫೦ ಕೋಟಿ ಶ್ರೀ ರಾಮನಾಮ ಜಪ ಅಭಿಯಾನಾಂತು ೧೨೦ ಜಪ ಕೇಂದ್ರ ಆನಿ ೮೫ ಉಪ ಕೇಂದ್ರಾಂತು ಎದ್ದೋಳಥಾಂಯ ಒಟ್ಟು ೪೧೫ ಕೋಟಿ ಜಪ ಸಂಪೂರ್ಣ ಜಾವನು ಸಂಕಲ್ಪ ಯಶಾಚೆ ವಾಟ್ಟೆರಿ ಆಸ್ಸಾ ಮ್ಹೊಣು ಪೂಜ್ಯ ಸ್ವಾಮ್ಯಾನಿ ಆಮ್ಗೆಲೆ ಭಕ್ತಿಚೆ ಶ್ರೀ ರಾಮ ನಾಮ ಜಪ ಪರಮಾತ್ಮಾಕ ಸಮರ್ಪಣ ಕೊರಚೇಚಿ ಶ್ರೇಷ್ಠ ಸೇವಾ ಮ್ಹಳ್ಳೆ. ಘೆಲೀಲೆ ೨೨೨ ವರ್ಷಾಂತು ಶ್ರೀ ದೇವಳ ತಶೀಚಿ ಸಂಸ್ಥಾನಾಚೆ ಯತಿ ಪರಂಪರೆಚೆ ಬಾಂಧವ್ಯ ತಾನ್ನಿ ಸಾಂಗಲೆ.
ಕಾಪು ಮೊಕ್ಕಾಂ ತಾಕೂನು ಮೂಡುಬಿದಿರೆಕ ಆಯ್ಯಿಲೆ ಪೂಜ್ಯ ಸ್ವಾಮೆಂಕ ಪೂರ್ಣಕುಂಭ ಸಹಿತ ಮಂಗಲ ವಾಜ್ಜಪ ಸಹಿತ ಸ್ವಾಗತ ಕೆಲ್ಲಿ. ಪೂಜ್ಯ ಸ್ವಾಮೆಂ ಶ್ರೀವೆಂಕಟರಮಣ ಆನಿ ಶ್ರೀ ಹನುಮಂತ ದೇವಳಾಕ ಆಪಣೇಲೆ ಪಯಲೇಚೆ ಭೇಟಿ ದಿಲ್ಲೆ. ಮಾಗಿರಿ ಚಲೀಲೆ ಸಭಾ ಕಾರ್ಯಕ್ರಮಾಂತು ಪೂಜ್ಯ ಸ್ವಾಮ್ಯಾಂಕ ಆಡಳಿತ ಮಂಡಳಿ ತರಪೇನ ಪಾದಪೂಜೆ ಸಹಿತ ಗೌರವ ಕೆಲ್ಲೆ. ದೇವಳಾಚೆ ಆಡಳಿತ ಮೊಕ್ತೇಸರ ಜಿ. ಉಮೇಶ ಪೈ ತಾನ್ನಿ ಯೇವ್ಕಾರ ಕೆಲ್ಲೆ. ಜಪ ಕೇಂದ್ರಾಚೆ ಪ್ರತಿನಿಧಿ ಎಂ. ಗಣೇಶ್ ಕಾಮತ್ ತಾನ್ನಿ ಪ್ರಾಸ್ತಾವಿಕ ಉತ್ರ ಉಲೋನು ಕಾರ್ಯಕ್ರಮ ನಿರೂಪಣ ಕೆಲ್ಲೆ. ಎಂ. ನಾಗೇಂದ್ರ ಭಟ್ ತಾನ್ನಿ ಆಬಾರ ಮಾನಲೆ.
ವೈದಿಕ ವೃಂದಾಚೆ ಪ್ರಾರ್ಥನಾ, ಆಶೀರ್ವಚನಾಚೆ ಉಪರಾಂತ ಶ್ರೀ ರಾಮನಾಮ ಜಪ ಅಭಿಯಾನಾಚೆ ಪ್ರಯುಕ್ತ ಹಾಂಗಾಚೆ ವಿದ್ಯಾನಿಧಿಃ ಜಪ ಕೇಂದ್ರಾಚೆ ವಿಶೇಷ ಜಪ ಅಭಿಯಾನಾಂತು ವೈದಿಕ ಎಂ. ಸುಧೇಶ್ ಭಟ್ ವಿಶೇಷ ಜಪ ಅಭಿಯಾನ ಬರಶಿ ಸಂಕಲ್ಪ ಬರಶಿ ಚಲಾಯಿಸಿಲೆ. ಪೂಜ್ಯ ಸ್ವಾಮೆಂ ಜಪ ಅಭಿಯಾನಾಂತು ಶ್ರೀರಾಮ ದೇವಾಕ ಮಹಾಪೂಜಾ ಕೆಲ್ಲೆ. ದೇವಳಾಚೆ ಮೊಕ್ತೇಸರ. ಪ್ರಧಾನ ಅರ್ಚಕ ವೇ. ಮೂ. ಎಂ. ಹರೀಶ್ ಭಟ್ ಸಹಿತ ವೈದಿಕ ವೃಂದ, ಗಾಂವ್ಚೆ, ಪರಗಾಂವ್ಚೆ ದೇವಳಾಚೆ ಮುಖೇಲ, ಸಮಾಜ ಬಾಂಧವ ಉಪಸ್ಥಿತ ವ್ಹರಲೀಲೆ. ಮಾಗಿರಿ ಪೂಜ್ಯ ಸ್ವಾಮೆಂ ಜಮೀಲೆ ಸಮಾಜ ಬಾಂಧವಾಂಕ ಫಲಮಂತ್ರಾಕ್ಷತಾ ವಾಂಟಿಲೆ. ವಿದ್ಯಾಕಲ್ಪತರು ಬಳಗಾಚೆ ವಿದ್ಯಾರ್ಥಿ ಲೋಕಾನಿ ಸ್ತೋತ್ರ ಪಠನ, ಸಂಕೀರ್ತನೆಂತು ಸಹಕಾರ ಕೆಲ್ಲಿಂತಿ.
ಮಾಗಿರಿ ಪೂಜ್ಯ ಸ್ವಾಮೆಂ ಪೊನ್ನೆಚಾರಿ ಶ್ರೀ ಲಕ್ಷ್ಮೀ ವೆಂಕಟರಮಣ ದೇವಳಾಕ ವರೇನ ಆಪಣೇಲೆ ಪಯಲೇಚೆ ಅನುಗ್ರಹ ಭೆಟ್ಟಿ ದಿಲ್ಲೆ. ಅನುವಂಶಿಕ ಮೊಕ್ತೇಸರ ಎಂ.ಪಿ. ಅಶೋಕ್ ಕಾಮತ್ ಕುಟುಂಬಸ್ಥಾನಿ ಪೂಜ್ಯ ಸ್ವಾಮ್ಯಾಂಕ ಗೌರವಾದರ ಬರಶಿ ದೇವಳಾಕ ಸ್ವಾಗತ ಕೊರನು, ಪಾದಪೂಜಾ ಪಾವೋನು ಫಲಮಂತ್ರಾಕ್ಷತ ಘೆತ್ಲೆ. ಮಾಗಿರಿ ಪೂಜ್ಯ ಸ್ವಾಮೆಂ ಕಾಪು ಮೊಕ್ಕಾಮಾಕ ಪರತೂನು ಘೆಲ್ಲೆ.