ಗಂಗೊಳ್ಳಿ ಮಲ್ಯರಮಠ ಶ್ರೀ ವೆಂಕಟರಮಣ ದೇವಳಾಂತು ಶ್ರೀ ದೇವಾಲೆ ಸನ್ನಿಧಿರಿ ಶ್ರೀ ಗೋಕರ್ಣ ಪರ್ತಗಾಳಿ ಜೀವೋತ್ತಮ ಮಠಾಧೀಶ ಶ್ರೀಮದ್ ವಿದ್ಯಾಧೀಶ ತೀರ್ಥ ಶ್ರೀಪಾದ ವಡೇರ ಸ್ವಾಮ್ಯಾಂಗೆಲೆ ಮಾರ್ಗದರ್ಶನ, ಆಶೀರ್ವಾದ ಬರಶಿ ಆ.೧೦ ದಿವಸು ಸೂರು ಜಾಲೀಲೆ ಅಖಂಡ ಭಜನಾ ಸಪ್ತಾಹ ಮಹೋತ್ಸವ ಶನ್ವಾರ ದೀಪ ವಿಸರ್ಜನೆ ಬರಶಿ ಸಮಾಪನ ಜಾಲ್ಲೆ. ಸಕ್ಕಾಣಿ ದೀಪ ವಿಸರ್ಜನೆಚೆ ವಿವಿಧ ಧಾರ್ಮಿಕ ಕಾರ್ಯಕ್ರಮ ದೇವಳಾಚೆ ಪ್ರಧಾನ ಅರ್ಚಕ ಎಸ್.ವೆಂಕಟರಮಣ ಆಚಾರ್ಯ ಆನಿ ಪುರೋಹಿತ ಜಿ.ವಿಠಲದಾಸ ಭಟ್ ನೇತೃತ್ವಾರಿ ಚಲ್ಲೆ. ದೇವಾಕ ಧೋಂಪಾರಾ ಮಹಾಪೂಜಾ, ಮಹಾಸಮಾರಾಧನ ಆದಿ ಧಾರ್ಮಿಕ ಕಾರ್ಯಕ್ರಮ ಹಜಾರಬಽರಿ ಭಜಕಾಂಗೆಲೊ ಸೇವೆ ಬರಶಿ ವಿಜೃಂಭಣೆರಿ ಸಂಪನ್ನ ಜಾಲ್ಲೆ. ಅಖಂಡ ಭಜನಾ ಸಪ್ತಾಹ ಮಹೋತ್ಸವಾಂತು ಗಾಂವ್ಚೆ -ಪರಗಾಂವ್ಚೆ ವಿವಿಧ ಭಜನಾ ತಂಡ ವಾಂಟೊ ಘೇವ್ನು ಭಜನಾ ಸೇವಾ ಪಾವಯಿಲೆ. ದೇವಳಾಚೆ ಆಡಳಿತ ಮಂಡಳಿ ಸದಸ್ಯ, ಗಾಂವ್ಚೆ ಧಾ ಲೋಕ, ಸಮಾಜಬಾಂಧವ, ಭಜಕ ಆದಿ ಲೋಕ ಮಹೋತ್ಸವಾಂತು ವಾಂಟೊ ಘೇವ್ನು ದೇವಾಲೆ ಪ್ರಸಾದ ಸ್ವೀಕರ್ಲೆ.
ತತ್ಸಂಬಂಧ ಫುಳ್ದೀಸು ಶುಕ್ರಾರ ಸಾಂಜವಾಳಾ ನಗರ ಭಜನಾ ಚಲ್ಲೆ. ದೇವಳಾಚೆ ಪ್ರಧಾನ ಅರ್ಚಕ ಎಸ್.ವೆಂಕಟರಮಣ ಆಚಾರ್ಯ ನೇತೃತ್ವಾರಿ ವಿಶೇಷ ದೇವ ಮಾಗಣಿ ಪಾವೋನು ಮಾಗಿರಿ ನಗರ ಭಜನಾ ಸೂರು ಜಾಲ್ಲೆ. ದೇವಳಾಚೆ ಆಡಳಿತ ಮೊಕ್ತೇಸರ ಎನ್.ಸದಾಶಿವ ನಾಯಕ್, ಆಡಳಿತ ಮಂಡಳಿ ಸದಸ್ಯ, ಸಮಾಜಬಾಂಧವ, ನಗರ ಭಜನೆಂತು ವಾಂಟೊ ಘೆತ್ತಿಲೆ.