ಉಡುಪಿಯ ಶ್ರೀ ಲಕ್ಷ್ಮೀ ವೆಂಕಟೇಶ ದೇವಳಾಂತು ೩೦ ಜೂನ್‌ಕ ಶ್ರೀ ಸಂಸ್ಥಾನ ಗೋಕರ್ಣ ಪರ್ತಗಾಳಿ ಜೀವೋತ್ತಮ ಮಠಾಚೆ ೫೫೦ವೇಂ ವರ್ಷಾಚೆ ಪ್ರಯುಕ್ತ ವಿಶೇಷ ಬೃಹತ್ ರಾಮನಾಮ ಜಪ ಅಭಿಯಾನ ಚಲ್ಲೆ. ಹೇ ಅಭಿಯಾನಾಂತು ಶ್ರೀ ಗೋಕರ್ಣ ಮಠಾಚೆ ಮಠಾಧೀಶ ಶ್ರೀಮದ್ ವಿದ್ಯಾಧೀಶ ಶ್ರೀಪಾದ ಒಡೆಯರ್ ಸ್ವಾಮೀಜಿ ಜಮೀಲೆ ಸರ್ವ ಜಾಪಕಾಂಕ ಅನುಗ್ರಹ ಕೆಲ್ಲಿ. ಸಕ್ಕಾಣ್ಚಾನ ಸಾಂಜವಾಳಾ ಪರ್ಯಂತ ಚಲೀಲೆ ಹೇ ಅಭಿಯಾನಾಂತು ಹಜಾರಾ ಪಶಿ ಚ್ಹಡ ಅಧಿಕ ಜಾಪಕಾನಿ ವಾಂಟೊ ಘೇವ್ನು ಸುಮಾರ ೪೧ ಲಾಕ್ ರಾಮನಾಮ ತಾರಕ ಮಹಾಮಂತ್ರಾಚೆ ಜಪ ಸ್ವಾಮ್ಯಾಂಗೆಲೆ ಉಪಸ್ಥಿತೀರಿ ಕೆಲ್ಲೆ.
ಸಕ್ಕಾಣಿ ೮:೦೦ ಶ್ರೀ ಲಕ್ಷ್ಮಿ ವೆಂಕಟೇಶ ದೇವಾಳಾಚೆ ಆಡಳಿತ ಮಂಡಳಿ ಆನಿ ಭಕ್ತ ಮೇಳ್ನುದೇವಾಕ ವಿಶೇಷ ಮಾಗಣಿ ಕೊರನು ಏಕ ದಿವಸಾಚೆ ಬೃಹತ್ ರಾಮನಾಮ ಜಪ ಅಭಿಯಾನ ಸೂರ ಕೆಲ್ಲೆ. ಧೋಂಪಾರಾ ೩ ಘಂಟ್ಯಾಕ ಶ್ರೀ ಸಂಸ್ಥಾನ ಗೋಕರ್ಣ ಪರ್ತಗಾಳಿ ಜೀವೋತ್ತಮ ಮಠಾಧೀಶ ದೇವಳಾಕ ಆಯ್ಯಿಲೆ ತೆದ್ನಾ ತಾಂಕಾ ಪೂರ್ಣ ಕುಂಭ ಸ್ವಾಗತ ದಿವನು ಆಪೋನು ಘೆತ್ಲೆ. ಪಾದ ಪೂಜಾ, ಫಲ ಪುಷ್ಪ ಕಾಣಿಕಾ ಸಮರ್ಪಣ ಚಲ್ಲೆ. ಸ್ವಾಮ್ಯಾಂಗೆಲೆ ದಿವ್ಯ ಉಪಸ್ಥಿತಿರಿ ಬೃಹತ್ ರಾಮನಾಮ ಜಪ ಅಭಿಯಾನ ಚಲ್ಲೆ.
ಪೂಜ್ಯ ಸ್ವಾಮೆ ತಾಂಗೆಲೆ ಆಶೀರ್ವಚನಾಂತು ರಾಮನಾಮ ಜಪಾಚೆ ಮಹತ್ವ ತಾಜ್ಜೆ ಪ್ರತಿಫಲ ಖಾತೇರಿ ಜಮೀಲೆ ರಾಮ ಭಕ್ತಾಂಕ ಸಾಂಗ್ಲೆ. ಆಮ್ಗೆಲೆ ಮ್ಹಾಲ್ಗಡ್ಯಾನಿ ಕೆಲೀಲೆ ಪುಣ್ಯಲಾನಿ ಆಮ್ಕಾ ಸಮಾಜಾಂತು ಸ್ಥಾನಮಾನ ಗೌರವ, ಕೀರ್ತಿ ಯಶಸ್ಸ ಮೆಳ್ಳಾ. ಆತ್ತ ಕೊರಚೆ ರಾಮಜಪ ನಿಮಿತ್ತ್ಯಾನಿ ತುಮಕಾ ಆನಿ ತುಮ್ಗೆಲೆ ಸಂಸಾರಾಕ ಕಲ್ಪವೃಕ್ಷಾ ತಸ್ಸಾಲೆ ಶ್ರೇಷ್ಠ ಫಲ ನಿರಂತರ ಮೆಳ್ತಾ. ಮುಖಾರಿ ಚಲಾಯಿಸುಚೆ ಹೇ ೫೫೦ ದಿವಸಾಚೆ ಶ್ರೀರಾಮನಾಮ ಜಪ ಅಭಿಯಾನ ಆಮ್ಗೆಲೆ ಸಮಾಜಾಕ ಮೆಳೀಲೆ ಅಭೂತಪೂರ್ವ ಅವಕಾಶ. ಶ್ರೀ ರಾಮನಾಮ ಜಪ ಕೆಲೀಲೆ ನಿಮಿತ್ತ್ಯಾನಿ ಶ್ರೀದೇವು ಏಕ ನ್ಹಂಹಿ ಏಕ ನಮೂನ್ಯಾನ ಆಮ್ಕಾ ಅನುಗ್ರಹ ಕರತಾ, ದೇವಾಲೆ ವಯ್ರಿ ದೃಢ ನಂಬಿಗಾ ದವರ ಮ್ಹಣ್ಚೆ ಆಪೋವ್ಣಿ ದಿಲ್ಲೆ. ರಾಮನಾಮ ಜಪ ಅಭಿಯಾನಾಂತು ಗಾಂವ್ಚೆ, ಪರಗಾಂವ್ಚೆ ಭಕ್ತ ಜಾಲೀಲೆ ಶ್ರೀ ವೀರ ವಿಠಲ ದೇವಸ್ಥಾನ ಭದ್ರಗಿರಿ, ಶ್ರೀ ರಾಮ ಮಂದಿರ ಮಲ್ಪೆ , ತೋನ್ಸೆ ಪೈ ಕುಟುಂಬಸ್ಥ, ಶ್ರೀ ವೆಂಕಟರಮಣ ದೇವಳ ಬ್ರಹ್ಮಾವರ, ಶ್ರೀ ರಾಮ್ ಮಂದಿರ ಸಾಲಿಗ್ರಾಮ ಹಾನ್ನಿ ವಾಂಟೊ ಘೆತ್ತಿಲೆ
ಶ್ರೀ ರಾಮ ನಾಮ ಜಪ ಅಭಿಯಾನ ನವೀನ ಜಾವ್ನು ಸೂರು ಕೇಲೀಲೆ ಕೇಂದ್ರ ಆನಿ ಉಪ ಕೇಂದ್ರ ಜಾಲೀಲೆ ಶ್ರೀ ವೆಂಕಟರಮಣ ದೇವಳ ಕಲ್ಯಾಣಪುರ, ಶ್ರೀ ವೀರ ವಿಠ್ಠಲ ದೇವಳ ಉದ್ಯಾವರ, ಶ್ರೀ ದುರ್ಗಾಂಬಾ ದೇವಳ ಮಣಿಪಾಲ್, ಶ್ರೀ ವಿಠೋಬ ದೇವಳ ಮುಂಡ್ಕೂರ್, ಶ್ರೀ ವೆಂಕಟರಮಣ ದೇವಳ ಕಾಪು, ಶ್ರೀ ರಾಮನಾಮ ಕಮಿಟಿ ಸದಸ್ಯ ಯವ್ನು ಸ್ವಾಮ್ಯಾಂಗೆಲೆ ಸಾಂಗಿಲೆ ವಿಶೇಷ ವಿನಂತಿ ಸ್ವೀಕರ್ಲೆ. ಶ್ರೀರಾಮನಾಮ ಅಭಿಯಾನಾ ಉಪರಾಂತ ದೇವಳಾಚೆ ಶ್ರೀ ಲಕ್ಷ್ಮಿ ವೆಂಕಟೇಶ ಸ್ವಾಮಿಕ ವಿಶೇಷ ರಾತ್ರಿ ಪೂಜಾ ಶ್ರೀ ಸ್ವಾಮ್ಯಾನಿ ಕೆಲ್ಲೆ. ಉಪರಾಂತ ಅನಂತ ವೈದಿಕ ಕೇಂದ್ರಾಚೆ ಅರ್ಚಕಾನಿ ವೇದ ಮಂತ್ರ ಘೋಷ ಬರಶಿ ಪ್ರಾರ್ಥನಾ ಕೆಲ್ಲೆ. ಜಗದೀಶ್ ಪೈ ತಾನ್ನಿ ವಿಶೇಷ ಸಹಕಾರ ದಿಲ್ಲಿ, ದೇವಳಾಚೆ ಧರ್ಮದರ್ಶಿ ಪಿ ವಿ ಶೆಣೈ ತಾನ್ನಿ ಯೇವ್ಕಾರ ಕೆಲ್ಲಿ. ಪ್ರಾಸ್ತಾವಿಕ ತಶೀಚಿ ಕಾರ್ಯಕ್ರಮಾಚೆ ನಿರೂಪಣ ವೇ . ಮೊ . ಚೇಂಪಿ ರಾಮಚಂದ್ರ ಭಟ್ ತಾನ್ನಿ ಚಲೋನು ದಿಲ್ಲಿ. ಶ್ರೀ ಸಂಸ್ಥಾನ ಗೋಕರ್ಣ ಪರ್ತಗಾಳಿ ಜೀವೋತ್ತಮ ಮಠಾಚೆ ೫೫೦ವೇಂ ಸಂಭ್ರಮಾಚರಣೆ ಪ್ರಯುಕ್ತ ಮಠಾಧೀಶ ಜಾಲೀಲೆ ಪರಮಪೂಜ್ಯ ಶ್ರೀಮದ್ ವಿದ್ಯಾಧೀಶ ತೀರ್ಥ ಶ್ರೀಪಾದ ವಡೆಯರ್ ಸ್ವಾಮ್ಯಾಂಗೆಲೊ ದಿವ್ಯ ಸಂಕಲ್ಪ ಪ್ರಮಾಣೆ ೫೫೦ ಕೋಟಿ ಶ್ರೀ ರಾಮ ನಾಮ ಜಪ ಅಭಿಯಾನ ಜಿ.ಎಸ್.ಬಿ. ಬಾಂದವಾನಿ ಚ್ಹಡ ಅಂಕಡ್ಯಾರಿ ಆಸ್ಸುಚೆ ೧೧೫ ಪಶಿ ಚ್ಹಡ ಕೇಂದ್ರಾಂತು ಚಲ್ತರಿ ಆಸ್ಸಾ. ತಾಂತು ಉಡ್ಪಿ ಶ್ರೀ ಲಕ್ಷ್ಮೀವೆಂಕಟೇಶ ದೇವಳ ವರೇನ ಏಕ ಜಾವ್ನಾಸ್ಸಾ.